پرەزيدەنت نازارباەۆتى كىمدەر قۇتتىقتادى؟

كۇنى كەشە عانا قر تۇڭعىش پرەزيدەنتى نۇرسۇلتان ءابىشۇلى مەرەيلى 75 جاسقا تولعان بولاتىن.  ادەتتەگىدەي ەلباسى تۋعان كۇنىن الەم كوشباسشىلارى دا نازاردان تىس قالدىرماعان. 6-شىلدە كۇنى يسپانيا كورولى vi فەليپە مەن يسپانيا ۇكىمەتىنىڭ ءتوراعاسى ماريانو راحوي قازاقستان پرەزيدەنتى نۇرسۇلتان نازارباەۆتى تۋعان كۇنىمەن قۇتتىقتاپ, جەدەل حات جولداسا, تۇركيانىڭ بۇرىنعى پرەزيدەنتى ابدۋللاح گۇل مەن قىرعىزستاننىڭ پرەزيدەنتى المازبەك اتامباەۆ مىرزالار ارنايى كەلىپ, ەلباسىنىڭ قۋانىشىمەن بولىسكەن. بۇل تۋرالى اقوردانىڭ ءباسپاسوز قىزمەتى حابارلايدى. بۇل پرەزيدەنتتىڭ اتىنا كەلىپ تۇسكەن قۇتتىقتاۋدىڭ سوڭعىسى ەمەس, ارينە. سونىمەن, ەلباسىن مەرەي تويىمەن كىمدەر قۇتتىقتادى؟ «قامشى» پورتالى حالىقارالىق قۇتتىقتاۋلاردىڭ ءبىرقاتارىن نازارلارىڭىزعا ۇسىنادى.

