بولات باقاۋوۆ, پاۆلودار وبلىسىنىڭ اكىمى: حالىقتىڭ تابىسىن ارتتىرۋعا كۇش سالامىن

پرەزيدەنت توقاەۆ facebook, twitter جەلىسى ارقىلى ەلدەگى وزەكتى ماسەلەلەردى جەدەل شەشۋگە باستى نازار اۋدارىپ وتىر. دەمەك, قوعامدا جوعارى بيلىكتە, پرەزيدەنت اكىمشىلىگىندە وزگەرىس بار. ال ايماقتاعى اتقامىنەر اكىمدەر وزگەردى مە؟ الدە ءالى دە سول بيۋروكراتيالىق جۇيەدە ءومىر ءسۇرىپ وتىر ما؟ حالىقتىڭ مۇڭ-مۇقتاجىنا, ماسەلەگە, ساۋالعا جەدەل جاۋاپ بەرە الا ما؟

qamshy.kz اقپارات اگەنتتىگى وسى ماسەلەنى زەرتتەۋ ماقساتىمەن ايماقتاعى 14 اكىم مەن رەسپۋبليكالىق ماڭىزى بار 3 قالانىڭ باسشىسىنا ساۋالدار جىبەردى. ءبىزدىڭ ساۋالدارعا ديالوگتان قاشپاي ەڭ ءبىرىنشى بولىپ جاۋاپ بەرگەن پاۆلودار وبلىسىنىڭ اكىمى بولات جۇمابەكۇلى باقاۋوۆ بولدى.

ەندى qamshy.kz اقپارات اگەنتتىگى ايماقتاعى الاڭداتقان ماسەلەلەرگە قاتىستى اكىمدەردىڭ جاۋابىن جاريالاي باستايدى.

العاشقى ءسوز كەزەگى &ndash؛ پاۆلودار وبلىسىنىڭ اكىمى بولات باقاۋوۆتا!

&ndash؛ پرەزيدەنت توقاەۆ قازىرگى ۋاقىتتا اكىمدەرگە ەرەكشە تالاپ قويدى. اكىمدەردىڭ حالىققا جاقىن بولۋىن ەسكەرتتى. بيۋروكراتيادان ارىلۋ كەرەك ەكەنىن ايتتى. ال ءسىز اكىم رەتىندە حالىققا قانشالىقتى جاقىنسىز؟

&ndash؛ ەل پرەزيدەنتى قاسىم-جومارت كەمەلۇلىنىڭ تاپسىرماسىن ورىنداۋ ماقساتىندا وبلىس باسشىسى رەتىندە تۇرعىندارمەن ءجيى كەزدەسىپ تۇرامىن. اسىرەسە, ازاماتتاردىڭ الەۋمەتتىك تۇرعىدان وسال توپتارىن &ndash؛ كوپبالالى انالاردى, مۇگەدەك بالا اسىراپ وتىرعان وتباسىلارىن, قامقورشىسىنان ايىرىلعان جانداردى قولداۋ ماقساتىندا ولارمەن ءجيى كەزدەسىپ, تالاپ-تىلەكتەرى مەن وتىنىشتەرىن مۇقيات زەردەلەپ وتىرامىن. ءار ايدىڭ بەيسەنبى كۇندەرى ازاماتتاردى قوعامدىق قابىلداۋ كەڭسەسى جۇمىس ىستەيدى. وبلىس اكىمى رەتىندە قابىلداۋعا جازىلعان ءاربىر ايماق تۇرعىنىنىڭ ماسەلەسىمەن تىكەلەي اينالىسىپ, الاڭداتقان ماسەلەلەردى تەزىرەك شەشۋگە تىرىسامىن.

&ndash؛ ال كوپبالالى انالاردىڭ, الەۋمەتتىك جاعىنان از قورعالعان توپتاردىڭ باسپانا ماسەلەسى وڭىردە قالاي شەشىلىپ جاتىر؟

&ndash؛ كوپبالالى انالاردى, الەۋمەتتىك جاعىنان از قورعالعان ازاماتتاردى باسپانامەن قامتاماسىز ەتۋ - اسا وزەكتى ماسەلە. اعىمداعى جىلدىڭ باسىنان پاۆلودار وبلىسىندا كوپبالالى جانە از قامتاماسىز ەتىلگەن وتباسىلاردان شىققان 243 وتباسى تۇرعىن ۇيمەن قامتاماسىز ەتىلدى.

&ndash؛ توقاەۆ حالىقپەن تىكەلەي بايلانىستى كۇشەيتۋ ءۇشىن الەۋمەتتىك جەلىنى پايدالانۋدى ۇسىندى. بۇل ورايدا ءسىز قانشالىقتى بەلسەندىسىز؟

&ndash؛ اقپارات اعىنى جوعارى قارقىنمەن داميتىن زاماندا الەۋمەتتىك جەلىلەردى قولدانۋ اسا ماڭىزدى. وبلىس اكىمنىڭ instagram الەۋمەتتىك جەلىسىندە @bbakauov لوگينىمەن تىركەلگەن جەكە اككاۋنتىم بار. ايماق باسشىسى رەتىندە ءوز پاراقشامدا وبلىستىڭ الەۋمەتتىك-ەكونوميكالىق دامۋىنا بايلانىستى جوسپارلارمەن, وڭىردە اتقارىلىپ جاتقان ماڭىزدى ىس-شارالارمەن ءبولىسىپ وتىرامىن. سونىمەن قاتار, كەز كەلگەن ءوڭىر تۇرعىنى دايرەكتكە جازۋ ارقىلى ءوزىنىڭ ءوتىنىشىن, تىلەكتەرىن بىلدىرە الادى. ازاماتتاردىڭ وتىنىشتەرىنە تولىق ءارى ناقتى جاۋاپتار قالدىرىپ, ءتيىستى مەملەكەتتىك ورگاندارعا ماسەلەنى جەدەل تۇردە شەشۋ جونىندە تاپسىرما بەرىلەدى. تۇرعىنداردىڭ ءاربىر ءوتىنىشى وبلىس اكىمىنىڭ جەكە باقىلاۋىندا تۇرادى.

&ndash؛ قازىرگى ۋاقىتتا الماتىدا, نۇر-سۇلتاندا, ارىستا, تەڭىز كەنىشىندە جانە تاعى باسقا وڭىرلەردە الەۋمەتتىك تەڭسىزدىككە بايلانىستى ءارتۇرلى نارازىلىق شەرۋى وتكەنى بەلگىلى. ال ءسىز ءوز ايماعىڭىزداعى جاعدايدان تولىق حاباردارسىز با؟ مۇنداي جاعداي ءسىز باسقارىپ وتىرعان وڭىردە دە قايتالانۋى دا مۇمكىن عوي...

&ndash؛ بۇگىنگى تاڭدا ەلىمىزدە ءتۇرلى نارازىلىق شەرۋلەرى وتكەنى بەلگىلى. جەرگىلىكتى اتقارۋشى ورگاندار تاراپىنان حالىقتىڭ وزەكتى ماسەلەلەرىن باقىلاۋدا ۇستاپ, قوعامدىق ءتارتىپتى قامتاماسىز ەتۋ ءۇشىن بارلىق جاعداي جاسالىنۋدا.

&ndash؛ ءسىز ءۇشىن قازىرگى ۋاقىتتا ايماق ءۇشىن باستى پروبلەما نە؟ ونى شەشۋدىڭ جولى قانداي؟

&ndash؛ حالىقتى تولعاندىراتىن نەگىزگى ماسەلەلەردىڭ ءبىرى - قورشاعان ورتانى قورعاۋ ماسەلەسى بولىپ وتىر. وسىعان وراي 2018 جىلدى پاۆلودار وبلىسىندا ەكولوگيا جىلى بولىپ جاريالادىق. ناتيجەسىندە ەكولوگيالىق جاعدايدى جاقسارتۋ جونىندەگى جوسپار ازىرلەندى. ونىڭ ىشىندە اتموسفەرانى قورعاۋ, بيوارتۇرلىلىك, ەنەرگيا ۇنەمدەۋ جانە ت.ب. باعىتتار بار. توقسان سايىن ونەركاسىپ كاسىپورىندارىنىڭ باسشىلارىن تارتىپ, ۇكىمەتتىك ەمەس ۇيىمدار جانە عالىمداردىڭ قاتىسۋىمەن ديالوگتىق الاڭشالار ۇيىمداستىرىلادى. وبلىستاعى بارلىق ءىرى كاسىپورىنداردىڭ باسشىلارى جۋرناليستەرگە ارناپ بريفينگتەر وتكىزدى. سونىمەن قاتار, زاماناۋي ەكولوگيالىق ءموبيلدى پوستىلار ىسكە قوسىلدى.

