11 قازان, 2019 ايتتى-ەي, باۋىرىڭ!
توپتىڭ تۋىن كوتەرگەندەر جولىڭا توپىراق شاشتى ەكەن, دەپ, xالىقتىڭ قالاۋىنان قالىس قالا المايسىڭ. جۇزدەگەن "جاناشىرلارىم" دولداندى ەكەن دەپ, ميلليونداردىڭ ماڭىز بەرگەن شاقىرتۋىنان باس تارتا المايسىڭ...
وتانشىل جاستاردىڭ ۇيىمداستىرۋىمەن جۇزەگە اسقان, اقتوبەدەگى ەكى كۇندىك كەزدەسۋىمىز جوعارعى دەڭگەيدە ءوتتى. ءبىرىنشى كۇنى اقتوبەدەگى س. بايشەۆ اتىنداعى وبلىستىق امبەباپ-عىلىمي كىتاپحاناسىندا جيىلعان جۇرتتىڭ قاۋمالاعان ىستىق ىقىلاسىنا كۋا بولدىق.
بىلگەنىمىزبەن بولىستىك. سۇراقتارعا اشىق, شىنايى جاۋاپ بەردىك. اقساقالداردىڭ باتاسىن الىپ, ءىنى-قارىنداستاردىڭ جۇرەگىنە جىلۋ, بولاشاعىنا ءۇمىت سىيلاۋعا تىرىستىق.
p.s. ؛ارنايى توپتىڭ تاپسىرىس بەرۋىمەن, الەۋمەتتىك جەلىدە وتىرىپ, مۇقىم xالىقتىڭ اتىنان پىكىر ايتاتىن بەلگىسىز بوتتار مەن فيتناشىل فەيكتاردىڭ ماقساتى جۇزەگە اسا قويماس. از قازاقتىڭ اراسىنا سىنا قاعىپ, بىرىن-بىرىنە ايداپ سالىپ, ۆيرتۋالدى الەمنىڭ ء"بىر تۋارىنا" اينالعىسى كەپ جۇرگەندەردىڭ دە تۇپكى ماقساتىن پاراساتتى قاۋىم ءبىلىپ وتىر.
بىرنەشە كۇننىڭ ىشىندە, ارنايى زەرتتەي وتىرىپ, مەنىڭ پوستتارىمنىڭ استىنا جازىلىپ جاتقان پىكىرلەردىڭ يەسى بەلگىلى ادامدار ەمەس, ءبىر قولدان شىققان فەيك شابۋىلدار, ونداعان جالعان اككاۋنتار ارقىلى ارانداتۋشى ءماتىندى اتقىلاپ وتىرعان, اقپاراتتىق كيللەرلەر ەكەنى بەلگىلى بولدى.
"شىركىن-اي, مەن سىزگە سەنىپ ءجۇر ەدىم, مىناۋىز ۇيات بولدى", "xالىقتان كەشىرىم سۇرا, وڭباي ءسۇرىندىڭ", "ەلدىڭ رۋxىن سىندىرۋعا جىبەرىلگەن, وكىمەتتىڭ وكىلى" دەگەن سياقتى, ءبىر وقىعاندا سەنىمىڭدى جاۋلاپ, جۇرەگىڭە قونا قالاتىن ارانداتۋشى, الدارقاتۋشى جازبالاردىڭ بىرنەشە پەندەنىڭ جۇزەگە اسىرۋىمەن, جۇزدەگەن اككاۋنتتاردان جولدانىپ تۇرعانى قانداي وكىنىشتى.
"حالىقتىڭ ءبارى قارسى بوپ جاتىر" دەگەن پىكىر قالىپتساتىرۋعا تىرىسىپ, تىنىش جاتقان جۇرتقا دۇربەلەڭ تۋعىزىپ, جاناشىر جۇرتتىڭ جۇرەگىن اۋىرتىپ, ءارى-سارى كۇيگە ءتۇسىرىپ, ەلدى ەكىگە ءبولىپ, سانانى سانسىراتۋ -دۇشپاننىڭ ەجەلگى ءتاسىلى, كانىگى ايلاسى.
الەۋمەتتىك جەلىدەگى ات توبەلىندەي ادامدار ايعايعا سۇرەن قوسىپ, وتقا ماي قۇيىپ وتىرعانى بولماسا, قايمانا قازاق, قارايعان xالىق ءوز شارۋاسىمەن شۇعىلدانىپ, ءوز جولىمەن كەتىپ بارا جاتىر...
تىپتەن كەيبىر وتانداستارىمىزدىڭ مۇنداي شۋعا كوڭىل ءبولىپ, كوكىرەگىن كىرلەتۋگە ۋاقىتى دا, مۇرشاسى دا جوق...
ميلليونداعان جازىلۋشىلارىم بولىپ, ون مىڭداعان قولداۋشى لايكتار مەن ريزا پىكىرلەردىڭ يەسى بوپ وتىرسام دا, xالىقتىڭ اتىنان سويلەپ, ۇرلەنىپ, ۇلكەندىك كورسەتۋگە ءارى ۇيالامىن, ءارى ول ۇلتقا قىزمەت ەتەتىن ۇرپاققا جاراسار قىلىق ەمەس ەكەنى انىق نارسە.
"كوپتىڭ اۋزىن كۇزەتسەڭ كۇن كورمەيسىڭ, دەپ اباي جارىقتىق ايتقانداي, ۇمتىلعانمەن ۇرىسىپ, الارعانمەن ايتىسىپ وتىرۋعا ۋاقىتىم دا, قۇلقىم دا جوق.
قارا جەردەي سالماقتى, سارى التىنداي ارداقتى ساليxالى xالىق ءبارىن كورىپ, ءبارىن ءبىلىپ وتىر...
ەلدى ارانداتىپ جاتقاندار بار شىعار, ءبىراق ونىڭ ءتول پەرزەنتىنە دەگەن ماxابباتىن ەشكىم بۇركەپ, ىقىلاسىن ەشكىم تارتىپ الا المايدى!
اقىل سۇرايتىن اقساقال تاپپاي, سەنىم ارتاتىن سەركەلەر بولماي ابىرجىپ تۇرعان, نەگاتيۆ داۋىلداردان كوز الدى ءبۇلدىراپ, وسەك پەن ىرىتكىدەن جۇرەگى سىعىلىپ, كىمگە سەنەرىن بىلمەي ابدىراپ تۇرعان الاش جۇرتىما اللا جار بولسىن!
ەلىمىز امان, جەرىمىز تۇتاس, زامانىمىز تىنىش بولسىن!
اقتوبە جۇرتىنا ريزا xالدە, باتىرى مەن اقىنى, جىراۋى مەن ۇستاسى, دارىگەرى مەن ۇستازى الەمگە ۇلگى شاشقان شالقار ەلىنە جول تارتتىم...
مۇحامەدجان تازابەكتىڭ فەيسبۋك پاراقشاسىنان الىنعان
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر