20 اقپان, 2024 بارلىق ايماقتار
جاڭا مينيستر ەلىمىزدەگى دامبىلار ادام ومىرىنە ءقاۋىپ ءتوندىرىپ وتىرعانىن مويىندادى
توتەنشە جاعدايلار ءمينيسترى شىڭعىس ءارىنوۆ بۇگىنگى ۇكىمەت وتىرىسىندا قازاقستانداعى گيدروتەحنيكالىق قۇرىلىستاردىڭ (دامبى مەن سۋ بوگەتتەرى) جاي-كۇيى ءماز ەمەس ەكەنىن مويىنداپ, بۇل رەتتەگى ءقاۋىپتى جوققا شىعارا المادى.
قر تجم ءباسپاسوز قىزمەتى
مينيستر سوڭعى جىلدارى قازاقستاندا گيدروتەحنيكالىق قۇرىلىستارعا ءتيىستى كوڭىل بولىنبەي كەلە جاتقانىن, سونىڭ سالدارىنان دامبىلاردىڭ جارىلۋى, سۋ بوگەتتەرىنىڭ بۇزىلۋى ەلدىمەكەندەرگە ءقاۋىپ ءتوندىرۋى مۇمكىن ەكەنىن ايتتى. ول جوندەۋ جۇمىستارى جىلدا جۇرگىزىلەتىنىن, الايدا بۇل رەتتە تەك رەسپۋبليكالىق نىساندار نازارعا الىناتىنىن, ال كوممۋنالدىق نىساندار كوپتەگەن جىل بويى ەلەۋسىز قالىپ كەلە جاتقانىن جەتكىزدى. ؛
"304 گيدروتەحنيكالىق قۇرىلىمنىڭ ادام ومىرىنە تىكەلەي ءقاۋپى بار. ونىڭ 216 نەمەسە 71 پايىزىندا جەرگىلىكتى حابارلاۋ جۇيەسى ورناتىلماعان. ولار جارىلسا, 2010 جىلعى الماتى وبلىسىندا جانە 2014 جىلعى قاراعاندى وبلىسىنداعىداي ادام شىعىندارىنا اكەلىپ سوعۋى ابدەن ىقتيمال", دەيدى مينيستر.
سۋ رەسۋرستارى جانە يرريگاسيا مينيسترلىگىنىڭ مالىمەتىنشە, قازاقستاندا 1500-دەن استام گيدروتەحنيكالىق نىسان بار, ونىڭ جارتىسىنا جۋىعى جوندەۋدى قاجەت ەتەدى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
ۇسىنىلعاندار
پىكىر قالدىرۋ
پىكىر