سۋرەتتى تۇسىرگەن اۆتور
الماتى, شاڭىراق ىقشاماۋدانى, اعايىن ايالداماسىنىڭ ماڭىنداعى شاعىن دۇڭگىرشەك. بۇل تەلەفون جوندەۋمەن اينالىساتىن ەسكەندىر قاليبايدىڭ 4 جىلدان بەرگى جۇمىس ورنى. ونى شاڭىراق, كورشىلەس ايگەرىم ىقشاماۋدانى تۇرعىندارىنىڭ ءبىرازى بىلەدى. ەسكەندىر تەلەفونمەن قاتار نوۋتبۋك جوندەيدى. كوشىرمە جاساۋ, سۋرەتكە ءتۇسىرۋ, ونى شىعارۋ سەكىلدى قىزمەت تۇرلەرىن دە ۇسىنادى. تەمىرجول ديسپەچەرى, اسكەري ادام, شاشتاراز بولۋدى قالاعان ول بۇل كاسىپكە كەزدەيسوق كەلگەن.
ەسكەندىر 1996 جىلى دۇنيە ەسىگىن اشقان. ؛الماتى وبلىسىنىڭ تۋماسى. 9-سىنىپتى بىتىرگەن سوڭ الماتىداعى كولىك جانە كوممۋنيكاسيا اكادەمياسىنىڭ كوللەدجىنە "ديسپەچەر" ماماندىعىنا تۇسەدى. تاڭداۋىنا ۇيىندەگىلەردىڭ ىقپالى ۇلكەن بولعانىمەن, وقۋ بارىسىندا ماماندىعى وزىنە دە ۇنايدى. تەحنيكا تىلىمەن تانىستىعى وسى كوللەدجدە باستالادى. ءبىراق كوللەدجدى اياقتاعان سوڭ جۇمىس تابىلا سالمادى. الماتى-1, الماتى-2 تەمىرجول ۆوكزالدارىنان "ورىن جوق" دەگەندى ەستيدى. ءسويتىپ جۇرگەندە 2014 جىلى ەسكەندىردى اسكەرگە الىپ كەتتى.
اسكەري قىزمەتىن وسكەمەن قالاسى ماڭىنداعى اقمير ەلدىمەكەنىندە جاياۋ اسكەر ساپىندا زەنيت ديۆيزيونى 4-روتادا وتەيدى. 4-روتا وسكەمەن بويىنشا ۇزدىك اتانىپ, ەلورداداعى اسكەري پارادقا قاتىسادى. تەحنيكادان حابارى بار بولعاندىقتان وقۋ-جاتتىعۋ جيىندارى, پوليگون كەزىندە وعان راسيامەن جۇمىس ىستەۋ سەنىپ تاپسىرىلادى. اۋىلدا قىزىعۋشىلىقپەن شاش قىرقاتىن ادەتى اسكەردە كاسىپكە اينالىپ, قاتارداعى ساربازداردان باستاپ, مايور, پولكوۆنيكتەرگە دەيىن ەسكەندىرگە شاش الدىرۋعا كەلەتىن. سونىڭ ارقاسىندا اسكەري بولىمدەگىلەرمەن ەتەنە ارالاسىپ, باتالون باسشىسى بورىشىن وتەپ بولعاننان كەيىن اسكەري بولىمدە بايلانىسشى رەتىندە كەلىسىمشارتپەن جۇمىس ىستەۋدى ۇسىنادى. ەسكەندىر ۇسىنىستى قۋانا قابىلدايدى. الايدا ءبىر ساربازبەن جانجالداسىپ, ونىڭ ارتى داۋعا ۇلاسىپ, اقىرى قىزمەت تۋرالى ۇمىتۋىنا تۋرا كەلەدى.
اسكەردەن كەلىسىمەن, كومپيۋتەر ءتىلىن مەڭگەرگەندىكتەن ءوزىن سول قىرىنان سىناپ كورگىسى كەلەدى. جۇمىس جايىمەن مەكتەپ, اكىمشىلىككە بارادى. ءبىراق ول جەرلەردە 20 مىڭ, 35 مىڭ تەڭگە جالاقى ۇسىنعان سوڭ جارتى جىلعا جۋىق الماتىدا كۇزەتشى بولىپ ىستەيدى. ءوزى شاڭىراقتا اپكەسىمەن تۇرادى. جۇمىس تالابىنا ساي بوس ۋاقىتتا جاتتىعۋ زالىنا بارىپ جۇرەدى. بىردە زال قوجايىنىنا كومپيۋتەردەن قاعاز شىعارۋعا كومەكتەسىپ, ۇزاماي زالدىڭ قاعاز جۇمىستارىنا قولعابىس قىلىپ تۇرادى. مۇنىسىنىڭ وتەۋى رەتىندە سپورت سەكسيالارىنىڭ كەز كەلگەن تۇرىنە تەگىن ابونەمەنت بەرىلەدى. كەلەڭسىز جايت بولماعاندا كۇزەتشى بولىپ جۇرە بەرەر مە ەدى, كىم ءبىلسىن.
&ndash؛ جۇمىستا ۆەلوسيپەد ۇرلاندى. كامەرادان قاراساق, ۇرلىق مەنىڭ سمەنىمە دەيىنگى سمەندە تاڭعا جۋىق جاسالىپتى. باستىقتار "سمەندى دۇرىس قابىلداپ المادىڭ" دەپ مەنى دە جازىقتى ەتىپ, جالاقىمىزدان 30 مىڭ تەڭگەدەن ۇستايتىندارىن ايتتى. ءوزىم الاتىن 60 مىڭنىڭ 30 مىڭىن ۇستاپ قالعانىنا كەلىسپەي, جۇمىستان شىعىپ كەتتىم, &ndash؛ دەيدى ول.
ەسكەندىر قايتادان جۇمىس ىزدەيدى. ماماندىقپەن ىستەيىن دەسە, الماتىدا ورىن جوق, مەكتەپتە جالاقى از. وسىنى ويعا الىپ, ەندىگىدە اسكەردە ساربازداردىڭ شاشىن قىسقارتىپ ماشىقتانعان ەسكى كاسىبى بويىنشا جۇمىس ىزدەيدى.
؛
&ndash؛ شاڭىراقتاعى شاشتارازداردىڭ ون شاقتىسىندا بولعان شىعارمىن. كوبىندە بوس ورىن جوق. نەمەسە ايەلدەر ماستەرى قاجەت. ايەلدەر شاشىن قيۋ قولدان كەلمەيدى. ءسويتىپ كەلە جاتقاندا جولدا تەلەفون جوندەيتىن شاعىن بۋتيك كەزىكتى. ىشىنە كىرىپ, "كومەكشى كەرەك ەمەس پە؟" دەپ سۇرادىم. "ىستەگىڭ كەلسە, كۇنىنە 1000 تەڭگە, ايىنا 30 000 تولەيمىن" دەدى بۋتيك يەسى. اعايىندى جىگىتتەر اشقان ەكەن. اعاسى باسقارادى, ءىنىسى ماستەر. كەلىستىم. بالا كۇنىمنەن تەحنيكانى شۇقىلاۋ ۇنايتىندىقتان وزىمە قىزىق كورىندى, &ndash؛ دەيدى ەسكەندىر.
؛
بۇل 2016 جىلدىڭ باسى بولاتىن. ەسكەندىر ۇيرەنۋ ءۇشىن از جالاقىعا جۇمىس ىستەۋگە كەلىسىپ, ول جەردە تۇپ-تۋرا 1 جىل جۇرەدى. تەلەفون جوندەۋدىڭ قىر-سىرىنا قانىققان سوڭ جەكە كەتەدى. بۇرىن ازىق-تۇلىك دۇكەنى بولعان شاعىن بۋتيكتى جالعا الىپ, بىرتىندەپ كاسىبىن باستايدى.
سودان بەرى ءتورت جىل ءوتتى. بۇگىندە ەسكەندىردىڭ تۇراقتى كليەتتەرى كوپ. ايتۋىنشا, تەلەفونداردىڭ ميكروسحەماسى ۇقساس كەلەدى. سوندىقتان بولشەك تابىلسا, بۇزىلعان كەز كەلگەن قۇرىلعىنى جاساي الادى. وسىدان 2-3 جىل بۇرىن ادامداردىڭ قولىندا 100 مىڭ تەڭگەگە دەيىنگى تەلەفوندار بولسا, بۇگىندە باعاسى 200 مىڭ, 300 مىڭ تەڭگەنىڭ ۇستىندەگى تەلەفونداردى ۇستاۋشىلار كوبەيگەنىن بايقاعان.
