ساياساتتانۋشى شالقار نۇرسەيىتوۆ: "؛مەن قر ازاماتىمىن"؛ دەپ ايتۋعا قورقاتىنداي بەيشارا كۇيگە قالاي جەتتىك؟

كارانتيندە النۋر يلياشەۆتىڭ, ارمان شوراەۆتىڭ جانە بىرنەشە ساياسي بەلسەندىنىڭ قۇقىعىنىڭ اياققا تاپتالۋىن كورىپ "پرەزيدەنت توقاەۆ بايعۇس نسود ارقىلى رەفورما جاساعىسى كەلەدى-اق, ءبىراق وعان جاساتپاي وتىر", "جىلىمىقتى جوققا شىعارۋعا بولمايدى", "قوس پرەزيدەنتتىڭ اراسىندا بيلىككە تالاس سۇمدىق ءجۇرىپ جاتىر" دەگەن يلليۋزيادان ارىلعانداردىڭ سانى كەيىنگى ەكى-ۇش كۇندە ارتقان شىعار دەپ ۇمىتتەنەمىن.

وزىنىڭ كونستيتۋسيالىق قۇقىعىن پايدالانىپ, بيلىكتى سىناعانى ءۇشىن قۋدالانىپ جاتقان ازاماتتاردىڭ ءىسى نەمەن اياقتالاتىنى ازىرگە بەلگىسىز. ءبىراق ءدال ءقازىر ءبىر نارسە انىق. "قر تۇڭعىش پرەزيدەنتى-ەلباسى تۋرالى" كونستيتۋسيالىق زاڭىن ورىنداۋعا جانە ونىڭ كۇشىن ساقتاۋعا نازارباەۆ اۋلەتى عانا ەمەس, قازىرگى رەجيمگە قىزمەت ەتۋ ارقىلى "فوربسقا" كىرگەن وليگارحتار, ساياسي جانە بيزنەس "ەليتا" اتانعاندار, شاش ال دەسە, باس الاتىن "قۇقىق قورعاۋ" ورگاندارىنىڭ وكىلدەرى, مەدال مەن وردەن ءۇشىن جارالعان "قوعام قايراتكەرلەرى", پايداسىنان زيانى كوپ "زيالى قاۋىم" وكىلدەرى جانە جاعىمپازدىق, جەمقورلىق, كوزبوياۋشىلىق پەن نەپوتيزمسىز ءومىرىن ەلەستە المايتىن ادامداردىڭ ءبارى مۇددەلى.

وزىنە وتىز جىل بويى ءتيىمدى بولعان ويىن ەرەجەسىنىڭ وزگەرگەنىن وسىلاردىڭ ەشقايسىسى قالامايدى. سول ءۇشىن ىشتەن دە, سىرتتان دا وزگەرىس تۋرالى وي ويلاعان, ءسوز ايتقان ادامنىڭ ءبارىن ايامايدى. ؛#bizbirgemiz ؛دەپ ولار وتىرىك ايتىپ جۇرگەن جوق. ولار شىنىمەن بىرگە.

"مەن قر ازاماتىمىن" دەپ ايتۋعا قورقاتىنداي بەيشارا كۇيگە قالاي جەتتىك؟ مەنىڭ ويىمشا, ونىڭ جاۋابى ساياسي بەلسەندى ا.يلياشەۆتىڭ "قۇداي جانە كونستيتۋسيا ءبىزدىڭ جاعىمىزدا" دەگەن سوزىندە جاتىر.

تاۋەلسىزدىك جىلدارىنان بەرى اۋزىمىزدان قۇدايدىڭ اتى مەن كونستيتۋسيا دەگەن ءسوز تۇسكەن ەمەس. ءبىراق ىسىمىزبەن قۇدايمەن دە, كونستيتۋسيامەن دە بىرگە بولا الماي كەلە جاتىرمىز. جىل ساناپ عيبادات ورىندارى مەن دىنگە سەنۋشىلەردىڭ سانى وسكەنىمەن, قۇدايعا جاقىنداي المادىق. ادىلەتتىڭ جولىمەن قۇدايعا قاراي ءجۇرۋدىڭ ورنىنا, ۇيالماي قۇدايدىڭ نەسىبەسى دەپ جەمقورلىق پەن ادىلەتسىزدىكتى نورما ەتتىك. ەڭ سوراقىسى, قۇدايمەن بىرگە بولۋدى "شۇكىر" مەن "پاتشاعا باعىنۋ" دەگەن دۇمشە تۇسىنىككە كۇرمەپ بايلاپ قويدىق.

