"؛ەكى باسشىنىڭ دا قالا اتىن اۋىستىرۋ, ءسوز اۋدارۋ, تەرمين جاساۋدان باسقا جۇمىستارى جوق پا؟!"؛

"رەپاتريانت" دەگەن تەرمين بار. ماعىناسى - "تاريحي وتانىنا ورالۋشى" دەگەن. تاريحي وتانىنا قايتىپ ورالعان گرەكتەردى, نەمىستەردى, ورىستاردى, ەۆرەيلەردى سول ەلدەر قالاي اتايدى, وسى حالىقارالىق تەرميندى قالاي قولدانادى - مەن بىلمەيمىن. ال قازاقتار 1997 جىلعى "كوشى-قون تۋرالى زاڭدا" وسى تەرميندى (رەپاتريانت) "ورالمان" دەپ قازاقشالادى. قازاقستانعا (تاريحي وتانىنا) ورالعان قازاق قر ازاماتى اتانىپ, ءتولقۇجاتىن العانشا عانا "ورالمان" (رەپاتريانت) بولادى. قالاي قر ازاماتى بولىپ, قولىنا كوك ءتولقۇجات تيەدى - بىردەن "ورالمان" ستاتۋسىنان ايرىلىپ, كادىمگى قازاقستاندىق قازاقتىڭ بىرىنە اينالىپ شىعا كەلەدى. راس, سوناۋ 1958 جىلى-اق ەلگە كەلگەن قابدەش ءجۇمادىلوۆتىڭ ءوزىن ءالى كۇنگە "قىتاي" دەۋدەن تىيىلمايتىندار وسىدان ءبىر جىل (بەس جىل, ون جىل, جيىرما جىل) بۇرىن كەلىپ, الدەقاشان قر ازاماتى بولعانداردى ءالى دە "ورالمان" دەي بەرۋى مۇمكىن (كىمنىڭ اۋزىنا قاقپاق بولا الامىز؟). ءبىراق "ورالمان" (رەپاتريانت) مارتەبەسىنىڭ شىنايى ءمانى وسى عانا, ياعني ۋاقىتشا ستاتۋس. تىلىمىزگە ءسىڭىستى بوپ, كوز ۇيرەنىپ, قۇلاق قالىپتاسىپ قالعان ءسوز.

ال ەگەر "ورالمان" دەگەن ءسوز ۇناماسا, سول باياعى رەپاتريانتتى قايتارىپ الىڭىزدار! ويتكەنى "باۋىرلاس" تا, "قانداس" تا "تاريحي وتانىنا ورالۋشى" دەگەن ماندەگى تەرميننىڭ جۇگىن كوتەرە المايدى. ۋاقىتشا ستاتۋس بولا المايدى. "باۋىرلاس" - جالپىلاما ۇعىم: باۋىرلاس حالىق تا كوپ, باۋىرلاس قالالار دا بار. "قانداس" تا سول - شەتتەن كەلگەن قازاق قانداس تا, وسى قر-دا تۋىپ-وسكەندەر قانداس ەمەس پە سوندا؟) ونىڭ ۇستىنە "رەپاتريانتتى" "قانداس" دەپ الساق, تاريحي وتانىنا كوشىپ كەلۋشى قازاق تەك قر ازاماتتىعىن العانشا عانا "قانداس" (رەپاتريانت) بولادى دا, كوك ءتولقۇجات قولىنا تيە سالا "قانداس" بولماي شىعا ما؟) تەرمين ءسوز دەگەن مۇنداي بىتىقى-شىتىقى ەمەس, ايقىن دا انىق بولۋى كەرەك.

شەتتەن كەلگەن اعايىننىڭ, جالپى كوشى-قون سالاسىنىڭ شەشىلمەي جاتقان شارۋاسى شاش ەتەكتەن. سولارعا باسا ءمان بەرۋدىڭ ورنىنا وسىنداي "اسا ماڭىزدى مەملەكەتتىك ماسەلەنى" پرەزيدەنت اۋزىنا سالىپ جۇرگەن كىم ەكەن؟ وسى ەلدەگى ەكى باسشىنىڭ دا قالا اتىن اۋىستىرۋ, ءسوز اۋدارۋ, تەرمين جاساۋدان باسقا جۇمىستارى جوق پا؟!

 ؛

ساكەن سىبانبايدىڭ ؛facebook ؛پاراقشاسىنان الىندى