21 مامىر, 2020 ايتتى-ەي, باۋىرىڭ!

بەيسەن قۇرانبەكتىڭ ايەلى: دۇنيەدەن وتەر كەزىندەگى سوڭعى ويلارىن عانا جەتكىزسەم دەيمىن

facebook

تورتىنشى كۇن, بەيسەنىن جوقتاعان حالقىنىڭ كوز جاسى توقتار ەمەس. ەگىلگەن اعايىنعا بەيسەكەڭنىڭ جارى گۇلميرا باسۋ ايتىپتى.

&ldquo؛ارداقتىم, ازاماتىم, اسىل جارىم...&rdquo؛

ومىردەن ءوتتى... ماڭگىلىك مەكەنىنە جەتتى... ول كىسىنىڭ دەمى ۇزىلسە, مەنىڭ دە تىنىسىم توقتايتىنداي كورىنەتىن. الايدا كەۋدەمدەگى جانىم شىقپاعان سوڭ, ءتىرى ادام تىرشىلىگىن جاساي بەرەدى دەمەكشى, باسىمدى كوتەرىپ, اينالاما قاراۋىما تۋرا كەلدى. اللانىڭ ىسىنە كوندىم.

بەيسەكەمنىڭ ارتىنان قازا قايىرلى بولسىن ايتىپ جاتقان ادامنىڭ سانىندا ەسەپ جوق, قالىڭ قازاق قابىرعاسى قايىسىپ, كوڭىل ايتۋدا. ەلىمىزدىڭ يگى جاقسىلارى لەبىزدەرىن ءبىلدىرىپ, جەدەلحاتتار جولداپ جاتىر.

الەۋمەتتىك جەلىلەردەگى جازبالار, ارناۋلار مەن كوممەنتارييلەردى بەي-جاي وقۋ مۇمكىن ەمەس, جۇرەگىڭدى قان جىلاتادى دەگەن اعايىننىڭ ءوزارا اڭگىمەسىن ءۇش كۇننەن بەرى ەستۋدەمىن. ولاردىڭ بارلىعىن اشىپ وقۋعا جۇيكەم شىدامادى... ايتسە دە كەشە ءبىرقاتارىن كوردىم, ءتۇسىندىم. كورەرمەن قاۋىم, جورا-جولداس, مايدانداس ارىپتەستەر, ۇلگى تۇتىپ سوڭىنان ەرگەن جاستار قانداي تۇلعادان ايرىلىپ قالعانىن سوزبەن جەتكىزە الماي, زار يلەپ جوقتاپ جاتىر.

تەلەارنالار بەكەڭ تۋرالى سيۋجەتتەرى مەن حابارلارىن جەدەل تۇردە دايىنداپ, حالىق نازارىنا ۇسىنىپ, ىستىق ىقىلاستارىن بىلدىرۋدە. الىس-جاقىن شەتەلدەردەگى باۋىرلار دا ورنى تولماس قايعىعا ورتاقتاسۋدا. بارشاڭىزعا اۋلەتىمىزدىڭ اتىنان العىسىمدى بىلدىرەمىن.

بەيسەكەمنىڭ ماقتاۋىن جەتكىزىپ, بوياۋدى اياماي, اسىرەلەپ ايتا بەرسەم بولار ەدى, ءبىراق, قۇدايعا شۇكىر, ونى مەنەن نەشە ەسە ارتىق جاقسى جەتكىزەتىن ادامدار بارشىلىق. ءارى ونىڭ شىنايى بەينەسىن بەتپە بەت كەزدەسكەندە دە, كوگىلدىر ەكراننان دا وزدەرىڭىز كورىپ, باعاسىن بەرىپ جاتىرسىزدار. سوندىقتان مەن ونىڭ وسى دۇنيەدەن شىن دۇنيەگە وتەر كەزىندەگى سوڭعى ويلارىن عانا جەتكىزسەم دەيمىن.

ول ۇزاق اۋىردى, اۋرۋدىڭ جاقسىسى جوق, الايدا ناق وسى دەرت ادامنىڭ سابىرلىلىعى مەن ءتوزىمىن سىناۋعا ارنالعان با دەگەن ويعا قالدىم. اۋرۋ دەندەپ, دەنەنى قۇرساپ, قيناپ جاتسا دا, بەيسەكەم قاباعىن ءبىر شىتپادى, «؛مىنا اۋرۋ پالە بولدى, شارشاتتى»؛ دەگەندى ايتپادى. دۇنيەدەن وزۋ وسىنداي دا بولادى ەكەن...

«؛قۇدايىم مەنى قاي كەزدە الامىن دەسە دە دايىنمىن. اللانىڭ ماعان ءناسىپ ەتكەن ومىرىنە دە, سىناعىنا دا رازىمىن. مەن جاقسى ءومىر ءسۇردىم. ماعان اللا تاعالا جاقسى اتا-انا, جاناشىر باۋىر, ادال جار, سۇيكىمدى بالا سىيلادى. ون ەكى مۇشەمدى ساۋ قىلىپ, بويىما قۋات بەردى, ميىما سانا, جۇرەگىمە رۋح بەردى. باسىما باق قوندىردى. ەل-جۇرتىما ماڭداي تەرىمدى سىپىرىپ ءجۇرىپ قىزمەت ەتۋگە مۇمكىندىك بەردى. تاعى ۋاقىت بەرسە, تاعى دا ايانباي قىزمەت ەتۋگە دايارمىن. مەنى جاقىندارىممەن, بالالارىممەن سىناماي, جەكە باسىما دەرت بەرىپ, ءوز دەنەممەن سىناپ جاتقانىنا تاعى دا شەكسىز ريزامىن. ريزامىن!»؛

جازبا سەرىك ابىكەنۇلىنىڭ facebook پاراقشاسىنان الىنعان

ىلمەك سوزدەر: بەيسەن قۇرانبەك

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

باننەر

پىكىر قالدىرۋ

پىكىر