1. سي سزينپين, قحر ءتوراعاسى. ءوزىنىڭ قۇتتىقتاۋ حاتىندا قحر ءتوراعاسى قازاقستان مەن قىتاي اراسىنداعى ىنتىماقتاستىقتىڭ ينتەنسيۆتى ءارى قارقىندى دامۋىن ءسوز ەتكەن. «ەكى ەل اراسىنداعى بايلانىس ءسىزدىڭ كورەگەن ساياساتىڭىزدىڭ جەمىسى دەپ بىلەمىن. سونداي-اق, ءسىزدى ۋفا قالاسىندا وتەتىن شىۇ سامميتىندە اسىعا كۇتەمىن»,-دەگەن سي سزينپين مىرزا.
2. يلحام اليەۆ, ءازىربايجان پرەزيدەنتى. اليەۆ مىرزا دا ەكى ەلدىڭ اراسىنداعى ىنتىماقتاستىقتى, قارقىندى دامۋ كەزەڭىندەگى قارىم-قاتىناستىردى تىلگە تيەك ەتە كەلە, پرەزيدەنت نازارباەۆتى مەرەيلى 75 جاسىمەن قۇتتىقتاپ, زور دەنساۋلىق تىلەگەن. «الەمدە قازاقستان دەسە, ءبىرىنشى ءسىزدىڭ ەسىمىڭىز ايتىلادى. وسى جىلدار بويى ءسىزدىڭ كورەگەن ساياساتىڭىز بەن باسشىلىعىڭىزدىڭ ارقاسىندا قازاقستان حالىقارالىق ارەنادا جوعارى بەدەلگە يە بولدى. قازاقستان مەن ءازىربايجان اراسىنداعى بايلانىس ارتىپ قانا قويمساي, ول جىل سايىن نىعايىپ كەلەدى. وسى جولداعى ءسىزدىڭ ەڭبەگىڭىز ولشەۋسىز. بۇل ءسىزدىڭ ارقاڭىز. مەنىڭ شىنايى قۇتتىقتاۋىمدى قابىل العايسىز»,- دەگەن يلحام اليەۆ.
3. الەكساندر لۋكاشەنكو, بەلورۋسيا پرەزيدەنتى. «بەلورۋسيادا حالىق نازارباەۆتى الەمدىك دەڭگەيدەگى تالانتتى باسشى, ساياساتكەر رەتىندە تانيدى. ءسىزدىڭ بويىڭىزعا دارىعان ومىرلىك ەنەرگياڭىزدىڭ ارقاسىندا جىلدان-جىلعا جاقسارىپ وتىراسىز. ءسىز جاڭاشىلسىز ءارى باستاماشىلسىز. ءسىزدى حالقىڭىز تاريحتا اتىڭىزدى التىن ارىپپەن جازىپ قالدىرادى جانە قازاق حالقى ءسىزدى جوعارى باعالايدى. مەن الداعى ۋاقىتتاردا دا ەەو پەن قازاقستان-بەلورۋسيا اراسىنداعى بايلانىس نىعايا تۇسەدى دەپ سەنەمىن. سىزگە جانە قازاقستان حالقىنا جارقىن بولاشاق, جاڭا جەتىستىكتەر تىلەيمىن. شىن جۇرەكتەن قۇتتىقتاۋىمدى قابىل العايسىز»,-دەپتى ءوز قۇتتىقتاۋىندا وداقتاس ەلدىڭ باسشىسى.
4. المازبەك اتامباەۆ, قىرعىزستان پرەزيدەنتى. الاتاۋ اسىپ كەلگەن قىرعىز اعايىنداردىڭ وكىلى, قاراپايىم ەمەس-اۋ, پرەزيدەنتى المازبەك اتامباەۆ مىرزا دا قۇر كەلمەپتى. پرەزيدەنت نازارباەۆتىڭ داستارحانىنا قۇرمەتتى قوناق رەتىندە شاقىرىلعان سوڭ, ول دا قاراپ قالمادى. اقجارما تىلەگىن توكتى-اۋ كەلىپ. ء«سىزدىڭ ومىرلىك فيلوسوفياڭىز, باي تاجىربيەڭىز جانە ادامگەرشىلىگىڭىز ءسىزدىڭ ساياسي ارەناداعى بەدەلىڭىزدى ارتتىرادى جانە قازاقستاننىڭ جارقىن بولاشاعىنىڭ كەپىلى بولماق. باۋىرلاس ەلدىڭ اتىنان, قۇتتىقتاۋىمدى قابىل الىڭىز. ءسىز بىزگە بارلىق جاعىنان ۇلگى بولىپ كەلەسىز»,-دەدى اتامباەۆ مىرزا اقوردادا.
5. ەمومالي راحمون, تاجىكستان پرەزيدەنتى. ء«سىزدىڭ كوپۆەكتورلى ساياسي ۇستانىمىڭىز ءسىزدى الەم حالقى الدىندا ۇلكەن بەدەلگە جەتەلەدى. بۇگىندە ءسىزدى بۇكىل الەم باسشىلارى قۇرمەتتەيدى. قازاقستاننىڭ بارلىق جەتىستىكتەرى ءسىزدىڭ ەسىمىڭىزبەن تىكەلەي بايلانىستى. ءبىزدىڭ تاجىكستاندا حالىق ءسىزدى ۇستانىمىنا بەرىك, ەكى ەل اراسىنداعى ىنتىماقتاستىقتان وزگە باۋىرلاستىقتى نىعايتۋشى ۇلكەن ساياساتكەر رەتىندە تانيدى جانە قۇرمەتتەيدى. قۇتتىقتاۋىمدى قابىل الىڭىز پرەزيدەنت مىرزا!».
6. يسلام كاريموۆ, وزبەكستان پرەزيدەنتى. قازاق كوشباسشىسىنىڭ تۋعان كۇنىنە جەدەل قۇتتىقتاۋ حات جولداعان وزبەكستان پرەزيدەنتى يسلام كاريموۆ مىرزا, «وزبەكستانداعى ءاربىر ادام, ءاربىر ازامات قازاقستاننىڭ ءار جەتىستىگىنە  قۋانىپ وتىرادى. ءبىز باۋىرلاس مەملەكەتتەرمىز. سوندىقتان, ءبىزدىڭ ءاربىر جەتىستىگىمىز ورتاق. ءيا, قازاقستاندى ءسىزسىز ەلەستەتۋ مۇمكىن ەمەس تە شىعار.مەن ءسىزدىڭ ءار شەشىمىڭىزدى جاقسى قابىلدايمىن. ءارى ءارقاشان قولداۋ بىلدىرەمىن»,- دەگەن.
7. باراك وباما, اقش پرەزيدەنتى. «بارلىق امەريكا قالقى اتىنان ءسىزدى مەرەيلى 75 جاسىڭىزبەن قۇتتىقتايمىن. وسىنداي قۋانىشتى ءساتتى, ءوزىڭىزدىڭ وتباسىڭىزبەن, دوستارىڭىزدىڭ ورتاسىندا جاقسى وتكىزۋىڭىزگە تىلەكتەسپىن. مەن وزىڭىزگە اسا قۇرمەتپەن, ەكى ەلدىڭ اراسىنداعى ىنتىماقتاستىق قارىم-قاتىناستار بۇدان دا ارتاتىنىنا سەنىمدىمىن»,-دەگەن ءوزىنىڭ جەدەل قۇتتىقتاۋ حاتىندا وباما.
8. ۆلاديمير پۋتين, رف پرەزيدەنتى. ال ءپۋتيننىڭ نۇرسۇلتان نازارباەۆقا قۇتتىقتاۋ جەدەلحاتىندا رەسەي پرەزيدەنتى نۇرسۇلتان نازارباەۆتىڭ وتانداستارىنىڭ شىنايى قۇرمەتىنە بولەنگەنىن, سونداي-اق پاراساتتى ءارى تاجىريبەلى ساياساتكەر, ءوز ەلىنىڭ ناعىز كوشباسشىسى رەتىندە جوعارى حالىقارالىق بەدەلگە يە ەكەنىن اتاپ وتكەن.

پۋتين سونىمەن بىرگە, قازاقستان تاريحىنداعى الەۋمەتتىك, ەكونوميكالىق جانە سىرتقى ساياسي جەتىستىكتەرگە تولى تۇتاس ءبىر كەزەڭنىڭ ن.نازارباەۆتىڭ ەسىمىمەن بايلانىستى ەكەنىن اتاپ ءوتتى. پۋتين نۇرسۇلتان نازارباەۆتىڭ رەسەي مەن قازاقستان اراسىنداعى ستراتەگيالىق ارىپتەستىك پەن وداقتاستىقتى نىعايتۋعا قوسقان ۇلكەن ۇلەسىنە دە توقتالىپ وتكەن.