فوتو: شقو اقپارات اگەنتىگى
شىعىس قازاقستان وبلىسىنىڭ اكىمشىلىك ورتالىعىندا قالالار مەن اۋدانداردىڭ قورعانىس ىستەرى جونىندەگى باسقارمالارى مەن بولىمدەرىنىڭ قىزمەتىن باعالاي وتىرىپ, 2022 جىلعى كوكتەمگى شاقىرۋ ناۋقانىن وتكىزۋ قورىتىندىلارى بويىنشا كەڭەس ءوتتى.
جيىن بارىسىندا وڭىردە 20 شاقىرۋ ۋچاسكەسى مەن 340 مىڭنان استام مەديسينا قىزمەتكەرى جۇمىس ىستەيتىنىن, ءبىراق مەديسينا كادرلارىنىڭ تاپشىلىعى بار ەكەندىگىن اتاپ ءوتتى.
وسكەمەن گارنيزونىنىڭ اسكەري پروكۋرورى جانبولات اەكەنوۆتىڭ ايتۋىنشا, شاقىرۋ ساپاسى مەديسينالىق كوميسسيانىڭ جۇمىسىنا تىكەلەي بايلانىستى.
- قورعانىس ىستەرى جونىندەگى دەپارتامەنتتىڭ مالىمەتتەرىنە سايكەس, وبلىستىق جيىن پۋنكتىندە دارىگەرلەردىڭ بولماۋى ءالى دە وزەكتى. سونداي-اق بارلىق اۋدانداردا مەديسينالىق تەكسەرۋگە ارنالعان قالىپتى كابينەتتەر جوق. بارلىق باسشىلار الداعى كۇزگى اسكەرگە شاقىرۋ شارالارىن قابىلداپ, ساپالى جانە ۋاقىتىلى بولۋىن قامتاماسىز ەتۋى قاجەت, - دەپ اتاپ ءوتتى جانبولات اەكەنوۆ.
سونىمەن قاتار, ول قازىرگى ۋاقىتتا وبلىس اكىمى اپپاراتىنىڭ "شقو جۇمىلدىرۋ دايىندىعى مەن جۇمىلدىرۋدى قامتاماسىز ەتۋ قىزمەتىن" تەكسەرۋ باستالعانىن, ونى بارلىق اۋدانداردا وتكىزۋ جوسپارلانعانىن ايتتى. ###
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر