قازاقستاندا كىمدەردىڭ جالاقىسى 2 ەسەگە وسەتىنى بەلگىلى بولدى

قازاقستاندا 2021 جىلعى 1 قاڭتاردان باستاپ الەۋمەتتىك سالا قىزمەتكەرلەرىنىڭ لاۋازىمدىق جالاقىسى 50%-عا ءوستى. 2022 جىلى لاۋازىمدىق جالاقى 25%-عا, ال 2023 جىلى تاعى 25%-عا وسەدى. بۇل ماقساتقا مەملەكەتتىك بيۋدجەتتەن الداعى ءۇش جىلعا 95 ملرد تەڭگە ءبولىندى. بۇل تۋرالى ەڭبەك جانە حالىقتى الەۋمەتتىك قورعان مينيسترلىگى ءباسپاسوز قىزمەتى حابارلادى.

قر ۇكىمەتىنىڭ 12 قاڭتاردا وتكەن وتىرىسى اياسىندا "ازاماتتىق قىزمەتشىلەرگە, مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە, قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى»؛ قازاقستان رەسپۋبليكاسى ۇكىمەتىنىڭ 2015 جىلعى 31 جەلتوقسانداعى № 1193 قاۋلىسىنا وزگەرىستەر ەنگىزۋ تۋرالى" قاۋلى قابىلدانىپ, وعان سايكەس ءوز قىزمەتىن ستاسيونارلىق جانە جارتىلاي ستاسيونارلىق ۇلگىدەگى مەديسينالىق-الەۋمەتتىك مەكەمەلەردە, ۇيدە قىزمەت كورسەتۋ ۇيىمدارىندا, ۋاقىتشا بولۋ ۇيىمدارىندا جانە جۇمىسپەن قامتۋ ورتالىقتارىندا جۇزەگە اسىراتىن باسشى قۇرام مەن نەگىزگى پەرسونالدىڭ (الەۋمەتتىك قىزمەتكەرلەر, پەداگوگتار, مەديسينا قىزمەتكەرلەرى جانە ت.ب.) لاۋازىمدىق جالاقىسىن ءۇش جىل ىشىندە ارتتىرۋ كوزدەلگەن.

ناتيجەسىندە 2021 جىلعى 1 قاڭتاردان باستاپ وسى قىزمەتكەرلەردىڭ لاۋازىمدىق ايلىقاقىسى 50%-عا, 2022 جىلى اعىمداعى ماننەن 25%-عا, 2023 جىلى تاعى 25%-عا وسەدى.

قاۋلىدا سونداي-اق قولدانىستاعى قوسىمشا اقىنىڭ مولشەرىن بازالىق لاۋازىمدىق جالاقىنىڭ 30%-ىنان لاۋازىمدىق جالاقىنىڭ 40%-ىنا وزگەرتۋ جولىمەن ستاسيونارلىق جانە جارتىلاي ستاسيونارلىق ۇلگىدەگى مام-دە, ۇيدە قىزمەت كورسەتۋ جانە ۋاقىتشا بولۋ ۇيىمدارىندا جۇمىس ىستەيتىن اكىمشىلىك جانە قوسالقى پەرسونال ءۇشىن جالاقىنى ارتتىرۋ كوزدەلگەن.