حالىق نازارىنداعى تاعى ءبىر ماسەلە &ndash؛ ميگراسيا. بارلىق الەمدە ءجۇرىپ جاتقان ۋربانيزاسيا پروسەسى ءبىزدى دە اينالىپ ءوتىپ جاتقان جوق. تۇرعىنداردىڭ, اسىرەسە جاستار اراسىندا نۇر-سۇلتان, الماتى سىندى ۇلكەن قالالارعا قونىس اۋدارۋ تەندەنسياسى بايقالادى. بۇل ماسەلەنى شەشۋ ماقساتىندا بىرنەشە باعدارلامالار قولعا الىنۋدا. مىسالى, وڭىرىمىزدە «؛نۇرلى ەرتىس»؛ باعدارلاماسى جۇزەگە اسىرىلۋدا, بۇل باعدارلاما ارقىلى ەلىمىزدىڭ ونتۇستىك ايماقتارىنان, نۇر-سۇلتان قالاسىنان, ەكىباستۇز قالاسىنا 103 كوپبالالى وتباسى قونىس اۋداردى. ەكىباستۇز قالاسىنا قونىس اۋدارعان بارلىق وتباسىلارعا پاتەر بەرىلىپ, جۇمىسپەن قامتىلدى. «؛سەرپىن»؛ باعدارلاماسى دا وڭىرىمىزدە 5 جىل قاتارىنان جۇزەگە اسىرىلۋدا. وبلىسىمىزعا كەلىپ, وقۋىن ءبىتىرىپ, جۇمىس جاساپ جاتقان جاستار دا از ەمەس. بۇل باعىتتا جۇمىس ودان ارى جالعاساتىن بولادى.

&ndash؛ پرەزيدەنت توقاەۆ تامىز ايىندا ۇلتتىق قوعامدىق كەڭەستىڭ العاشقى وتىرىسى بولاتىنىن جاريا ەتتى. الماتى قالاسىندا دا اكىمنىڭ جانىنان قۇرىلعان ارنايى قوعامدىق كەڭەس بار. مۇندا نەگىزىنەن تۇرعىنداردىڭ تالاپ-تىلەگى ايتىلىپ, مۇڭ-مۇقتاجى ەسكەرىلەدى. بۇل ورايدا ءسىز باسقارعان اكىمدىك حالىقتىڭ تالابىنا قانشالىقتى قۇلاق اسىپ وتىر؟

&ndash؛ جىل باسىنان بەرى 4 وبلىستىق, 37 قالالىق جانە اۋداندىق قوعامدىق كەڭەستەردىڭ وتىرىسى وتكىزىلدى, 134 نورماتيۆتىك-قۇقىقتىق اكتىلەرى بويىنشا ۇسىنىستار بەرىلدى, جەكە قابىلداۋدا 17 ءوتىنىش بەرۋشى قابىلداندى.

قوعامدىق كەڭەستەر جەرگىلىكتى پوليسيا قىزمەتى مەن باسقا دا مەملەكەتتىك ورگاندار باسشىلارىنىڭ قۇقىقتىق ءتارتىپتى قامتاماسىز ەتۋ, حالىققا مەملەكەتتىك قىزمەت كورسەتۋ جانە سىبايلاس جەمقورلىققا قارسى مادەنيەتتى قالىپتاستىرۋ جونىندەگى ەسەپتەرىن قارايدى. وتىرىسقا قوعامدىق بىرلەستىكتەر مەن بۇقارالىق اقپارات قۇرالدارىنىڭ وكىلدەرى, مەملەكەتتىك ورگانداردىڭ باسشىلارى جانە ساراپشىلار شاقىرىلادى. وتكىزىلگەن وتىرىستاردىڭ جانە مەملەكەتتىك ورگانداردىڭ قىزمەتىنە مونيتورينگ جۇرگىزۋدىڭ قورىتىندىلارى بويىنشا وبلىس اكىمىنىڭ اتىنا شارالار قابىلداۋ ءۇشىن ايماقتىڭ الەۋمەتتىك-ەكونوميكالىق ماسەلەلەرى بويىنشا قوعامدىق كەڭەستىڭ ۇسىنىمدارى جولدانادى.

