فوتو: الەش ازدانحانۇلى
2019 جىلى ءبىر تۇندە 20 باس سيىرىن ۇرلاپ كەتكەن ؛الماتى وبلىسى اقسۋ اۋدانى قىزىلاعاش اۋىلىنىڭ تۇرعىنى الەش ازدانحانۇلى ۇرلانعان سيىرلارىنىڭ ءبىرى جاقىندا قوراسىن تاۋىپ كەلگەنىن ايتادى. ءىرى قارالارى دا, ۇرلىقشىلار دا تابىلادى دەگەننەن كۇدەر ۇزگەن اقساقال ەندى ۇرلىق ءىسىن قايتا اشىپ, تەرگەۋدى جالعاستىرۋعا ايعاق پايدا بولدى دەپ وتىر.
2020 جىلعى 5 قازاندا "قامشى" رەداكسياسىنا الەش ازدانحانۇلىنىڭ كەلىنشەگى كاماش ؛نۇردانبەكتىڭ حاتى شىققان. ول جەردە جوعالعان جيىرما باس سيىردى ىزدەۋگە جەرگىلىكتى پوليسيا قىزمەتكەرلەرى قۇلىق تانىتپاي وتىرعانى, تەرگەۋ بارىسىندا قيسىنعا كەلمەيتىن, كۇدىك ۇيالاتاتىن جاعدايلار بولعانى ايتىلادى. قامشى رەداكسياسى الماتى وبلىسىنىڭ اكىمىنە رەسمي ساۋال جولداپ, ءىس ءتيىستى ورگاندارعا جۇكتەلدى دەگەنگە ساياتىن جاۋاپ العان. الايدا قولدى بولعان مال تابىلماعان.
ەندى مىنە, ۇرلانعان سيىردىڭ ءبىرى قوراسىنا ءوز اياعىمەن كەلىپ وتىر. ؛الەش ازدانحانۇلى قوراسىنىڭ ماڭىندا سيىرى موڭىرەپ تۇرعانىن تاڭ اتقاندا كورىپ, قۇناجىن كەزىندە قولدى بولعان سيىردى جازباي تانيدى. ونىڭ ۇستىنە ءوزى سالعان ەن مەن تاڭبا دا تۇر.
كەزىندەگى ۇرلىقتىڭ ىزىنە ءتۇسىرىپ قالا ما دەپ, اۋىلدىق whatsapp توپقا قوراسىنا بوتەن مال كەلىپ تۇرعانىن جازادى. ۇزاماي جاندوس ەسىمدى اۋىلداسى "سيىردىڭ يەسى مەن" دەپ كەلەدى. وعان ءمان-جايدى تۇسىندىرەدى. اڭگىمەلەسۋ بارىسىندا جاندوس سيىردى كادىربەك دەگەن اۋىلداسىنان ساتىپ العانى انىقتالادى. ؛الەش ازدانحانۇلى اۋىلداسى كادىربەكپەن سويلەسكەنىندە ول سيىردى وزىمدىكى دەپ بولمايدى. الەش اقساقال "مال مەنىكى" دەيدى. الەش ازدانحانۇلى "ۇزاماي جانجالعا كادىربەكتىڭ قىزى ارالاسىپ, سيىر وزدەرىنىكى ەمەس دەگەننەن كەيىن عانا كادىربەك ءىرى قارانى اۋىل ماڭىنداعى فازەندادان ساتىپ العانىن ايتتى" دەيدى. الەش ازدانحانۇلىنىڭ سوزىنشە, فازەنداداعىلار بىرەسە مال بىزدىكى ەمەس, بىرەسە بىزدىكى دەپ ەكى سويلەيدى.
جوق ىزدەگەن اقساقال كادىربەك پەن فازەنداداعىلاردىڭ ىم-جىمى ءبىر ما دەپ كۇدىكتەنەدى. ەندى پوليسياعا شاعىم ءتۇسىرىپ, ۇرلىق ءىسىن تەرگەۋدى قايتا جانداندىرعىسى كەلەدى. ءبىراق كوكەيىندە قىلمىستىق ءىستى كەزىندەگىدەي جىلى جاۋىپ قويا سالا ما دەگەن قورقىنىشى تاعى بار.
الەش ازدانحانۇلى قىزىلاعاش اۋىلىندا مال ۇرلىعى ءورشىپ تۇرعانىن, ۇرلىقشىلار تالاي ەلدى قان قاقساتىپ, كوپ جاعدايدا تابىلمايتىنىن ايتادى. پوليسيادا ۇرلىقشىلاردى قورعاپ, ءىسىن جاۋىپ وتىراتىن قامقورشىسى بولۋى مۇمكىن دەگەن ويى دا جوق ەمەس.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر