استانا كۇنى. ەلباسى شەتەلدەن العان سىيلىقتار

6 شىلدە استانا كۇنى جانە قازاقستاننىڭ تۇڭعىش پرەزيدەنتى, ەلباسى تۋعان كۇنى قارساڭىندا ساۋد ارابياسى كورولدىگىنىڭ استاناسى ەر-رياد قالاسىندا «پرەزيدەنت نۇرسۇلتان ءابىشۇلى نازارباەۆتىڭ ساياساتكەرلىك فەنومەنى» تاقىرىبىنا «دوڭگەلەك ۇستەل» ۇيىمداستىرىلدى.  بۇل تۋرالى  «قامشى» پورتالى قر پرەزيدەنتى جانىنداعى ورتالىق كوممۋنيكاسيالار قىزمەتىنە سىلتەمە جاساي وتىرىپ حابارلايدى.

دوڭگەلەك ۇستەلدى قازاقستاننىڭ ساۋد ارابياسىنداعى توتەنشە جانە وكىلەتتى ەلشىسى باقىت باتىراشەۆ اشىپ, قازاقستاننىڭ پرەزيدەنتى نۇرسۇلتان نازارباەۆتىڭ  باسشىلىعىمەن قول جەتكىزگەن ساياسي, الەۋمەتتىك-ەكونوميكالىق سالالارىنداعى زور جەتىستىكتەرىنە توقتالدى.

وز كەزەگىندە, «دوڭگەلەك ۇستەلگە» قاتىسۋشىلار دا  ن. نازارباەۆتىڭ حالىقارالىق ارەناداعى ساياسي فەنومەنى  جانە ونىڭ قازاقستان مەن ساۋد ارابياسىنىڭ ەكى جاقتى ىنتىماقتاستىعىن دامىتۋعا قوسقان ۇلەسىن ەرەكشە اتاپ ءوتتى.

ىس-شارا شەڭبەرىندە پرەزيدەنت جانە قازاقستاننىڭ تاۋەلسىزدىك جىلدارى ەكونوميكالىق جانە الەۋمەتتىك-مادەني دامۋ سالالارىنداعى جەتىستىكتەرى تۋرالى دەرەكتى فيلم كورسەتىلدى.

ايتا كەتەيىك, وسىعان دەيىن نۇرسۇلتان نازارباەۆتى قىرعىزستان رەسپۋبليكاسىنىڭ پرەزيدەنتى المازبەك اتامباەۆ i دارەجەلى "ماناس" وردەنىمەن ماراپاتتادى.

ال تاتارستان استاناسى قازان قالاسىنىڭ كوشەلەرىنىڭ بىرىنە نۇرسۇلتان نازارباەۆتىڭ ەسىمى بەرىلدى.

سونداي-اق, بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو بەلارۋس پەن قازاقستان اراسىنداعى دوستىق قارىم-قاتىناستاردىڭ جانە ستراتەگيالىق ىنتىماقتاستىقتىڭ دامۋىنا قوسقان قوماقتى ۇلەسى ءۇشىن  قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتى "حالىقتار دوستىعى" وردەنىمەن ماراپاتتادى.

رەسەي پرەزيدەنتى ۆلاديمير پۋتين نۇرسۇلتان نازارباەۆتى “الەكساندر نەۆسكيي” وردەنىمەن ماراپاتتادى. اتالمىش وردەن مەملەكەت قۇرىلىمىندا ەرەكشە جۇمىستارى ءۇشىن, كوپجىلدىق ەرىكتى قىزمەتى مەن قىزمەت جولىندا جوعارى ناتيجەلەر كورسەتىپ, رەسەيدىڭ حالىقارالىق بەدەلى مەن وتان قورعاۋ قابىلەتىن كۇشەيكەنى ءۇشىن, ەكونوميكا, عىلىم, ءبىلىم, مادەنيەت, ونەر, دەنساۋلىق ساقتاۋ سالالارىن جەتىلدىرگەنى ءۇشىن بەرىلەدى.  سونىمەن بىرگە, شەتەلدىك بەلگىلى ساياساتكەرلەر مەن قوعام قايراتكەرلەرىنە دە بەرىلەدى.

نۇرگەلدى ءابدىعانيۇلى