قوعامدىق كەڭەستەردىڭ جۇمىسى تۋرالى ماتەريالدار ارنايى سايتتا ورنالاستىرىلادى.

&ndash؛ ءسىزدىڭ ايماقتاعى شەتەلدىكتەر باسقارۋعا العان ءوندىرىس ورىندارى مەن كاسىپورىنداعى وتاندىق جۇمىسشىلاردىڭ جاعدايى قالاي؟ ولارداعى جالاقى ايىرماشىلىعىنىڭ بار ەكەنى ءسىزدى الاڭداتپاي ما؟

&ndash؛ 2019 جىلعى قاڭتار-ماۋسىمدا 16 جۇمىس بەرۋشىنىڭ ءوتىنىشى بويىنشا شەتەلدىك جۇمىس كۇشىن تارتۋعا 55 ادامعا رۇقسات بەرىلدى, ونىڭ ىشىندە 2 سانات بويىنشا &ndash؛ 15, 3 سانات بويىنشا &ndash؛ 24, 4 سانات بويىنشا &ndash؛ 12, كورپوراتيۆىشىلىك اۋىستىرۋ شەڭبەرىندە &ndash؛ 4.

2018 جىلدان اۋىساتىنداردى ەسكەرە وتىرىپ, اعىمداعى جىلعى 28 ماۋسىمداعى جاعداي بويىنشا وبلىستا 15 جۇمىس بەرۋشىگە بەرىلگەن 110 رۇقساتناما بار, ونىڭ ىشىندە قۇرىلىستا &ndash؛ 40 ادام, تاۋ-كەن ونەركاسىبىندە جانە كارەرلەردى قازۋدا &ndash؛ 29, وڭدەۋ ونەركاسىبىندە &ndash؛ 37, تۇرۋ جانە تاماقتانۋ بويىنشا قىزمەتتەر &ndash؛ 3, ءبىلىم بەرۋ سالاسى بويىنشا &ndash؛ 1 ادام بار ەكەنىن ايتا كەتكەن ءجون. شەتەلدىك جۇمىس كۇشىن تارتاتىن كاسىپورىندارداعى الەۋمەتتىك-ەڭبەك جاعدايى تۇراقتى.

وبلىس اكىمدىگى ەڭبەك زاڭناماسىنىڭ, سونىڭ ىشىندە اتالعان كاسىپورىنداردا, بارىنشا ساقتالۋىنا تۇراقتى تۇردە باقىلاۋ جۇرگىزىپ وتىر. ازىرگە ەڭبەك جاعدايلارى, ەڭبەك سالاسىنداعى كەمسىتۋشىلىك, سونىڭ ىشىندە شەتەلدىك جانە قازاقستاندىق جۇمىسكەرلەر اراسىنداعى ەڭبەكاقى تولەۋدەگى سايكەسسىزدىك ماسەلەلەرى بويىنشا ارىزدار مەن وتىنىشتەر تۇسكەن جوق.

&ndash؛ ۇلتتىق, مەملەكەتتىك تاقىرىپ ماسەلەسى وتە وزەكتى, بۇل ورايدا رەسپۋبليكالىق دەڭگەيدەگى قازاق سايتتارى بەلسەندى جۇمىس ىستەۋدە. ال ءسىز باسقارعان اكىمشىلىك رەسپۋبليكالىق اۋقىمداعى قازاق سايتتارىمەن قانشالىقتى ماڭىزدى بايلانىس جاساپ وتىر؟

&ndash؛ پاۆلودار وبلىسىنىڭ اكىمدىگى رەسپۋبليكالىق قازاق سايتتارمەن تىعىز بايلانىستا جۇمىس جاسايدى. اعىمداعى جىلى www.dalanews.kz جانە www.elana.kz سايتتارىمەن مەملەكەتتىك تاپسىرىس اياسىندا جۇمىس اتقارىلۋدا.

