07 قازان, 2019 ايتتى-ەي, باۋىرىڭ!
مۇحامەدجان باۋىرىمنىڭ اقتالىپ جازعان جازباسىن وقىدىم. مەنى قاتە اقپاراتقا الدانۋدىڭ ناتيجەسىندە ەموسيامەن وزىنە قارسى پىكىر جازىپتى دەگەن سىڭايدا اڭگىمە ايتىپتى. وۋ, مۇحامەدجان باۋىرىم, سوزدەرىڭە قارسى شىعىپ, ساعان رەنجىگەن مەن عانا ەمەس, بۇكىل حالىق قوي. بۇل ەكەۋمىزدىڭ ارامىزداعى جەكە باستىڭ داۋى ەمەس. مونتاجدالعان دەپسىڭ. كەز كەلگەن ۇزاق ۆيدەو قىسقارتىلادى. ەگەر قىسقارتقاندا ماعىنا وزگەرىپ كەتسە, وندا وزىڭمەن كەلىسەمىن. ءتىپتى ءوزىڭدى قورعايمىن. ءبىراق نە ايتقىڭ كەلگەنى اپ-انىق تۇر عوي. "مەككەدە ناماز وقىعان ادامدى جامباسىنان وڭدىرماي تەبۋگە رۇقسات بەرىپ قويعان ءدىن قانداي ءدىن" - دەگەن كۇدىكتى ساۋال اركىمنىڭ ويىندا قالدى. قاسيەتتى قاعبا الدىندا كەيبىر ادامداردىڭ اللاعا بەرىلىپ كەتىپ قولايسىز جەرگە ناماز وقىعانىن شەشۋدىڭ قۇيىمشاققا قاتتى تەبۋدەن باسقا وركەنيەتتى, ادام ءقادىرىن كەتىرمەيتىن باسقا مادەنيەتتى جولى جوق پا, سوندا؟ مىنە وسى سوزدەرمەن ءدىننىڭ ءقادىرىن كەتىردىڭ. جانە بۇل ءسوزىڭدى, ياعني, ءدىني ارگۋمەنتتى كوشەگە شىققان حالىقتى جاسىنا قاراماي اياماي قاماۋعا, پوليسيانى قايراۋ ءۇشىن ايتقانىڭنىڭ قاي جەرى مونتاج؟ سوسىن كوشەگە بىرەۋ الدانىپ شىعادى, ەندى بىرەۋ تارىعىپ شىعادى. ءقايسىبىرى ادىلەتتىك ىزدەپ, ازاماتتىق پوزيسياسىن ءبىلدىرۋ ءۇشىن شىعادى. پوليسياعا "الاڭداعى حالىق بىرەۋىڭنىڭ اكەڭ, بىرەۋىڭنىڭ اناڭ, اپكە-قارىنداسىڭ. مەملەكەتتىڭ قاۋىپسىزدىگىن دورەكىلىككە بارماستان ساقتاڭىزدار. اسىرەسە جاسى ۇلكەن كىسىلەرگە قاتتى كەتىپ جاعدايدى ودان ءارى ۋشىقتىرىپ, حالىقتى اشىندىرىپ الماڭىزدار" - دەسەڭىز ناعىز جاناشىرلىق, شىنايى مەملەكەتشىلدىك بولار ەدى. تالاي پوستىمدا دا اشىق ايتىپ ءجۇرمىن. مەن رەۆوليۋسيانى قولدامايمىن. ءبىراق ادىلەتسىزدىكتى ايتۋعا, جەتكىزۋگە ءتيىسپىز. ادىلەتسىزدىكتى ايتۋعا ءتيىس ادامدار تەك سارايدى ماداقتاعاننىڭ ناتيجەسىنە مەملەكەتمىزدە كوپتەگەن بىلىقتار ورىن الىپ جاتىر. حالىق وزىڭنەن تارازىنىڭ باسىن تەڭ ۇستاپ مەملەكەتىمىزدەگى تالان-تاراجدى, جەمقورلىقتى, ىسىراپشىلدىقتى, ادىلەتسىزدىكتى دە ايتۋىڭدى قالايدى. ءبىرجاقتى ۋاعىزعا حالىق مەزى بولعان.
سوسىن وزىڭە عانا وڭاشا ايتاتىن ەكەۋمىزدىڭ ارامىزداعى جەكە باستىڭ ماسەلەسى ەمەس قوي. ۆيدەوڭ بارلىق الەۋمەتتىك جەلىدە كەڭ تاراپ, حالىق مەنسىز دە قىزۋ تالقىلىپ جاتقان بولاتىن. مەن ءدىن ادامى رەتىندە ءوز پوزيسيامدى ءبىلدىردىم, قاتە سوزدەرىڭدى سىنادىم.
"مونتاج" - دەپ اقتالماي-اق, "كەيبىر سوزدەرىم مەن مىسالدارىم ورىنسىز بولىپتى, ەموسيامەن ايتىلعان قاتە ءارى ارتىق سوزدەر ەكەن. سول ءۇشىن حالىقتان كەشىرىم سۇرايمىن" دەسەڭ حالىق باسقاشا قابىلدار ەدى. ءاردايىم حالىقتىڭ جانىندا بولۋعا ءتيىس ءوزىڭ سياقتى اقىنعا وسى جاراسار ەدى. اسىل ارنانى جابۋعا قاتىستى پىكىرلەرگە قوسىلمايمىن. ونى قاداعالاپ وتىرعان مەملەكەت پەن قمدب ماماندارى بار.
مەن ءوز ويىمدى ايتتىم, ءوزىڭ دە وعان جاۋاپ بەردىڭ. ەندى وسى جەردەن توقتايىق. حالىق اق-قاراسىن ءوزى اجىراتادى. ارتىق كەتكەن جەرىم بولسا, كەشىرىم سۇرايمىن.
قايرات جولدىبايۇلىنىڭ فەيسبۋك پاراقشاسىنان الىندى
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر