23 اقپان, 2024 بارلىق ايماقتار
“دۋماننىڭ سوتى قۇپيا بولاتىنداي ول اسكەري ادام ەمەس”
ءماجىلىس دەپۋتاتى ەرمۇرات باپي جۋرناليست دۋمان مۇحامەدكارىمنىڭ سوتىنىڭ جابىق وتۋىنە قاتىستى پىكىرىن ءبىلدىردى.
![](/media/2024/02/23/crop-29_22_652x869_658beb88ac3b5033720253-1.jpg?width=600&height=480)
فوتو: ulysmedia.kz
ماجىلىس دەپۋتاتى ەرمۇرات باپي qamshy.kz-تىڭ «؛دۋماننىڭ سوتى نەگە جابىق وتەدى؟ ونىڭ ىسىندە مەملەكەتتىك قۇپيا بار ما؟»؛ دەگەن سۇراعىنا:
&ndash؛ مەملەكەتتىك سوت قانداي نەگىزدى ەسەپكە الىپ تۇرعانىن بىلمەيمىن. ول ەندى سوتتىڭ الدەبىر زاڭدارعا, نە ءبىر نەگىزدەرگە سۇيەنگەن شەشىمى بولۋى مۇمكىن. قالاي بولعاندا دا, سوت ءبىر قۇپيانى ساقتاۋدىڭ امالىن جاساپ جاتىر دەپ ويلايمىن. ءبىراق سوتتىڭ ناقتى قانداي نەگىزدى العانىنان حابارسىزبىن. ال جورامالداپ ايتسام, بالكىم, سوت بارىسىندا دۋمان مەن مۇحتار ءابليازوۆتىڭ اراسىنداعى تەلەفونمەن اڭگىمەلەرى تىڭدالاتىن بولۋى مۇمكىن. بۇل مەنىڭ جورامالىم. بىرىنشىدەن, تەلەفون تىڭدالعان بولسا, ونداعى اڭگىمەلەردە ايتىلعان ماسەلەنى قوعام قابىلداماي, مويىنداماۋى مۇمكىن. ەكىنشىدەن, ەكسترەميستىك ۇيىمداردى قارجىلاندىرۋعا ارالاستى دەگەن تالاپتى دالەلدەۋى كەرەك. ياعني, اۋدارىلعان شوتتار, ەسەپتەر وسى تەرگەۋدە پروكۋراتۋراعا پروبلەما بولۋى مۇمكىن. سول سەبەپتەن دە سوت جابىق شىعار. باسقا ءۋاجىم جوق.
نەگىزى, دۋماننىڭ سوتى قۇپيا بولاتىنداي ول نە اسكەري ادام ەمەس, نە الدەبىر قىزمەتتىڭ قۇپيا مۇشەسى ەمەس. تەرگەۋ بارىسىندا شىققان ءبىر كىناراتتاردى قالاي دا قالقالاپ قالۋدىڭ ءبىر امالى شىعار. ەكسترەميستىك ۇيىمدى قارجىلاندىرۋعا قاتىستى اڭگىمەنىڭ مازمۇنى قوعامنىڭ قۇلاعىنا قونبايتىن شىعار دەپ ويلايمىن.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
ۇسىنىلعاندار
پىكىر قالدىرۋ
پىكىر