ساعىنتاەۆ الماتىداعى اقىن-جازۋشىلارعا گرانت بەرمەك

بۇل تۋرالى ؛الماتى قالاسىنىڭ اكىمى باقىتجان ساعىنتاەۆ كەزەكتى جيىن بارىسىندا ايتتى, دەپ حابارلايدى qamshy.kz اقپارات اگەنتتىگى. ؛

باقىتجان ساعىنتاەۆتىڭ ايتۋىنشا, مۇنداي شەشىمنىڭ قابىلدانۋىنا بيىل ەل اۋماعىندا كەڭ كولەمدە اتالىپ وتىلەتىن ءال-فارابيدىڭ 1150 جىلدىعى مەن ابايدىڭ 175 جىلدىق مەرەيتويلارى سەبەپ بولىپ وتىر. ياعني, وسى ورايدا قالا اكىمدىگى تاراپىنان اقىن-جازۋشىلارعا قولداۋ كورسەتىلمەك.

«؛بىلتىر جازۋشىلار وداعىنىڭ 85 جىلدىق مەرەيتويى جوعارى دەڭگەيدە ءوتتى. جەرگىلىكتى بيۋدجەت ەسەبىنەن 250 ملن تەڭگە قاراجات ءبولىنىپ, جازۋشىلار وداعىنىڭ عيماراتىنا جوندەۋ جۇمىستارى جۇرگىزىلۋدە. الماتى قالاسىندا تۇراتىن 150 اقىن-جازۋشى 500 مىڭ تەڭگەلىك اقشالاي گرانت سەرتيفيكاتتارىمەن ماراپاتتالعان بولاتىن. بۇگىنگى تاڭدا قازاقستان بويىنشا جازۋشىلار وداعىنىڭ 820 مۇشەسى بولسا, ونىڭ 360-ى وسى الماتى قالاسىندا تۇرادى ەكەن. بيىل ءبىز ءار توقسان سايىن 90 اقىن-جازۋشىعا گرانت تاپسىراتىن بولامىز. بۇل ءتىزىمدى بىزگە جازۋشىلار وداعىنىڭ ءوزى ۇسىنىپ وتىرادى. بۇل ماسەلە ءقازىر بيۋدجەتتە ناقتىلانىپ جاتىر»؛, - دەدى قالا باسشىسى.

اتاپ وتەيىك, بىلتىر جاڭا جىل قارساڭىندا الماتى اكىمى قالاداعى 60 اقىن-جازۋشىعا سالتاناتتى تۇردە ارنايى گرانت تابىستاعان بولاتىن.

 ؛