قازاقستانداعى قورعانىس سالاسىن رەفورمالاۋ, اسكەردىڭ ماتەريالدىق-تەحنيكالىق بازاسىن كۇشەيتۋ تۋرالى ءجيى ءسوز قوزعالادى. ۋكرايناداعى سوعىستا رەسەيدىڭ تانكىلەرى درون سوققىسىنا شىداس بەرمەي, كوپ قارۋى ؛ىسكە العىسىز بولىپ جاتقاندا, اسكەرىن رەسەيگە قاراپ تۇزەپ, نەگىزىنەن سولاردىڭ قارۋىمەن جاراقتاندىرىپ وتىرعان قازاقستان قارۋلى كۇشتەرىنىڭ سوعىس قابىلەتى دە بەلگىلى بولا باستادى. ؛وعان قوسا اسكەردەگى الىمجەتتىك جويىلۋدىڭ ورنىنا اسقىنىپ تۇر. ساربازدار اراسىنداعى سۋيسيد سوڭعى ۋاقىتتا جيىلەپ كەتتى.

ال بۇگىن وسىدان بىرنەشە اي بۇرىن وزىنە قول سالعان جاس ساربازدىڭ ىسىنە بايلانىستى ادام شوشىرلىق دەرەكتەر شىقتى. مارقۇم ادۆوكاتىنىڭ ايتۋىنشا, ساراپتاما ساربازدىڭ اۋىز قۋىسىنان, ءىش كيىمىنەن, فۋتبولكاسىنان بىرنەشە ادامنىڭ سپەرماسىنىڭ ىزدەرى بارىن كورسەتكەن.

قورعاۋشى ؛سەرجان پراليەۆ تەرگەۋ ورىندارى وسىنىڭ وزىنە كوز جۇما قاراپ وتىر دەيدى. بەيبىت كۇندە بالاسىنان ايىرىلىپ وتىرعان اتا-اناعا ىستەگى مۇنداي دەرەكتەردى ەستۋ قالاي قيىنعا سوققانىن ەلەستەتۋدىڭ ءوزى اۋىر.

قورعانىس مينيسترلىگى بولسا, اسكەردەگى الىمجەتتىكتى ۇدايى جوققا شىعارادى. وتان قورعاۋشىلار قازاسىنا جاۋاپكەرشىلىك الماق تۇگىلى ساربازدار ءولىمىن اسكەردەگى حال-احۋالمەن بايلانىستىرعىسى كەلمەيدى.

ۆەدومستۆونى بۇگىندە گەنەرال رۋسلان جاقسىلىقوۆ باسقارادى. ول كوپشىلىككە اسكەري سالداعى ىستەرىنەن بۇرىن, ؛قازاقشاعا شورقاقتىعىمەن, قازاقشاسىن سىناعاندارعا "وكپەلەسەڭ كوشىپ كەت" دەگەنىمەن تانىس.

اقىن ايگۇل ءجۇمادىل بۇعان دەيىن جاقسىلىقوۆتى مينيسترلىككە تۇبەگەيلى رەفورما جاساماسا دا, تىم بولماعاندا اسكەردەگى كىسى ءولىمىن توقتاتاتىنداي شارا جاساي المادى دەپ ايىپتاعان.

"كوشەدەن قۋىپ ءجۇرىپ ۇستاپ الىپ, اسكەرگە اكەتكەندەگى تىندىراتىندارىڭىز اش-جالاڭاش ۇرىپ-سوعىپ, ودان قالدى ۇيىنەن, تۋعان-تۋىسىنان اقشا سۇراتىپ, ول از بولعانداي ءولتىرىپ, ۇلىن كۇتىپ وتىرعان ۇيگە ءمايىتىن اپارىپ بەرۋ مە؟ اسكەري ءتارتىپ قايدا؟ ءتالىم قايدا؟ تاربيە قايدا؟ ودان دا سول كوشەدە ءوز ناندارىن وزدەرى تاۋىپ جەپ, امان-ساۋ جۇرە بەرسىن. تيىسپەڭىزدەر! ؛قان قاقساعان قارا حالىق باياعى! مينيسترلەردىڭ, دەپۋتاتتاردىڭ, شەنەۋنىك, اكىمدەردىڭ دە بالالارى ءدال وسى اسكەر قاتارىندا ءجۇر مە, الدە؟ وعان قاتتى كۇمانىم بار! باسى اۋىرماعاننىڭ قۇدايمەن ءىسى جوق,-دەپ ءوز بالالارىڭىزدىڭ قارنى توق, ۇيقىسى تىنىش جالعاندى جالپاعىنان باسىپ جۇرگەسىن دە, بەيبىت كۇندە مەزگىلسىز قازا بولعان ۇلىنىڭ تابىتىن قۇشاقتاعان انانىڭ زارىن قايدان ۇعاسىزدار سىزدەر؟!" دەيدى اقىن.

اسكەردەگى ماسەلەلەرگە ارالاسىپ جۇرگەن ساراپشى "سولدات انالارى كوميتەتىنىڭ" جەتەكشىسى زينايدا چيۆيلەۆا دا شەندى-شەكپەندىنىڭ بالاسى اسكەرگە بارمايتىنىن, ال ؛قورعانىس مينيسترلىگىندەگىلەر ءوز كرەسلوسى ءۇشىن عانا الاڭدايتىنىن ايتادى.

قورعانىس سالاسىنداعى بىلىق مۇنىمەن بىتپەيدى. بۇگىن عانا قورعانىس مينيسترلىگىنە قاراستى دەپارتامەنت باسشىسى ءىرى كولەمدە پارامەن ۇستالعانى حابارلاندى. مينيسترلىك مۇندا دا وزىنە شاڭ جۋىتپاي, كۇدىكتى ۇستالعانعا دەيىن مينيسترلىكتەن قىزمەتتەن شىعىپ كەتكەنىن حابارلادى. تىزەسى ابدەن شىققان كەيىنگى داتامەن جۇمىستان شىعارىپ جىبەرۋ ءادىسى بۇل جەردە دە قولدانىلعان سىڭايلى.

قورعانىس سالاسىنا باسشى بولعان تۇپ-تۋرا ءبىر جىلدا بىرنەشە ساربازدىڭ ولىمىنە جول بەرىپ, قول استىنداعى قىزمەتكەرلەرى پارامەن ۇستالىپ وتىرعان رۋسلان جاقسىلىقوۆتى "وتستاۆكاعا كەتسىن" دەپ جاتقاندار بارشىلىق. بۇعان نە دەيسىز, وقىرمان؟