20 اقپان, 2024 بارلىق ايماقتار
وزبەكستاندا بوكستان توپ جارىپ جۇرگەن قازاق جىگىت ەلگە ورالدى
ول كسرو كەزىندە قىزىلوردا وبلىسىنا قاراستى بولعان, ودان سوڭ شەكارا بولگەندە وزبەكستانعا ءوتىپ كەتكەن تاۋەلىباي اۋىلىندا دۇنيەگە كەلىپتى.
ۆيدەودان الىندى
وزبەكستان رەسپۋبليكاسىنىڭ بوكستان 2023 جىلعى چەمپيوناتىنىڭ قولا جۇلدەگەرى امان قونىسبەكوۆ قازاقستانعا قونىس اۋداردى. 71 كەلىگە دەيىنگى سالماقتا ونەر كورسەتەتىن قانداسىمىز استانا قالاسىنا كوشىپ كەلدى. ول قازىرگى كەزدە ەلوردادا اعاسىمەن بىرگە تۇرىپ جاتىر. ال بوكستان جارىستارعا تۇركىستان وبلىسىنىڭ اتىنان قاتىسادى, دەلىنگەن ينستاگرامداعى kazakhboxing پاراقشاسىندا.
امان وتاندىق بىلعارى قولعاپ شەبەرلەرىمەن بۇگىن الماتىداعى وقۋ-جاتتىعۋ جيىندارىندا ءجۇر.
ايتا كەتەيىك, قونىسبەكوۆ بىلتىر وزبەكستان چەمپيوناتىنىڭ جارتىلاي فينالىندا الەم چەمپيونى اسادحۋجا مۋيدينحۋجاەۆپەن كەزدەسكەن. سول كەزدە ءۇش راۋند قورىتىندىسى بويىنشا مۋيدينحۋجاەۆ تورەشىلەردىڭ بولەك شەشىمىمەن جەڭىسكە جەتتى. دەگەنمەن, سول داۋلى كەزدەسۋدىڭ ءبىرىنشى راۋندىندا قونىسبەكوۆ قارسىلاسىن ءبىر رەت نوكداۋنعا تۇسىرگەنىن ەسكە سالا كەتەيىك.
امان باۋرىمىز وزبەكستاننىڭ ناۆاي وبلىسى, كەنىمەح قالاسى, زافاراباد اۋىلىندا تۋعان. بۋحارادا ۋنيۆەرسيتەتتە وقىپ, جاتتىعۋ جاساعان.
سپورتشىنىڭ تۋىپ-وسكەن جەرى تاۋەلىباي دەپ اتالعان بۇرىندا. كەنىمەح, زافاراباد, زارافشان, ۇششقۇدۇق, تامدى دەگەن جەرلەر. قىزىلوردا وبلىسىنا قاراستى بولعان كسرو كەزىندە, ودان سوڭ وزبەكستانعا ءوتىپ كەتكەن.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر