نۇر-سۇلتاندا ەلۋدەن استام ايەل جاردەماقىعا نارازىلىعىن ءبىلدىردى

نۇر-سۇلتان قالاسىندا ەلۋدەن استام ايەل ەڭبەك جانە الەۋمەتتىك قورعاۋ مينيسترلىگىنە بارىپ, نارازىلىق ءبىلدىردى دەپ جازادى qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. ولاردىڭ سوزىنشە, ۇكىمەت كوپ بالالى وتباسىلارعا عانا جاردەماقى بەرىپ, قالعان وتباسىلاردى ەسكەرمەگەن. ؛

نارازىلىققا جينالعان ايەلدەر اراسىندا جالعىزباستى, تۇرمىسى ناشار جانە مۇگەدەك بالا باعىپ وتىرعان ايەلدەر دە, بيىل قاڭتاردان باستاپ ءار بالاعا ون مىڭ تەڭگەدەن استام جاردەماقى الا باستاعان كوپ بالالى ايەلدەر دە بار.

جاردەماقى الا باستاعان ايەلدەر "ۇكىمەتتىڭ ءار بالاعا ون مىڭ تەڭگەدەن بەرەتىن جاردەماقىسى از, ءبىر ايعا شىققاندا 300 تەڭگەدەن ءسال عانا اسادى" دەپ سانايدى. ولار ەڭبەك جانە حالىقتى الەۋمەتتىك قورعاۋ مينيسترلىگى كوپ بالالى وتباسىلارعا بەرەتىن جاردەماقىنى بەلگىلەۋ كەزىندە كوميسسيا قۇرعانىن, وسى كوميسسياعا كىرگەن كوپ بالالى ايەلدەردىڭ ءار بالاعا ەڭ تومەنگى جالاقى - 42 مىڭ تەڭگەدەن بەرۋ تۋرالى تالاپتارى ورىندالماعانىنا نارازى.

نارازى ايەلدەر "بيلىك جاردەماقىنى بالا سانىنا قاراي ەمەس, ءار بالاعا بەرۋى كەرەك" دەپ ەسەپتەيدى. ولاردىڭ سوزىنشە "بيلىك الەۋمەتتىك جاردەماقىنى تەك كوپ بالالى ايەلدەرگە عانا بەرىپ, الەۋمەتتىك تەڭسىزدىك ورناتىپ وتىر".

نۇر-سۇلتان قالاسىنىڭ تۇرعىنى ءنازيرا مۇقاشەۆا ءۇش بالاسىمەن ون بەس جىلدان بەرى پاتەر جالداپ تۇراتىنىن ايتادى.

-مەن سەكىلدى پاتەر جالدايتىن, تۇرمىسى ناشار وتباسىلار كوپ. ولاردىڭ جازىعى ءتورت, يا بەس بالالى بولماعانى ما؟ 1-3 بالاسىن جالعىز ءوزى اسىراپ وتىرعان ايەلدەر بار. ولار نەگە ەسكەرىلمەيدى,- دەيدى ول.

نارازى ايەلدەر الدىنا نۇر-سۇلتان اكىمىنىڭ كومەكشىسى ەلنۇر بەيسەنباەۆ شىعىپ, عيماراتقا كىرۋگە شاقىردى. الايدا, ايەلدەر عيماراتقا كىرۋدەن باس تارتىپ, ءباسپاسوز وكىلدەرىن دە كىرگىزۋ تۋرالى شارت قويدى. مينيسترلىك قىزمەتكەرلەرى ءباسپاسوزدى كىرگىزبەيتىنىن حابارلاعان سوڭ نارازى ايەلدەر قازاقستان پرەزيدەنتى قاسىم-جومارت توقاەۆتى اتاپ, ايقايلادى.

نۇر-سۇلتان قالاسىنىڭ ءبىر توپ ايەلى بيىل 6 قاڭتاردا دا جاردەماقىعا نارازىلىقتارىن بىلدىرگەن. 8 قاڭتاردا پرەمەر-مينيستردىڭ ورىنباسارى بەردىبەك ساپارباەۆ جاردەماقىنىڭ جاڭاشا تولەنۋىنە بايلانىستى جاۋاپ بەرگەن.

&ndash؛ ءبىزدىڭ نەگىزگى ۇستانىمىمىز - بىرىنشىدەن, كوپ بالالى وتباسىلاردى قولداۋ. بەس بالاعا قانشا شىعىن كەتەتىنىن, بىر-ەكى بالاعا قانشا شىعىن كەتەتىنىن وزدەرىڭىز بىلەسىزدەر. بارلىعىنا 20 مىڭ تەڭگەدەن تولەۋ دەگەن دۇرىس ەمەس. سەبەبى, بىرىنشىدەن, وعان كەتەتىن قارجىنى ەسەپتەۋىمىز كەرەك. ەكىنشىسىن, ەڭ مۇقتاج ادامدارعا بەرۋىمىز كەرەك, - دەدى بەردىبەك ساپارباەۆ.

بۇعان دەيىن ەڭبەك جانە حالىقتى الەۋمەتتىك قورعاۋ مينيسترلىگى 4 بالاعا - 42 496 تەڭگە, 5 بالاعا - 53127 تەڭگە, 6 بالاعا - 63 757 تەڭگە, 7 جانە ودان كوپ بالاعا - 74 388 تەڭگە بەرىلەتىنىن حابارلاعان. سونىمەن قاتار, جاڭا جىلدان باستاپ "كەپىلدەندىرىلگەن الەۋمەتتىك توپتاما" بەرىلە باستايتىنىن ايتقان.

6 قاڭتار كۇنگى جاعداي بويىنشا, 367 مىڭ وتباسىنا جاردەماقى تاعايىندالعان جانە 17 ميلليارد تەڭگە تولەنگەن.