شالكودە جايلاۋىنداعى «شوپاندار تويى»

كوك جايلاۋدىڭ تورەسى, جەلماياسىنا ءمىنىپ جاھاندى كەزگەن اسانقايعىنىڭ ارمانىنداعى جەرۇيىق مەكەن - شالكودە جايلاۋىنىڭ تورىندە قازاقتىڭ ۇلتتىق قۇندىلىقتارى  ؛جاڭعىرتىلىپ, ۇزاق جىلدار بويى ۇلىقتالماي ۇمىت بولىپ بارا جاتقان شوپاندار تويى دۇركىرەتىپ اتالىپ ءوتىلدى.

كوشپەندى ەلدىڭ ۇلتتىق مادەنيەتى ۇلىقتالىپ, ۇلتىمىزدىڭ ءسالت-داستۇرى مەن ونەرى, اس ءمازىرى مەن دالا سپورتى دارىپتەلەتىن, جالپى ۇلتتىق بولمىسىمىز ناسيحاتتالدى!

قاسيەتتى قارادالانى مەكەن ەتكەن ۇيعىر اۋدانى اۋىلشارۋاشىلىعى مەن مال شارۋاشىلىعىنا بەيىمدەلگەن اۋدان. شارادا اۋدان اكىمى بوتا سەرىكقىزى ءتورت تۇلىگىن تۇگەندەپ, ءتورت قۇبىلاسىن تەڭەستىرگەن مال شارۋاشىلىعىنىڭ ناعىز مايتالماندارى مالشىلار قاۋىمىنىڭ مەرەكەسىمەن قۇتتىقتاپ, مال باعۋ مەن مال باسىن كوبەيتۋدە وزىق ەڭبەك ەتىپ, جەتىستىكتەرگە جەتكەن ءبىرقاتار اۋىل مالشىلارىن ارنايى ماراپاتتاپ, ماڭداي تەر مەن ادال ەڭبەكتەرىن ەلەپ ەسكەرىلدى.

قازاق كۇرەسىنەن جاۋىرىنى جەر يىسكەمەگەن پالۋاندار بوز كىلەمدە باق سىناستى.

ات قۇلاعىندا وينايتىن سپورتشىلار تەڭگە ىلۋدەن سايىسقا تۇسسە, بىلەكتى جىگىتتەر ات ۇستىندە اۋدارىسپاقتان تاماشا ويىن كورسەتتى. قوشقار كوتەرۋدەن دە ءبىرقاتار جىگىتتەر جارىسقا ءتۇستى.

ساپ تۇزەي تىگىلگەن اقشاڭقان ۇيلەردە اس بەرىلىپ, بىر-بىرىمەن ارقا-جارقا بولىسقان اقساقالدار مەن اق جاۋلىقتى انالار, ءازىلى جاراسقان بوز بالا بويجەتكەندەر ناعىز تويدىڭ ءسانىن كىرگىزدى.

الداعى جىلدارى اۋقىمى كەڭەيەتىن ەستەن كەتپەس ءدۇبىرلى توي بولدى.