قازاقستانعا ءقاۋىپ تونسە, ەردوعان مەن سي سزينپين ۋادەسىندە تۇرا ما؟

سي سزينپين قازاقستانعا رەسمي ساپارمەن كەلگەن كەزىندە قازاقستاندى ايماقتىق ءارى حالىقارالىق ماسەلەلەردە قولدايتىنىن جەتكىزە كەلە, "حالىقارالىق جاعداي قالاي وزگەرگەنىنە قاراماستان, قازاقستانعا تاۋەلسىزدىگىن, ەگەمەندىگى مەن اۋماقتىق تۇتاستىعىن قورعاۋىن سەنىمدى قولداۋدى جالعاستىرامىز" دەگەن سوزدەر ايتتى. ءسيدىڭ بۇل سوزدەرىن حالىقارالىق باسىلىمدار شارتاراپقا تاراتتى.

وسى سارىنداعى سوزدەردى تۇركيا تاراپىنان دا ەستىگەنبىز. پرەزيدەنت تايىپ ەردوعان "قازاقستاننىڭ مەملەكەتتىلىگىن مويىندامايتىن, قازاق جەرىنە كوز الارتىپ, رەسەي يمپەرياسىن كوكسەۋشىلەرگە تۇركيا ەشقاشان باۋىرلاس قازاقستاندى قيىن جاعدايدا قالتىرمايتىنىن ايتقىم كەلەدى" دەگەن ەدى.

بيىل قازاقستان مەن تۇركيا اسكەري ىقتىماقتاستىق تۋرالى كەلىسىم-شارت جاساسىپ, قازاقستاندا anka اسكەري دروندارى ءوندىرىسىن اشۋعا كەلىسكەن. قورعانىس ءمينيسترىنىڭ ورىنباسارى سۇلتان كامالەتدينوۆتىڭ "شىنايى ءقاۋىپ تۋسا, تۇركيا اسكەرى قازاقستانعا كومەككە كەلە الادى" دەگەن ءسوزى دە تارادى سول تۇستا. ارتىنشا ول قازاقستان حالىقارالىق نورمالارعا ساي, وزگە دە ەلدەردەن كومەك سۇراي الادى دەدى. بۇنىسى كرەملدەگىلەرگە باعىتتاعانداي اسەر قالدىردى.

ساياساتتانۋشى, ەكس-ديپلومات قازىبەك بەيسەباەۆ ءىرى قوس مەملەكەت قازاقستانعا قولداۋ كورسەتكەنى جاعىمدى قۇبىلىس ەكەنىن, الايدا مۇنداي مالىمدەمەلەر ادەتتە ديپلوماتيالىق ەتيكەت ءۇشىن جاسالاتىنىن ايتادى.

&ndash؛ ەكى باسشىنىڭ دا ايتقان مالىمدەمەلەرى ديپلوماتياعا جاتادى. الايدا بۇل مالىمدەمەلەردىڭ ماڭىزىن جوققا شىعارۋعا تاعى بولمايدى. مۇنداي مالىمدەمە ۋكرايناداعى جاعدايعا بايلانىستى ايتىلىپ وتىر دەگەن ويدامىن. ءقازىر حالىقارالىق جاعداي ۋشىعىپ تۇر. ءۇشىنشى دۇنيەجۇزىلىك سوعىسقا ءبىر قادام عانا قالدى. سول سەبەپتى مۇنداي ءىرى مەملەكەتتەردىڭ قولداۋى ءبىز ءۇشىن ماڭىزدى. ەردوعان دا, سي سزينپين دە قازاقستانعا اۋىزشا تۇردە قولداۋ كورسەتىپ وتىر. الايدا مۇنىڭ ءبارى ءسوز جۇزىندە ەكەنىن دە ۇمىتپاعان ءجون. تۇركيا مەن قىتاي قازاقستانعا ءقاۋىپ تونە قالسا, تاۋەلسىزدىگىمىزدى ساقتاپ قالۋعا ءىس جۇزىندە قولداۋ كورسەتەدى دەپ نىق سەنىممەن ايتا المايمىن. ويتكەنى مەملەكەتتەر اراسىندا مۇنداي ماسەلەگە قاتىستى ارنايى كەلىسىمدەر, شارتتار بولادى. مىسالى, قاڭتار وقيعاسى كەزىندە ۇقشۇ قازاقستانعا نە سەبەپتى كىردى؟ سەبەبى ولار بەلگىلى ءبىر كەلىسىمگە, زاڭعا سۇيەنىپ قازاقستانعا كومەك كورسەتتى. سول سەكىلدى قىتاي مەن تۇركيا ەلدەرىمەن دە بەلگىلى ءبىر كەلىسىمشارتتار بار. مۇنداي جاعدايدا قازاقستان مۇشەلىك ەتەتىن باسقا دا ۇيىمدار دا ارنايى ەرەجەگە سايكەس شەشىم شىعارادى, &ndash؛ دەيدى قازىبەك بەيسەباەۆ. ؛

ساياساتتانۋشى ءقازىر ءۇشىنشى دۇنيەجۇزىلىك سوعىستىڭ اۋىلى الىس ەمەس, قازاقستان بيلىگى حالىق اراسىنداعى بىرلىكتى ساقتاپ قالۋعا كۇش جۇمساۋى كەرەك دەپ سانايدى.

&ndash؛ ارينە, حالىقتىڭ بيلىككە دەگەن وكپەسى بار. ءبىراق قانشا قيىن بولسا دا حالىق پەن ۇكىمەت ءبىر بولۋى كەرەك. ءدال وسىنداي قيىن-قىستاۋ كەزەڭدە ءبىزدى بىرلىك قانا ساقتاپ قالا الادى. مۇنى قوعام دا, حالىق تا, ەڭ باستىسى بيلىك تە ءتۇسىنىپ, سوعان ساي ارەكەت جاساعانى ءجون. كوپ ماسەلە ۇكىمەتكە بايلانىستى شەشىلەدى. سوندىقتان بيلىك حالىقتىڭ جاعدايىن جاساپ, تىنىشتىقتى, اۋىزبىرشىلىكتى ساقتاپ قالۋى قاجەت, &ndash؛ دەيدى ساياساتتانۋشى.