تالعارداعى شەرزات بولاتتىڭ ءولىمى: كۇدىكتىلەردىڭ ءبىرىنىڭ اناسى ۆيدەوۇندەۋ جاسادى

kris_p_talgar instagram پاراقشاسىندا كۇدىكتىلەردىڭ ءبىرىنىڭ اناسى پرەزيدەنتكە, باس پروكۋرورعا جانە ىشكى ىستەر مينيسترىنە جاساعان ۆيدەوۇندەۋى جاريالاندى. ۆيدەوداعى ايەلدىڭ ايتۋىنشا, ونىڭ ۇلى مەن ۇلىنىڭ دوسى نەگىزسىز قاماۋعا الىنعان. ولارعا قىلمىستى حابارلاماۋ جانە جاسىرۋ باپتارى بويىنشا ايىپ تاعىلىپ وتىر. الايدا ايەل ولاردىڭ قىلمىس ورنىندا بولماعانىن, تەك كەيىنىرەك, بولارى بولىپ بىتكەننەن كەيىن عانا بارعانىن ايتادى. ۇستالعان جىگىتتەردەن الدىمەن جاۋاپ الىنىپ, كەيىننەن بوساتىلعان. ءبىراق 13 قازاندا ايەلدىڭ ۇلىن قايتا ۇستاپ اكەتكەن.

"ولاردى نە ءۇشىن قاماپ قويعانىن تۇسىنبەيمىن. بۇل 13 ادامدى جيناۋ ماقساتىندا ىستەلىپ وتىر ما؟ ولار ءتىپتى قىلمىس ورنىندا بولماعان دا. ولار ءتىپتى نە جاعداي بولعانىن دا بىلمەگەن. الايدا قىلمىس ورنىندا بولعان ەكى قىز كۋاگەر رەتىندە جاۋاپ بەرىپ ءجۇر", - دەدى كۇدىكتىلەردىڭ ءبىرىنىڭ اناسى ۆيدەودا.

ال الماتى وبلىسىنىڭ پوليسيا دەپارتامەنتى ۆيدەوعا قاتىستى:

"13 قازاندا ءۇش كۇدىكتى قاماۋعا الىندى. ولارعا قىلمىستىق كودەكستىڭ 434-بابى &ndash؛ "قىلمىس تۋرالى حابارلاماۋ" بويىنشا ايىپ تاعىلدى. تەرگەۋ ءىس-شارالارىنىڭ ناتيجەسىندە كۇدىكتى ك. قىلمىس تۋرالى حاباردار بولعانى انىقتالدى. سوتتىڭ سانكسياسىمەن ول ەكى ايعا قاماۋعا الىندى. قازىرگى ۋاقىتتا قىلمىستىق ءىستى تولىق جانە وبەكتيۆتى تەرگەۋ ءۇشىن قاجەتتى تەرگەۋ ارەكەتتەرى جۇرگىزىلىپ جاتىر, ونىڭ اياسىندا بارلىق قاتىسۋشىنىڭ ىس-ارەكەتتەرىنە قۇقىقتىق باعا بەرىلەدى", - دەلىنگەن پوليسيا instagram-داعى پاراقشاسىندا. ؛