شقو-دا كونستيتۋسيا كۇنى تويلانۋدا

شىعىس قازاقستان وبلىسىنىڭ تۇرعىندارى كونستيتۋسيانىڭ 27 جىلدىعىن اتاپ وتۋدە. كونستيتۋسيا كۇنىنە ارنالعان سالتاناتتى كونسەرت وسكەمەن قالاسىنىڭ ورتالىق الاڭىندا ءوتتى.

"بۇگىن بۇكىل ەل كونستيتۋسيا كۇنىن اتاپ وتۋدە. بۇل باستى مەملەكەتتىك مەرەكەلەردىڭ ءبىرى. نەگىزگى زاڭ-بۇل ەلدەگى تۇراقتىلىقتىڭ, بەيبىتشىلىك پەن كەلىسىمنىڭ كەپىلى, مەملەكەتىمىزدىڭ دەموكراتيالىق دامۋىنىڭ مىزعىماس ىرگەتاسى. بيىلعى جىلى قر كونستيتۋسياسىنا تۇزەتۋلەر ەنگىزۋ بويىنشا وتكەن رەفەرەندۋم ءبىزدىڭ ازاماتتارىمىزدىڭ ەلىمىزدىڭ ودان ءارى بولاشاعىنا بەي-جاي قارامايتىنىن كورسەتتى. كونستيتۋسيا ازاماتتاردىڭ نەگىزگى قۇقىقتارى مەن بوستاندىقتارىنا كەپىلدىك بەرەدى. ونىڭ ارقاسىندا ءبىز تۇراقتىلىق, كەلىسىم جانە يگىلىك جولىندا نىق قادام باسامىز. بۇل كۇنى بارلىق قازاقستاندىقتارعا باقىت, دەنساۋلىق, وتان يگىلىگى ءۇشىن جاڭا جەتىستىكتەر مەن جەڭىستەر تىلەيمىن. مەرەكە قۇتتى بولسىن! كونستيتۋسيا كۇنىمەن!- دەپ جازدى شقو اكىمى دانيال احمەتوۆ ءوزىنىڭ instagram پاراقشاسىندا.

وسكەمەن قالاسىنىڭ ورتالىق الاڭىنا 1000-عا جۋىق ادام جينالدى. شىعىسقازاقستاندىقتار كونستيتۋسيا مەرەكەسىن قۋانىشپەن قارسى الدى.

"بۇگىن كوپتەگەن ادامدار جينالدى. بارلىعى باقىتتى جانە كوڭىلدى, ءبىز بالالارمەن بىرگە كەلدىك! بالالار بيلەدى, ونەر كورسەتتى. وتە كەرەمەت وتۋدە. ءبىزدىڭ ەلىمىزدىڭ حالقى وتە ۇيىمشىل" دەدى قالا تۇرعىنى تاتيانا سىچوۆا.

قالا تۋماسى ءدىلناز ارعىنعازينانىڭ ايتۋىنشا, قر كونستيتۋسياسى كۇنى-بۇكىل ەلىمىز ءۇشىن ايتۋلى جانە ماڭىزدى مەرەكەلەردىڭ ءبىرى دەپ اتاپ ءوتتى.

"جىل سايىن ءبىز بۇل كۇندى تۇراقتى تۇردە اتاپ وتكەن ەدىك. ءبىراق شەكتەۋ شارالارىنا بايلانىستى بىزدە 2 جىلعا جۋىق وسىلاي بىرگە اتاپ وتۋگە مۇمكىندىك ءبولمادى. ؛بىز بۇگىن قالادا قايتادان كونسەرتتەر, الاڭدا ءتۇرلى ءىس-شارالار ۇيىمداستىرىلعانىنا وتە قۋانىشتىمىز, بۇل قۋانىش پەن بىرلىكتىڭ تەڭدەسى جوق اتموسفەراسىن سەزىنۋگە مۇمكىندىك بەرەدى. بارشاڭىزدى مەرەكەمەن قۇتتىقتايمىن!" دەپ ىزگى تىلەگىن ءبىلدىردى.

ايتا كەتەيىك, كۇنى بويى قالانىڭ باس الاڭىندا ءتۇرلى ءىس-شارالار وتەدى.