ستۋدەنتتەرگە قولايلى الەمدەگى 10 شاھار

الەمدەگى بارشا ستۋدەنتتەرگە ۋاقىتشا جۇمىس تاۋىپ بەرۋگە كومەكتەسەتىن app jobs پورتالى ەڭ قولايلى قالالاردىڭ ءتىزىمىن جاريالادى. رەيتينگ كوشىن چەحيا استاناسى – پراگا قالاسى باستاپ تۇر.

ال كورشى رەسەيدىڭ استاناسى ماسكەۋ قالاسى وسى ساناتتاعى قالالاردىڭ ىشىنەن ەكىنشى ورىنعا لايىق دەپ تانىلىپتى.

ساراپشىلار قالالاردى بىرنەشە تالاپتار بويىنشا سىناقتان وتكىزدى: قالاداعى بەدەلدى جوو-لاردىڭ كوپ بولۋى, ىڭعايلى گرافيكپەن ستۋدەنتتەرگە ارنالعان جۇمىس ورىندارىنىڭ كوپتىگى, پاتەر جالداۋ باعاسى دەگەندەي. سونىمەن قاتار, ساراپشىلار قالادا وتكىزىلەتىن كونسەرتتەر مەن مادەني شارالاردى دا نازارعا الدى. ءتىپتى, ءبىر بوكال سىرانىڭ باعاسى دا شەشۋىشى كريتەرييلەردىڭ ءبىرى بولسا كەرەك.

ناتيجەسىندە, ستۋدەنتتەرگە ىڭعايلى ەڭ ۇزدىك قالا رەتىندە پراگا اتالدى. بۇل قالادا ءبىر ايعا پاتەردى 579 ەۋروعا جالداۋعا, 1,2 ەۋروعا ءبىر بوكال سىرا ىشۋگە بولادى. سونداي-اق, بۇل شاھاردا ەركىن گرافيكپەن ستۋدەنتتەرگە ارنالعان جۇمىس ورىندارىنىڭ سانى – 261, ال ويىن-ساۋىق شارالارىنىڭ سانى – 151. كوڭىلدى ءارى ەڭبەكقور قالا.

ال ماسكەۋدە پاتەراقى قۇنى - 796 ەۋرو, ءبىر بوكال سىرا – 3,5 ەۋرو. رەسەي استاناسىندا ستۋدەنتتەرگە قولايلى 42 جۇمىس ورىنى بار. سونىمەن قاتار, ماسكەۋدە 300-دەن اسا مادەني شارالار وتكىزىلەدى.

ۇزدىك ۇشتىكتى بەرلين قالاسى تۇيىندەپ تۇر. ال العاشقى وندىققا پەكين, مونرەال, تايبەي, مانچەستەر, توكيو, ۆەنا جانە سەۋل سىندى قالالار كىرەدى.

اۋدارعان: ادىلەت مادەنيەت