&ndash؛ ءوز باسىڭىز قازاق ەلىنىڭ قازىرگى دامۋ جايىنا قالاي قارايسىز؟ جاڭا پرەزيدەنت توقاەۆ بيلىك باسىنا كەلدى. ەندى نە وزگەرەدى, نە وزگەرۋى ءتيىس؟ ال ءسىز نەمەسە ءوزىڭىز باسقارعان اكىمشىلىك باسقارۋ مەنەدجمەنتىندە, قوعامدا جانە حالىقپەن قارىم-قاتىناستا قانداي وزگەرىستەر جاساپ جاتىر؟

&ndash؛ قاسىم-جومارت كەمەلۇلى قازاقستان رەسپۋبليكاسىنىڭ پرەزيدەنتى لاۋازىمىنا كىرىسەر الدىنداعى حالىققا ارنالعان سوزىندە ەلباسى نۇرسۇلتان ءابىشۇلىنىڭ ستراتەگيالىق ساياساتىن جالعاستىرىپ, «؛100 ناقتى قادام»؛ ۇلت جوسپارىنداعى ماقسات-مىندەتتەردى جۇزەگە اسىراتىنىن مالىمدەگەن ەدى. ەڭ الدىمەن وتكىر الەۋمەتتىك ماسەلەلەردى شەشۋمەن اينالىسىپ, الەۋمەتتىك ساياساتتى جاڭعىرتۋمەن اينالىساتىنىن جەتكىزدى. سونداي-اق, ول قازاقستاندىق كاسىپكەرلەردى قولداپ, ينۆەستيسيالاردى تارتۋعا كوڭىل بولەتىنىن, ءار قازاقستان ازاماتىنىڭ قۇقىعىن قورعاپ, ءبىرتۇتاس قوعام قۇرۋ جولىندا جۇمىس ىستەيتىنىن ايتقان بولاتىن.

ال پرەزيدەنتتىڭ وسى ايماقتاعى وكىلى رەتىندە ءوڭىر تۇرعىندارىنىڭ الەۋمەتتىك جاعدايىن جاقسارتىپ, حالىقتىڭ تابىسىن ارتتىرۋ, الەۋمەتتىك وسال توپتاردى تۇرعىن ۇيلەرمەن قامتاماسىز ەتۋگە كۇش سالامىن.

قاسىم-جومارت كەمەلۇلى مەملەكەتتىك ورگانداردىڭ اشىقتىعىن قامتاماسىز ەتىپ, حالىق الدىندا ەسەپ بەرىپ وتىرۋىن تاپسىردى. سونىمەن قاتار, پرەزيدەنت مەملەكەتتىك ورگانداردىڭ شىعىندارىن قىسقارتىپ, بيۋدجەتتىك قاراجاتتى ۇنەمدەپ ءارى ماقساتتى تۇردە جۇمساۋدى جۇكتەدى.

جالپى العاندا, اتقارۋشى بيلىك وكىلدەرى بولىپ تابىلاتىن جەرگىلىكتى جەردەگى اكىمدەر بولسىن, ءار ءتۇرلى سالادا قىزمەت اتقاراتىن باسقارما باسشىلارى بولسىن ءوزى باسشىلىق ەتەتىن مەكەمەنىڭ جۇمىسى, ماقسات-مىندەتتەرى تۋرالى قوعام الدىندا اشىق ءارى جۇيەلى قىزمەت اتقارۋى ءتيىس دەپ سانايمىز.

وسىعان وراي, پاۆلودار وبلىسىندا ءار مەملەكەتتىك ورگاننىڭ باسشىسى الەۋمەتتىك جەلىلەردە تۇرعىندارعا ءوزى باسشىلىق ەتەتىن ايماق نەمەسە سالا بويىنشا ەسەپ بەرىپ وتىرادى. سونداي-اق, بارلىق مەملەكەتتىك ورگاننىڭ باسشىسى, اكىم نەمەسە باسقارما باسشىسى بولسىن, وڭىرلىك كوممۋنيكاسيالار قىزمەتى الاڭىندا باق وكىلدەرىنىڭ الدىندا اتقارىلعان جۇمىس تۋرالى ەسەپ بەرىپ, سول ارقىلى ايماق جۇرتشىلىعىنا ءوزىنىڭ جۇمىسى تۋرالى باياندايدى.

&ndash؛ سۇحباتىڭىزعا راحمەت!

اڭگىمەلەسكەن مارجان سابەت