؛
&ndash؛ جۇرتتىڭ ءبارى ءقازىر تەلەفوندى كرەديتكە الادى. وزدەرى قاراپايىم تۇرسا دا قىمبات تەلەفون ۇستايدى. كوبىنە تەلەفونداردىڭ ەكرانى سىنادى, زاريادتالاتىن جەرى قۇرتىلادى. وندايلاردى گارانتيا بويىنشا جاساماعان سوڭ ماعان كەلەدى. مەن زاپچاستقا كەتەتىن شىعىن مەن جۇمىس باعاسىن بولەك-بولەك ايتامىن. رەمونت باعاسىن جالپى ايتا سالساڭ, اقشانىڭ ءبارى مەنىڭ قالتامدا قالادى دەپ ويلايدى. سوندىقتان "زاپچاست وسىنشا تۇرادى, جۇمىسى مۇنشا" دەپ تۇسىندىرەمىن. مىسالى سامسۋنگتاردىڭ ەكرانى قىمبات. 50 مىڭ تەڭگەلىك تەلەفوننىڭ ەكرانى 30 مىڭ تەڭگە تۇرادى. سونىڭ ۇستىنە جۇمىس اقىسىن قوسامىن. سوندا 33 مىڭ, 35 مىڭ شىعادى. قىمبات سامسۋنگتاردىڭ ەكرانى 100 مىڭنان اسىپ كەتەدى. ايفونداردىكى ارزانداۋ, &ndash؛ دەگەن ول جوندەۋ كەزىندە قيىندىق تۋماس ءۇشىن قازاقستاندا بولشەگى بار تەلەفون ساتىپ الۋعا كەڭەس بەرەدى.
؛
ەسكەندىرگە ارا-اراسىندا "تەلەفون جوندەۋدى ۇيرەتىڭىزشى" دەگەن وتىنىشپەن مەكتەپ جاسىنداعى بالالار كەلىپ تۇرادى. بىلتىر 15 شاقتى بالاعا تەگىن كۋرس وتكىزگەن. وقۋشىلاردىڭ كەيبىرى ۇيرەنگەنىن ۆيدەوعا ءتۇسىرىپ, instagram-عا جۇكتەپ تانىمال بولۋدى ارماندايدى. ۆاين ءتۇسىرىپ, بلوگەر بولعىسى كەلەتىندەر دە بار.
ەسكەندىردىڭ ءوزى تەلەفونعا, ونى شۇقىلاعانعا قىزىقپايدى. مۇنىسىن "ۋاقىت الادى, جۇمىسقا كەسىرى تيەدى" دەپ تۇسىندىرەدى.
كەلەشەكتە تەلەفون رەمونتتايتىن بىرنەشە نۇكتە اشۋ جوسپارى بار. جاز مەزگىلىندە تاعى ءبىر نۇكتە اشىپ تا كورگەن. ءبىراق جۇمىستى تياناقتى ىستەيتىن, كليەنتتى الدامايتىن ادام تابىلماي قايتا جاپقان.
&ndash؛ ءبىزدىڭ جۇمىستا ءار كليەنتتىڭ ريزا بولعانى ماڭىزدى. ءبىر ادامدىكىن دۇرىس ىستەمەسەڭ, بىرتىندەپ كليەنت جوعالتاسىڭ, سوسىن جۇمىس جۇرمەيدى. ال ءبىر ادامدى ريزا ەتسەڭ, ەرتەڭ ول تانىسىن اكەلەدى, كليەنتىڭ كوبەيەدى. ماستەرلەر اراسىندا مايدا-شۇيدە جۇمىسقا 5 مىڭ, 10 مىڭ سۇرايتىندار بار. ادامدار بىلمەگەن سوڭ سۇراعانىن امالسىز بەرەدى. ءبىراق سونىسى ءبارىبىر اشكەرە بولىپ, ءقادىرىن جوعالتادى. ونداي ماستەرگە ادام ەكىنشى جۋىمايدى, &ndash؛ دەيدى ول.
ەسكەندىر ۇيلەنگەن. كەلىنشەگى مەكتەپتە ءمۇعالىم. يبراھيم دەگەن ۇلى بار. جاقىندا بىرگە تولادى. كەلەشەكتە الماتىعا جاقىن ماڭنان جەر الىپ, ءۇي سالعىسى كەلەدى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر