tiktok جاستاردى بۇزىپ جاتىر ما؟

سەناتورلار جاستارعا تەرىس اسەر ەتەتىن كيبەرقاۋىپتەردىڭ ىشىندە ەڭ ءقاۋىپتىسى tiktok جەلىسى دەپ سانايدى.

"بۇگىندەرى جاستارىمىز  ؛tiktok-تىڭ قىتايلىق پلاتفورماسىن پايدالانىپ ءجۇر. ستاتيستيكاعا سايكەس, جەلى قولدانۋشىلارىنىڭ شامامەن 75 پايىزى 13 پەن 24 جاس ارالىعىنداعى جاستار. زەرتتەۋ ناتيجەلەرى كورسەتكەندەي, ءتىپتى 4-5 جاس ارالىعىنداعى بالالار كۇن سايىن tiktok-تا كەم دەگەندە 75 مينۋت ۋاقىتىن وتكىزەدى. بۇگىنگى تاڭدا وسى ونلاين-پلاتفورماداعى كامەلەتكە تولماعانداردىڭ قاۋىپسىزدىگى, جەكە دەرەكتەردىڭ قاۋىپسىزدىگىن قامتاماسىز ەتۋ الەمنىڭ بارلىق دەرلىك ەلدەرىنىڭ باس اۋرۋىنا اينالىپ وتىر", دەلىنگەن دەپۋتاتتىق ساۋالدا.

سەناتورلار ەۋروپا ەلدەرى tiktok-تا بالالاردى زياندى اقپاراتتان قورعاۋ تەتىكتەرى جۇمىس ىستەمەيتىنىن انىقتاپ, وعان 368 ميلليون دوللار, ال اقش كامەلەتكە تولماعانداردىڭ دەرەكتەرىن ساقتاعانى ءۇشىن tiktok-قا 5 ميلليون دوللار ايىپپۇل سالعانىن باسا ايتادى.

"رەسەي مەن وزبەكستان بۇل الەۋمەتتىك جەلىنى ءوز اۋماعىندا تولىعىمەن بۇعاتتاپ تاستاعان. ويتكەنى, بىرىنشىدەن, tiktok-قا قۇمار جاس ۇرپاقتىڭ كورۋ قابىلەتى كۇرت ناشارلاعان. ەكىنشىدەن, ونداعى كەيبىر كونتەنت جاستار بويىندا باسقا ادامدارعا دەگەن وشپەندىلىكتى ارتتىرىپ, قاتىگەز مىنەز-قۇلىقتى قالىپتاستىرادى. ءبىزدى, اسىرەسە tiktok-تاعى تىكەلەي ەفيرلەر مازالايدى. ۇلتتىق مەنتاليتەتىمىزگە جات مازمۇنداعى ۆيدەولار ءجيى كورسەتىلەدى: ايەل كيىمىن كيگەن ەر ادام, بەتىنە ۇياتسىز سوزدەر جازىپ العان قىزدار جانە ت. ب. ءبىر سوزبەن ايتقاندا, ۇلگى ەتۋگە كەلمەيتىن, كەرىسىنشە تەرىس قىلىقتى "جۇلدىزدار" جاستاردىڭ قاھارمانىنا اينالىپ بارادى. ساۋاتسىز پىكىرلەر مەن ساۋاتسىز سوزدەرگە دە جاس ۇرپاقتىڭ ەتى ۇيرەنە باستاعان".

دەپۋتاتتار باتىس ەلدەرىندە tiktok-تا جاسوسپىرىمدەرگە قاتىستى شەكتەۋلەر بار ەكەنىن ايتادى. اتاپ ايتقاندا, بۇل جەلىدە كۇنىنە ءبىر ساعاتتان ارتىق وتىرۋعا بولمايدى, ال 13 جاسقا تولماعاندار ءۇشىن ۋاقىت شەكتەۋى - 30 مينۋت. قىتايدىڭ وزىندە جاسوسپىرىمدەرگە tiktok-تى كۇنىنە 40 مينۋتتان ارتىق پايدالانۋعا رۇقسات ەتىلمەيدى.

"وكىنىشكە قاراي, ءبىزدىڭ ەلدە مۇنداي شەكتەۋلەر جوق", دەيدى سەناتورلار.

وسىعان بايلانىستى ولار پرەمەر-مينيستردەن tiktok-قا قازاقستان زاڭدارىنىڭ ورىندالۋىن ساقتاۋدى جانە قوسىمشانىڭ جۇمىس الگوريتمدەرىن باتىس ەلدەرىندەگىدەي ەتىپ قايتا جاساقتاۋدى مىندەتتەۋدى سۇرايدى.