توقاەۆ نازارىنا: ۇيعىر اۋدانى شيەلەنىس نۇكتەسى بولماۋعا ءتيىس

وتكەن اپتادا پرەزيدەنت قاسىم-جومارت توقاەۆ پارلامەنت ءماجىلىسى وتىرىسىندا كولەمدى بايانداما جاساپ, ءسوز سوڭىن "ەندى, قازاقستاندا دامۋدىڭ جاڭا كەزەڭى باستالادى. بۇل &ndash؛ شىنايى جاڭارۋ كەزەڭى بولادى" دەپ اياقتادى. سول جولعا تۇسۋدە قوعامنىڭ تالاپ-تىلەگىنە, حالىقتى مازالايتىن ماسەلەلەرگە, شيەلەنىس نۇكتەلەرىنە ساراپ جۇرگىزىلىپ, سونى شەشۋ جولدارى قاراستىرىلاتىنى حاق. سول ىزدەنىس كەزىندە وسىعان دەين سان مارتە كوتەرىلگەن ۇيعىر اۋدانىنىڭ اتىن وزگەرتۋ ماسەلەسى نازاردان تىس قالماۋعا ءتيىس.

جوعارىدا شيەلەنىس نۇكتەسى تىركەسى تەگىن قولدانىلىپ تۇرعان جوق. ۇيعىر اۋدانى قازاقستانداعى ىقتيمالدى شيەلەنىس نۇكتەلەرىنىڭ ءبىرى. ول سوڭعى جىلدارى ايقىن بايقالا باستادى. قازاقستاندا كەيىنگى ەكى جىلدا ەكى ۇلتارالىق كيكىلجىڭ بولدى. قورداي قاقتىعىسىندا 11 ادام قازا تاۋىپ, 100-دەن استام ءۇي مەن كولىك قيراسا, ۇيعىر اۋدانىنداعى قازاق-ۇيعىر جىگىتتەرى توبەلەسىنىڭ سالدارىنان بىرنەشە ادام پىشاق جاراقاتىن الدى. قوردايداعى جاعداي تۇراقتالعانىمەن, ۇيعىر اۋدانىنداعى جانجال جالىنى تولىق سونگەن جوق. مۇنى حالىقتىڭ ءسوزىن ءوز اۋزىنان ەستىگەننەن كەيىن ايتىپ وتىرمىز. دۇرلىككەن حالىقتى سول كەزدە الماتى وبلىسىنىڭ بۇرىنعى اكىمى اماندىق باتالوۆتىڭ "اۋدان اتىن اۋىستىرۋ تۋرالى ۇسىنىستارىڭىزدى جوعارىعا جەتكىزەمىن" دەگەن ۋادەسى دە توقتاتقان-دى. اكىم اۋىسقانىمەن ماسەلە شەشىلمەي قالىپ قويدى.

 ؛

وسىلاردىڭ ءوزى-اق اۋدان اتىن اۋىستىرۋ قانداي وزەكتى ەكەنىن كورسەتىپ تۇر ەمەس پە؟! راسىندا دا ەرتەڭ ءار وبلىستا شوعىرلانعان ءتۇرلى ەتنوستار بىر-بىردەن اۋدان قۇرىپ بەرۋدى يا بولماسا تۇرىپ جاتقان جەرىن ءوز ەتنوستارىنىڭ اتىمەن اتاۋدى سۇراپ جاتسا, ولارعا نە ايتامىز؟ الدە ءبارىنىڭ تىلەگىن ورىندايمىز با؟ وندا ەلدىڭ ءبىرتۇتاستىعى قايدا قالادى؟ ءتىپتى باس تارتىپ جاتقان جاعدايدا ونى قالاي تۇسىندىرەمىز؟ اۋدان اتى تەك ۇيعىر ۇلتىنىڭ اتىمەن عانا اتالۋى كەرەك دەيمىز بە؟ ول ەتنوس وكىلدەرى تەڭ قۇقىقتى قازاقستاندا ءوزىن بىرەۋدەن كەم سەزىنىپ جۇرمەي مە؟

ۇيعىر اۋدانىندا داۋ-داماي ءالى كۇنگە دەيىن دۇركىن-دۇركىن بولىپ تۇرادى. جۋىردا عانا قازاق اقىنى مۇقاعالي مەن ۇيعىر اقىنى باحتياعا قويىلعالى جاتقان ساۋلەت كومپوزيسياسىنىڭ جوباسى ءبىراز ايتىس-تارتىس تۋدىردى.

ايتا بەرسە, اۋدانداعى تۇرمىستىق, الەۋمەتتىك ماسەلەلەر از ەمەس. الايدا باستى تۇيىتكىل تارقاتىلماعان سوڭ ماسەلەنىڭ ۇلتارالىق سيپات الىپ كەتۋى وپ-وڭاي.

قازاقستان سوڭعى جىلدارى بۇرىن سوڭدى بولماعان قانتوگىس وقيعالاردى باستان وتكەردى. قاڭتار باسىنداعى قىرعىننان كەيىن ەل تولىق ەسىن جيا العان جوق. بىزگە كەزەكتى تراگەديا كەرەك ەمەس. كوپتىڭ تىلەۋى ەسكەرىلىپ, ۇيعىر اۋدانىنىڭ اتىن وزگەرتەتىن كەز كەلدى.