«شالەم كازاحيستان»: بالانى ۇكىمەت ساتادى, دارىگەرلەر سوتتالادى

  وسى كۇنى قازاقستان تەلەارنالارىن  كورەتىنىمىز «شەت ەلدەگى قازاق بالالارى» دەگەن  ايدارمەن بەرىلەتىن «ساتىلىپ» كەتكەن بالالاردىڭ ءومىرى جايلى تەلەحابار.

        ۇكىمەتىمىز  مۇحيت اسىرىپ شەتەلگە بالا ساتۋدا (سوڭعى دەرەكتەر ون مىڭنان استى دەلىنىپ ءجۇر). ءبىز ءتىپتى ۇلكەن پارلامەنت مىنبەرىنەن ءبىلىم جانە عىلىم ءمينيسترى ج.تۇيمەباەۆتىڭ قازاق بالالارىن امەريكاندىقتار كوپتەپ ساتىپ الۋدا دەپ ماقتانعانىندا ەستىدىك.

       16 ماۋسىم 2015 جىل. قازاقستان تەلە ارنالارىنىڭ سوڭعى جاڭالىقتارىنىڭ بارلىعى دەرلىك وڭتۇستىك قازاقستانداعى (شىمكەنت) ءبىر اۋرۋحانا (پەرزەنتحانا) دارىگەرلەرىنىڭ وزگە دە دەلدالدىق ەتۋشىلەرمەن بىرگە بىرنەشە بالانى ساتقاندارى جايلى حابار تاراتتى. سوڭعى جىلدارى  بۇنداي جاعدايلاردىڭ ەلىمىزدىڭ كوپتەگەن وبلىستارىندا ورىن الىپ جۇرگەندەرى جايلى حابارلاردىڭ جاريالانىپ جۇرگەنىن بارىمىزدە ەستىپ جۇرگەن بولارمىز.

        وزدەرىڭىز كورىپ وتىرعانداي ۇكىمەتىمىز بالا ساتقان سوڭ قالعاندارى قالسىن با؟ «اق حالاتتى ابزال جاندارىمىز دا» سولارمەن جارىسقا تۇسكەن. ايىرماسى ۇكىمەتتى ەشكىم سوتتامايدى, ال بالا ساتقىش «ابزال جاندارىمىز» تۇرمەنىڭ قاق تورىنە ءبىر-اق توعىتىلادى.

        ەلىنە جانى اشيتىن, ۇلتىنىڭ بولاشاعىن ويلاعان جاندار بۇندايعا جول بەرمەس ەدى. بالا ساتۋ قازاقتىڭ قانىندا جوق نارسە. اتا-بابالارىمىز ەش ۋاقىتتا جەسىرى مەن جەتىمىن جىلاتپاعان. شاماسى, قازىرگى ءبىزدىڭ دەنەمىزدەگى قان ەمەس, سۋعا اينالىپ كەتكەن سىڭايلى. سەبەبى, بۇرىن جەتىم نارەستەلەردى بالالار ۇيىنە وتكىزدى دەسە قۇلاققا سۋىق ەستىلىپ, دەنەمىز تۇرشىگۋشى ەدى. ءقازىر قازاقتىڭ قارا دومالاقتارىنىڭ, شەتەلگە زات ەسەبىندە اقشاعا ساتىلۋىنا دا ەتىمىز ۇيرەنىپ كەتكەن. سەلت ەتپەيمىز. بۇنىڭ جالعىز سەبەبى, ورىس ءتىلدى بيلىكتىڭ قازاق ۇلتىن ء(سالت-داستۇر, ادەت-عۇرپىن, ءدىلىن, ءدىنىن, ءتىلىن) مويىنداماۋىنان, ۇلتتىق تاربيەنىڭ, ۇلتتىق نامىستىڭ جوقتىعىنان دەگەننەن باسقا لاجىمىز جوق. بۇل قازاقتى وسىرۋگە ەمەس, وشىرۋگە اپاراتىن تىكە جول. بالاسىن ساتقان قازاق ەرتەڭ اتاسىن دا, اناسىن دا, وعان قوسا وتانىن دا ساتپايدى دەپ كىم كەپىلدىك بەرە الادى؟ ۇرانىمىز - اقشا, اقشا! تاعى دا اقشا! «العا قازاقستان» دەپ شاپقىلاپ ءجۇرمىز.

       ەستيتىنىمىز سول بالالاردىڭ «شالەم كازاحيستان» دەپ شۇلدىرلەگەندەرى. ولاردىڭ بار بىلەتىن قازاقشاسى تەك قانا وسى «شالەم كازاحيستان» دەگەن ءبىر اۋىز ءسوز. وسىنى كورگەن سايىن كوڭىلىم الەم-جالەم. وسى حاباردى كۇندە بەرەتىن قازاقستان تەلەارنالارىنا بىردە رەنجيمىن, بىردە جۋرناليستەرگە ريزا بولامىن. رەنجيتىنىم مەن جانە مەن سياقتى كوپتەگەن قازاق ازاماتتارىنىڭ «جاراسىنىڭ» اۋزىن كۇندە تىرناپ قاناتا بەرەتىنى. جارامنىڭ اۋزى قاناعان سايىن مەنىڭ قازاقستاننىڭ ورىس ءتىلدى بيلىگىنە دەگەن نارازىلىعىم دا كۇن ساناپ ارتىپ كەلەدى. كەيدە جاتا قالىپ سەندەردىڭ ءبارىڭ ەلگە بەيبارىس سۇلتان سياقتى قازاقتىڭ ۇلى ازاماتى بولىپ ورالساڭدار ەكەن دەپ ارماندايمىن. ازىرگە قولىمىزدان بار كەلگەنى وسى بولىپ تۇر.  شالەم كازاحيستان!

 قوجىربايۇلى مۇحامبەتكارىم

ماڭعىستاۋ