29 اقپان, 2024 الەۋمەت وزگەرتۋ

بيىل قىس قاتتى. جۇتتان جىلقى قىرىلىپ جاتىر

اقمولا وبلىسىنىڭ ءتورت اۋدانىندا مال اشتان قىرىلىپ جاتىر.

ۆيدەودان كادر

اقمولا وبلىسىنىڭ ءبىرجان سال اۋدانىندا جىلقى قىرىلىپ جاتىر. قىستاقتاعى مالدى اۋىلعا جەتكىزۋگە جول جوق. بەلۋاردان كەلەتىن قالىڭ قار قىستا جاۋعان جاڭبىردان سىرەسىپ قاتىپ قالعان. سول سەبەپتى تەبىندەگى جىلقى ازىق تاپپاي اشتان ءولىپ جاتىر, دەپ حابالادى كتك تەلەارناسى.

مالىنان ايىرىلعان شاراسىز شارۋالار اكىم-قارالارعا جالىنىپ, كومەك سۇراپ وتىر.

&ndash؛ سىزدەردەن كومەك سۇرايمىز. وبلىس اپپاراتى, نەگە توتەنشە جاعداي جاريالاماسقا, مىنا جاققا تەحنيكا جىبەرۋگە بولمايدى, تىم بولماعاندا جولداردى اشىپ بەرگەندە. اقشا, ازىق سۇراپ جاتقان جوقپىز. ءوزىمىز ساتىپ الامىز. قانشاما حالىقتىڭ مالى بار. بيىل قىس سونداي قاتتى بولىپ جاتىر. جالعىز مەندە ەمەس, كورشى اۋىلداردىڭ بارىندە مال قىرىلىپ جاتىر, &ndash؛ دەيدى شارۋا قايرات بەگالين.

تۇياعىمەن تارپىپ جەردەن ازىعىن تاباتىن جۇمىر تۇياقتىلاردىڭ بيىل قار قارپىعاننان باسقا امالى بولماپتى. قار قالىڭ تۇسكەنىمەن قويماي, جاڭبىردان سوڭ ۇسكىرىك اياز اينالانى كوك مۇزعا اينالدىرعان.

ماسەلەن, اڭعال باتىر اۋىلىنان 20 شاقىرىم جەردە عانا جايىلعان جىلقىنى اۋىلعا جەتكىزۋگە جول جوق. ابدەن اشىققان مال كوتەرەم بولىپ قۇلاپ, قار استىندا قالعان. بيەلەر قۇلىن تاستاپ, ءتول باسى كەمي تۇسكەن.

ال ءبىرجان سال اۋدانىنىڭ اكىمى ءبىر ەمەس, ەكى رەت جول اشتىق دەپ وتىر.

قىرىلعان جىلقى اۋرۋدان ەمەس, اشتان ءولىپ جاتقانىن مال دارىگەرلەرى دە راستايدى:

&ndash؛ مال شىعىنى بار ەكەنى راس. ول ءبىزدىڭ 4 اۋداندا تىركەلىپ وتىر. ءبىزدىڭ مالىمەتىمىز بويىنشا, مال شىعىنى 200 باستان اسىپ كەتتى. ەشقانداي اۋرۋدىڭ بەلگىسى جوق. مال اشتان قىرىلىپ جاتىر. ونى ساراپتاما جۇزىندە دالەلدەپ بەرە الامىز. مال اشتان قىرىلىپ جاتىر. سويعاندا قارىندارىندا قاردان باسقا ەشتەڭە جوق, ؛&ndash؛ دەيدى اقمولا وبلىسى ۆەتەريناريا باسقارماسىنىڭ باسشىسى تالعات ءجۇنىسوۆ.

"قامشى" سىلتەيدى