قازاقستاندىق جانە شەتەلدىك كۋرورتتارداعى باعا ايىرماشىلىعى (ساراپتاما)

جاز شىقتى. ارقا كەڭەيدى. جىل ون ەكى اي جۇمىستا ءجۇرىپ,  ابدەن قالجىراعاندار ەندى ەڭبەك دەمالىستارىن جاقسى وتكىزۋدى كوزدەيدى. بىرەۋلەرى  اۋىلعا, تۋىسقاندارىنىڭ ۇيىنە نەمەسە  تاۋلى ايماقتارعا كەتەدى. ال ەندى بىرەۋلەرى دەمالىس ۋاقىتتارىن قازاقستانداعى دەمالىس ورىندارىندا وتكىزەدى. الايدا كوپ جاعدايدا قازاقستاندىقتار جاز شىقسا بولدى,  شەتەل اسىپ كەتۋدى ادەتكە اينالدىرىپ العان. تۇركيا, ءباا, مالايزيا ت.ب. سەبەپ بىرەۋ, قازاقستاندىق دەمالىس ورىندارىنىڭ باعاسىن اركىمنىڭ قالتاسى كوتەرە بەرمەيدى جانە كورسەتىلەتىن قىزمەن ساپاسى تومەن. بۇل باسەكەگە قابىلەتتىلىك جوق دەگەندى بىلدىرە مە؟ «قامشى» پورتالى قازاقستاندىق جانە شەتەلدىك كۋرورتتىق بازالاردىڭ سەرۆيستەرىنە سالىستىرمالى تۇردە ساراپتاما جاساعان ەدى.

بىلتىرعى جىلى قر يندۋستريا جانە جاڭا تەحنولوگيالار مينيسترلىگى  «قازاقستان تۋريزمنەن جىلىنا 10 ميلليارد دوللار پايدا تاباتىن بولادى» دەپ جارياعا جار سالىپ ەدى. ايتپاقشى قازاقستانداعى ءتۋريزمدى دامىتۋدىڭ 2020 جىلعا دەيىنگى تۇجىرىمداماسىنا دا وسى ماقسات قويىلعان.  تابىسى ورتاشا قازاقستاندىقتار ازىرشە شەتەلدە دەمالعاندى ءجون كورەدى. ال ەل ۇكىمەتى ىشكى ءتۋريزمدى دامىتۋدى عانا ەمەس, قازاقستانعا شەتەلدەن تۋريستەردى تارتۋ جوسپارىن دا مالىمدەدى.  تۇجىرىمداما تۋريزم سالاسىنان تۇسەتىن كىرىستى 10 ميلليارد 200 ميلليون دوللارعا دەيىن, ال ەلگە كەلەتىن تۋريستەر سانىن 8 ميلليون 500 مىڭ ادامعا دەيىن جەتكىزۋ سياقتى ءىرى مىندەتتەر قويىپ وتىر. دەگەنمەن, تۋريستەر مەن ساراپشىلار, قاراپايىم قازاقستاندىقتار ونىڭ ورىندالاتىنىنا سەنبەيدى.

سونىمەن, نەگە ورتاشا تابىستى قازاقستاندىقتار الىس-جاقىن شەتەلدە دەمالعاندى ءجون كورەدى؟ سالىستىرىپ كورەيىك.

قازاقستاندىق دەمالىس ورىندارى:

الماتى قالاسى جانە قالا ماڭى

بىز الماتى قالاسى ماڭىندا ورنالاسقان 5 جۇلدىزدى دەمالىس ورىندارىنىڭ بىرىنە قوڭىراۋ شالدىق. 1 كۇندىك دەمالىس ءۇشىن كورسەتىلەتىن قىزمەت ساپاسىن, باعاسىن جانە دەمالىستى جوعارعى دەڭگەيدە وتكىزۋ ءۇشىن قانداي جاعدايلار قاراستىرىلاتىنىن بىلدىك. بىزگە ۇسىنىلعان پرايست پاراقشادا كورسەتىلگەن مالىمەتتەر مىناداي بولدى.

جاعاجايدا دەمالۋ ءۇشىن  دۇيسەنبى – جۇما كۇندەرى  ەرەسەكتەر ءۇشىن  ادام باسىنا– 4500 تەڭگە بولسا,  12 جاسقا دەيىنگى بالالارعا تەگىن. سەنبى-جەكسەنبى كۇندەرى جاعاجايعا كىرۋ قۇنى – 7500 تگ. ال 12 جاسقا دەيىنگى بالالار ءۇشىن ادەتتەگىدەي تەگىن ەمەس, 4000 تەڭگە تولەۋگە مىندەتتى. ايتپاقشى, مۇندا سۇرتىنۋگە ارنالعان ورامالداردىڭ ءوزى اقىلى. قۇنى – 500 تەڭگەدەن باستالادى. vip كيىم اۋىستىرۋ بولمەلەرى – 15 مىڭ, vip شاتىر – ەرەسەكتەر ءۇشىن – 60 مىڭ, بالالار ءۇشىن 30 مىڭ تەڭگە. لاۋندج ايماق – 100 000 تەڭگەدەن باستالادى. مۇنىڭ ىشىنە تاماق, سۋسىن, ت.ب. كىرمەيدى.  ال ەگەر بىرنەشە كۇندىك تۋر ءۇشىن, قوناق ءۇي العىڭىز كەلسە 2 ادامعا ارنالعان كوتەدج ۇيلەردىڭ قۇنى – 50 مىڭ تەڭگەدەن باستالادى. مۇنىڭ ىشىنە تەك تاڭعى اس كىرەدى. ال ءاربىر ارتىق ادام ءۇشىن – 5000 تەڭگە. سونىمەن, 1 كۇندىك دەمالىس ءۇشىن – 1 ادامعا 183 مىڭ تەڭگە جۇمسايدى ەكەنبىز. ارينە, دەمالىستى كوڭىلدى وتكىزۋ ءۇشىن ءسىز جالعىز بارمايسىز. وتباسىڭىز, دوستارىڭىز نەمەسە ارىپتەستەرىڭىز بار. ياعني, ءسىز جىل بويىپ تىرنەكتەپ تاپقان قاراجاتىڭىزدى ءبىر-اق كۇندە شاشىپ جىبەرۋىڭىز مۇمكىن.

ال بۋرابايداعى دەمالىس ورىندارىنداعى 10 كۇندىك جولداما قۇنى 350 مىڭ تەڭگەدەن باستالادى.

شەتەلدەگى جازعى دەمالىس ماۋسىمى

جازعى ەڭبەك دەمالىستارىن الا سالىسىمەن, قازاقستاندىقتاردىڭ باسىم كوپشىلىگى  تۇركياعا باعىت الادى. نەگە؟ ەندىگى جەردە ءبىز قازاقستانداعى تۋريستىك اگەنتتىكتەرگە حابارلاسىپ, جازعى دەمالىس ماۋسىمىن قانداي ەلدەردە وتكىزۋگە بولاتىنىن بىلدىك. قالتاعا سالماق سالمايتىن ءارى قىزمەت كورسەتۋ ساپاسى جوعارى دەمالىس ورىندارىن قايدان تابۋعا بولادى؟

لاۋرا جاپاشەۆا, تۋريستىك اگەنت:

-تۇركيانىڭ ەڭ كەرەمەت دەگەن دەمالىس ورىندارىندا جاقسى ۋاقىت وتكىزۋ ءۇشىن ماكسيمالدى قولايلىلىقتار جاسالعان. مىسالى, انتالياداعى تەڭىز جاعاسىنا 10 كۇنگە بارۋ ءۇشىن 2 ادامعا ءنابارى – 1800 دوللار كەتەدى.  مۇنىڭ ىشىنە 4-5 جۇلدىزدى قوناق ءۇي, كۇنىنە 5 ۋاقىت تاماق, تۋر, جاعاجاي ت.ب. ءبارى قامتىلعان. ۇشىپ بارۋ, ۇشىپ قايتۋ قۇنى وسىنىڭ ىشىنە كىرەدى.  ال بىرىككە اراب امىرلىكتەرىندەگى دەمالىس ورىندارىنىڭ باعاسى ءسال قىمباتتاۋ. مۇندا 10 كۇندىك ساپار ءۇشىن 2 ادامعا 2000 دوللار كەتەدى. ىشىنە 5 جۇلدىزدى قوناق ۇيلەر, 3 مەزگىل تاماق,  ۆيزا, تۋر ت.ب. كىرەدى. ءبىز كوشپەلى تۋريزممەن اينالىسامىز. شەتەلدە ءبىزدىڭ تۋريستەردى قۋانا قارسى الادى. قازاقستاندىق قوناقۇيلەرمەن سالىستىرعاندا, ولاردا باعا دا ارزان, ينفراقۇرىلىمى دا جاقسى. قازاقستان قوناقۇيلەرىندە باعا تىم قىمبات, ال وركەنيەتتىڭ ءىزى دە جوق.

تۇيىن: ساندىق كورسەتكىشتەردىڭ وزدەرى-اق, قازاقستاندىقتاردىڭ شەتەلدەردە دەمالۋعا قۇمار ەكەندىكتەرىن ايعاقتاپ تۇر. ال «قازاق ءتۋريزمى تۋريستەردى ءقايتىپ دامىماق» دەگەن زاڭدى ساۋال تۋىندايدى.

ياعني, ءاربىر دەمالۋشى سەرۆيسى تومەن, باعاسى قىمبات دەمالىس ورىندارىنا گورى, قىزمەت ساپاسى دا, باعاسى دا قالىپدى, قالتا كوقتەرەرلىك شەت ەلدەردە دەمالعاندى ءجون سانايدى. وعان بولا ولاردى ايىپتاي المايسىز. سوندىقتان, قازاقستانداعى كۋرورتتىق بازالارعا تولىقتاي وزگەرىستەر ەنگىزەتىن, باعانى قولجەتىمدى ءارى تۇراقتى ەتۋ ءۇشىن رەفورما قابىلدايتىن ۋاقىت جەتكەن بولار.

نۇرگەلدى ءابدىعانيۇلى