ايەل بەس جاسار بالانى كولىكپەن قاعىپ كەتكەن

الماتى وبلىسىندا ايەل بەس جاسار بالانى كولىكپەن قاعىپ ءولتىردى. ؛قايتىس بولعان بالانىڭ تۋىسىنىڭ ايتۋىنشا, قايعىلى وقيعا 10 مامىردا كۇندىزگى ساعات 4-تەر شاماسىندا مارقۇم بالا تۇراتىن سايماساي اۋىلىنداعى ءۇيدىڭ ماڭىندا بولعان.

"بالا جول جيەگىندەگى قۇمدا ويناپ وتىرعان. ول جىلدام كەلە جاتقان, ونىڭ ۇستىنە تەلفون قاراپ وتىرعان. ول ءدال بالا وتىرعان جەرگە جول جيەگىنە شىعىپ قاعىپ كەتكەن! سوسىن ول وقيعا ورنىنان كەتىپ قالماقشى بولعان, كورشىلەردىڭ بالالارى مۇنىڭ ءبارىن كورگەن, ونى سولار توقتاتتى. وقيعادان كەيىن ول كولىكتەن دە تۇسپەدى", - دەيدى زارينا قامباروۆا.

تۋىستارىنىڭ ايتۋىنشا, بالا بىردەن مەرت بولعان. الايدا جول اپاتىنان كەيىن ايەلدى ەشكىم ۇستامادى, دەيدى ولار.

"ول ءتىپتى اتا-اناسىنا دا كەلمەدى, كەشىرىم سۇرامادى. ول كىناسىن مويىندامايدى. جول-كولىك وقيعاسىنان كەيىن ونى ەشكىم ساراپتاماعا اپارعان جوق. قىزمەتكەرلەر كولىكتەگى قاندى ءسۇرتىپ تاستاعان, بالانىڭ اياق كيىمدەرىن مۇلدەم باسقا جاققا اپارىپ قويعان. جول شەتىندە ەمەس, جولدا بولعانداي ەتىپ سىزىپ قويعان", - دەدى قايتىس بولعان بالانىڭ تاتەسى.

ولاردىڭ ايتۋىنشا, كولىك جۇرگىزگەن ايەل مەكتەپتە ءمۇعالىم بولىپ جۇمىس ىستەيدى.

الماتى وبلىسىنىڭ پوليسيا دەپارتامەنتى 10 مامىردا سايماساي اۋىلىندا ادام ولىمىمەن اياقتالعان جول-كولىك وقيعاسى بولعانىن راستادى.

"opel astra كولىگىنىڭ جۇرگىزۋشىسى جولعا جۇگىرىپ شىققان بالانى قاعىپ كەتتى. كامەلەتكە تولماعان بالا ەسىن جيماي, اۋرۋحانانىڭ جانساقتاۋ بولىمىندە كوز جۇمدى. كولىك جۇرگىزۋشىسى ۋاقىتشا ۇستاۋ يزولياتورىنا قامالدى", - دەپ حابارلادى پوليسيا.

جول-كولىك وقيعاسىنا قاتىستى قىلمىستىق ءىس قوزعالدى. قاجەتتى ساراپتامالار تاعايىندالدى.