كونستيتۋسيامەن دە ەشقاشان بىرگە بولمادىق. كونستيتۋسيانى وزىمىزگە يكەمدەپ, اتا زاڭ دەپ اتادىق. ءبىر ەمەس, ەكى رەت كونستيتۋسيانى قابىلداپ تاستادىق. ودان كەيىن ءبىزدىڭ قاتىسۋىمسىز سانىنان بيلىكتىڭ ءوزى جاڭىلىساتىن وزگەرىستەر مەن تولىقتىرۋلار ەنگىزىلدى. "كونستيتۋسياداعى وزگەرىستەر تۋرالى نە ويلايسىڭدار؟" دەپ ولار بىزدەن سۇرامادى. ء"اي, كونستيتۋسيانى نە ىستەپ جاتىرسىڭدار؟" دەپ ءبىز دە سۇرامادىق. راسىمەن دە, 80-گە كەلگەن كىسىنى اتا دەيتىن بولساق, 18 ميلليون ازاماتتىڭ قۇقىعىن قورعاۋى ءتيىس كونستيتۋسيانى ءاپ ساتتە اتانىڭ جانە ونىڭ اينالاسىنىڭ مۇددەسىن قورعايتىن زاڭعا اينالدىرىپ بەردىك.

قۇدايمەن جانە كونستيتۋسيامەن بىرگە بولۋعا ءالى دە بولسا مۇمكىندىك بار ما؟

مەنىڭ ويىمشا, بار. ول ءۇشىن قۇدايعا قاراي اقيقاتتىڭ جولىمەن ءجۇرىپ, قورىقپاي اقتى اق, قارانى قارا دەپ ايتۋعا تەز ارادا كوشۋىمىز كەرەك. ول ءۇشىن وتىرىككە تۇنشىعىپ قالعان ازاماتتىق ار-نامىسىمىزدى سىلكىپ وياتۋىمىز كەرەك. ول ءۇشىن ءدال ءقازىر كونستيتۋسيالىق قۇقىعى تاپتالىپ جاتقان وتانداستىرىمىزدىڭ ساياسي جەلەۋمەن سوتتالۋىنا جول بەرمەۋىمىز كەرەك. ول ءۇشىن بيلىكتى سىناعانى ءۇشىن قۋدالانىپ جاتقان, ءالى ءىستى بولاتىن ازاماتتاردى جەكە تانۋىمىز مىندەتتى ەمەس. ويتكەنى ءدىني جانە ساياسي سەنىمىنە, جاسى مەن جىنىسىنا قاراماي جانى وزگەرىستى قالايتىن قازاقستاندىقتاردىڭ ءبارى مىنا "بولوتودا" بىرگە. ارى قاراي بىرگە باتۋ دا, "بولوتودان" بىرگە شىعۋ دا ءوز قولىمىزدا.

"بولوتوعا" باتپاس ءۇشىن ءدال قازىردەن باستاپ ساياسات ماعان قىزىق ەمەس دەگەن ويدان ارىلۋىمىز كەرەك. ساياسات ءقازىر سىزگە قىزىق بولماسا, ەرتەڭ سالىعىڭىزدان ايلىق الىپ وتىرعان پوليسيا ءسىزدى نەمەسە ءسىزدىڭ جاقىنىڭىزدى ەش سەبەپسىز سيزو-عا اپارىپ تىققاندا ساياساتقا قىزىعۋىڭىز مۇمكىن. ءبىراق ول كەزدە تىم كەش بولۋى مۇمكىن.

شالقار نۇرسەيىتوۆ,

ساياساتتانۋشى

facebook پاراقشاسىنان

 ؛