ايكوركەمنىڭ اكەسى: جانازاعا كەلمەگەن كانديداتتار جارنامامدى سۇرادى (ۆيدەو)

قاڭتار قىرعىنىندا قازا بولعان 4 جاسار ايكوركەمگە قاتىستى قىلمىستىق ءىس ءالى جالعاسىپ جاتىر. سوت ايكوركەمگە وق اتقان 5 ساربازدان كۇدىكتى ەمەس كۋاگەر رەتىندە جاۋاپ العان. ال 4 جاسار قىزدىڭ ولىمىنە ۆزۆود كومانديرى عانا كۇدىكتى رەتىندە تانىلعان. تەرگەۋدىڭ ادىلەتسىز ءوتىپ جاتقانىن ايتقان ايكوركەمنىڭ اكەسى ايدوس مەلدەحان ؛qamshy.kz اقپارات اگەنتتىگىنە سۇحبات بەردى. ؛

&ndash؛ ايكوركەم ومىردەن وتكەلى وتباسىمدا ەشكىم ەڭسەسىن كوتەرە المادى. قىزىمىزدى ساعىنامىز, زيرات باسىنا ءجيى بارىپ تۇرامىز. ايكوركەمنىڭ قازاسىن ءوز كوزىمەن كورگەن ۇلىم ءالى كۇنگە دەيىن "قارىنداسىمدى قۇتقارا المادىم", دەپ جىلايدى. تەتە وسكەن اعاسى كوشەدەن قارىنداسىمەن قۇرداس قىزداردى كورسە "ايكوركەمدى تاۋىپ بەرىڭدەر" دەپ شۋ شىعارادى. ال ۇلكەن قىزىم "ونىڭ ورنىنا نەگە مەن كەتپەدىم" دەگەن كەزدە جانىمدى قويارعا جەر تاپپايمىن", &ndash؛ دەپ كوزىنە جاس الدى ايدوس مەلدەحان.

ايدوس مەلدەحاننىڭ ءبىر اياعى سىنىپ, ءجۇرىپ-تۇرۋى قيىنداعان. ۇيىنە بارعان كەزدە "ەڭبەكتەپ ارەڭ جۇرگەنىن" ايتىپ, ءبىزدى كۇتىپ الا الماعانى ءۇشىن بىزدەن كەشىرىم سۇرادى. ؛

&ndash؛ مەنىڭ دە دەنساۋلىعىم بولماي ءجۇر. ايكوركەم قازا بولعان كۇنى ۇلكەن قىزىم جانەل دە جارالانعان ەدى. دارىگەرلەر دەنەسىنەن 7 وق شىعاردى. قىزىما بىرنەشە رەت وت جاسالدى. جان-جاقتان كومەك سۇرادىق. "قازاقستان حالقىنا" قورىنىڭ باستىعى باسقا كومەك كورسەتۋدەن باس تارتتى. كومەكتەسەمىز دەگەن ولجاس قۇدايبەرگەنوۆكە حابارلاسقانىمدا "بولات جاميشەۆ كەلىسىم بەرمەدى" دەپ قىسقا قايىردى. ال الماتىنىڭ اكىمى بولىپ سايلانعانان باستاپ ەربولات دوساەۆتىڭ قابىلداۋىنا جازىلا الماي ءجۇرمىن. ول ءوزىنىڭ ماڭىنا دا جولاتپايدى. قازاقستاندا اكىمدىكتىڭ الدىنا بارىپ ءوزىڭدى ورتەپ جىبەرەتىنىڭدى ايتساڭ دا اكىممەن كەزدەسە المايسىڭ. تەك اكىم ورىنباسارى عانا كابينەتىنەن شىعۋى مۇمكىن, &ndash؛ دەدى ايدوس مەلدەحان.

قىزىنىڭ ولىمىنە قاتىستى سوت ۇكىمىن كۇتىپ وتىرعان ايدوس مەلدەحان حالىقارالىق سوتقا ارىزداناتىنىن ايتتى. الايدا ول وتباسىنىڭ قاۋىپسىزدىگى ءۇشىن الاڭداۋلى. سول سەبەپتى بالا-شاعاسىمەن بىرگە شەتەلگە كوشىپ كەتكىسى كەلەدى. ؛

&ndash؛ بىرەۋگە مال قايعى, بىرەۋگە جان قايعى. دەنساۋلىعىم بولماي, دارىگەرگە جۇگىرىپ جۇرسەم سايلاۋدىڭ كانديداتتارى "ماعان داۋىس بەرەتىنىڭىزدى ايتىپ, ۆيدەو ءتۇسىرىڭىزشى" دەپ ءوتىنىش جاساپ ءجۇر. قازىرگى كانديداتتارعا سەنۋ قيىن. سايلاۋ بىتكەن سوڭ ءارقايسىسى جىلى ورنىنا جايعاسىپ الادى. ءتىپتى ولاردىڭ تاعدىرى سايلاۋعا دەيىن شەشىلىپ قويعان. حالىقتىڭ ءسوزىن سويلەيمىن دەپ جۇرگەندەر سوزدەرىندە تۇرمايدى. وسىلاي ۇرانداتىپ جۇرگەندەردىڭ ءبىرى &ndash؛ رينات ەدى. اياعى نە بولدى... ءبىر سۇحباتىندا "توقاەۆتىڭ وق اتۋعا بۇيرىق بەرگەنى دۇرىس بولدى. امالى بولعان جوق" دەپ ايتىپتى. دەنى دۇرىس پا؟ مەنىڭ ريناتقا ايتار ءسوزىم جوق, &ndash؛ دەدى ول. ؛

ايدوس مەلدەحان قاڭتار قىرعىنىن ۇمىتىپ بارا جاتقان حالىققا دا وكپەلى ەكەنىن ايتتى. جاڭاوزەن وقيعاسى مەن قاڭتاردى بايلانىستىرا كەلە مۇنداي وقيعانىڭ تاعى دا قايتالانۋى مۇمكىن ەكەنىن ايتتى. ؛

&ndash؛ العاشىندا مەنى دۋلات ءاعادىلدىڭ تاعدىرىن قايتالايسىڭ دەپ قورقىتتى. دۋلات ءاعادىلدىڭ تاعدىرىن قايتالاۋدان قورىقپايمىن. ول ناعىز ەلدىڭ قامىن ويلاعان ازامات ەدى. ولسەم ارتىمدا ادىلەت ىزدەيتىن بالا-شاعام بار. شىندىق ىزدەگەندى اتىپ تاستايدى دەپ قورىقپاڭىزدار. ادىلەت ايتەۋىر ءبىر كۇنى ورنايدى, &ndash؛ دەدى ايدوس مەلدەحان. ؛