قازاقستاندا كومبايندار ءوندىرىسى 63 پايىزعا ءوستى

اعىمداعى جىلدىڭ سەگىز ايىندا قازاقستاندا شامامەن 3,6 مىڭ تراكتور ءوندىرىلدى, بۇل وتكەن جىلمەن سالىستىرعاندا 33% - عا جانە 1 مىڭ كومباين (63% - عا ءوسىم) كوپ. بۇل تۋرالى قر پرەمەر-مينيسترى ءاليحان سمايىلوۆ ءماجىلىس دەپۋتاتتارىنىڭ سۇراۋىنا جاۋاپ بەرە وتىرىپ حابارلادى.

ونىڭ ايتۋىنشا, بۇگىندە وتاندىق وندىرۋشىلەر تراكتورلار نارىعىنىڭ 88%  ؛جانە كومباينداردىڭ 75%-دى قامتيدى.

وتاندىق زاۋىتتاردا ءارتۇرلى قۋاتتىلىقتاعى تراكتورلاردىڭ 10 برەندى, استىق جينايتىن جانە جەم جينايتىن كومباينداردىڭ 5 برەندى يگەرىلدى. 10 كاسىپورىن قوسالقى اۋىلشارۋاشىلىق تەحنيكاسى مەن جابدىقتارىن ءشىعارادى.

وندىرىستى وقشاۋلاۋ دارەجەسى تۋرالى ايتا كەلە, ءاليحان سمايىلوۆ ونەركاسىپتىك الاڭداردا قۇرامداس بازا, اسپالى جانە تىركەمە جابدىقتار ءوندىرىسى جولعا قويىلعانىن, كابينالاردى دايىنداۋ, دانەكەرلەۋ جانە بوياۋ جونىندەگى وپەراسيالار يگەرىلگەنىن, مەتالدى وڭدەۋ جانە كونۆەيەرلىك قۇراستىرۋ جونىندەگى وندىرىستىك جەلىلەر, سونداي-اق كومپونەنتتەردى دايىنداۋ جانە جيناقتاۋ جونىندەگى باسقا دا قۋاتتار ىسكە قوسىلعانىن ناقتىلادى.

سونداي-اق, ول اۋىل شارۋاشىلىعى تاۋارىن وندىرۋشىلەرگە ارنالعان تەحنيكا پاركىن جاڭارتۋ ءۇشىن ونەركاسىپتى دامىتۋ قورى, قازاگروقارجى جانە جاسىل دامۋ جەلىسى بويىنشا جەڭىلدىكتى ليزينگتىك قارجىلاندىرۋدىڭ ءبىرقاتار تەتىكتەرى (10 جىلعا 6-7% - بەن) ەنگىزىلگەنىن ەسكە سالدى.

"بۇل باعدارلامالار بويىنشا جالپى اينالىمى رەۆولۆەرلىك نەگىزدە جۇرگىزىلەتىن 100 ملرد تەڭگە قاراستىرىلعان. بۇگىنگى تاڭدا ولار بويىنشا 2,4 مىڭعا جۋىق اۋىل شارۋاشىلىعى تەحنيكاسى قارجىلاندىرىلدى",-دەپ ناقتىلادى پرەمەر-مينيستر.

سونىمەن قاتار, ول قازىرگى ۋاقىتتا كادەگە جاراتۋ الىمىن جويۋ ماسەلەسى قاراستىرىلمايتىنىن اتاپ وتتى.

پرەمەر-مينيستر بۇل تولەم ءوندىرىستى ىنتالاندىرۋ تەتىگىنىڭ بولۋىنا بايلانىستى وتاندىق ءوندىرىستىڭ تراكتورلارى مەن كومبايندارىنىڭ قۇنىنا ەنگىزىلمەيتىنىن ءتۇسىندىردى. قازاقستاندا انالوگتارى وندىرىلمەيتىن يمپورتتىق تەحنيكاعا (كارتوپ جينايتىن كومبايندار, ءجۇزىم جينايتىن كومبايندار جانە ت.ب.) كادەگە جاراتۋ دا قولدانىلمايدى.

"2022 جىلى كادەگە جاراتۋ ستاۆكالارى 50% - عا تومەندەتىلدى. بۇل رەتتە كادەگە جاراتۋ الىمىنىڭ قاراجاتىن پايدالانۋ شەڭبەرىندە جەڭىلدەتىلگەن اۆتوكرەديت بەرۋدى قارجىلاندىرۋ, اۆتوبۋس پاركى مەن اۋىل شارۋاشىلىعى تەحنيكاسىن جاڭارتۋ باعدارلامالارى ىسكە قوسىلعانىن اتاپ وتكەن ءجون", - دەدى ول.

پرەمەر-مينيستردىڭ مالىمەتىنشە, قازاقستان اۋماعىندا ءوز ونىمدەرىن روستسەلماش, پەتەربۋرگ تراكتور زاۋىتى (رەسەي), "گومسەلماش" ااق, "متز" ااق, "بوبرۋيسكاگروماش" ااق (بەلارۋس), lovol heavy industry, yto group corporation, shandong wuzheng group, dongfeng agricultural machinery (قحر), claas gmh (گەرمانيا), sdf توبى (يتاليا), pö؛ttinger landtechnik gmbh (اۆستريا) سەكىلدى ءوندىرىس ورىندارى ءوز ونىمدەرىن لوكاليزاسيالاعان.