24 شىلدە, 2019 ەكونوميكا
تەڭگە تاعى قۇنسىزدانا ما؟
حالىقارالىق ساراپشىلار ۇلتتىق ۆاليۋتا باعامىن مەملەكەت باقىلاپ وتىرعان بولۋى مۇمكىن دەگەن پىكىردە.
دوللار كۋرسى باياۋ ءبىراق تۇراقتى تۇردە ءوسىپ كەلەدى. بۇل كۇندەرى 1 دوللار 385 تەڭگەلىك دەڭگەيگە تۇراقتاعان. الايدا 9-16 شىلدە كۇندەرى قازاقستاندا بولعان حالىقارالىق ۆاليۋتا قورىنىڭ ساراپشىلارى بۇل نارىقتىق باعام دەگەنگە كۇمانمەن قارايدى.
سىرتقى فاكتورلارعا بايلانعان تەڭگە باعامىنا اسەر ەتەتىن وقيعالار الەمدە از ورىن الىپ جاتقان جوق: دوللار قۇنسىزدانىپ, رۋبلدىڭ الەمدىك نارىقتاعى باعامى كۇشەيدى. اقش-قىتاي قاتىناستارى تۇيىقتالىپ, كەيىن وڭالا باستادى. اقش-تىڭ فەدەرالدىق رەزەرفتىك جۇيەسى مەن ەۋروپا ورتالىق بانكى ستاۆكانى تومەندەتۋگە ءازىر ەكەنىن ايتتى. مۇناي باعاسى باررەلىنە 62-دەن 68-گە دەيىن كوتەرىلىپ, قايتا ءتۇستى. اقش يرانعا قاتىستى سانكسيا ەنگىزدى, تاعىسىن تاعى دەگەندەي.
بىراق ۇلتتىق ۆاليۋتاعا اتالعان جايتتاردىڭ شىبىن شاققانداي دا اسەرى بولمادى. دامۋشى مەملەكەت ءۇشىن, اسىرەسە نارىقتىق جاعدايدا بۇل وتە كۇماندى.
ساراپشىلار تەڭگە كۋرسىنا ۇلتتىق بانك ىقپال ەتىپ تۇرۋى مۇمكىن دەگەن پىكىر ايتۋدا. باس بانك ارينە بۇنىسىن جاريا ەتكىسى كەلمەيدى. ەسەپتىك قاعازداردا جالاڭ سيفرلار عانا. ونىڭ ءوزى تولىق ماعلۇمات ەمەس. الايدا تەڭگە باعامىنىڭ تۇراقتىلىعىمەن قاتار ۇلتتىق بانك رەزەرۆتەرىندە وزگەرىستەر بايقالۋدا. كەلتىرىلگەن دەرەكتەرگە قاراعاندا تەڭگە باعامىنا قاتىستى ينتەرۆەنسيا جۇرگىزىلىپ وتىرعانعا ۇقسايدى. ول تۋرالى باستى رەگۋلياتور اشىپ-جارىپ ايتار ەمەس.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر