مارزيا بەكايدار: "؛ايەلگە ءتان تارتىمدىلىقتىڭ ءبىز بىلمەيتىن قانداي قۇپيالارى بار؟"؛

جانى نازىك بولعانىمەن, بولمىسى ەرەك ايەل زاتى قاشاندا ءومىردىڭ بۇرالاڭ ساتتەرىنە توتەپ بەرە الاتىن كۇشكە يە. ول كەمەڭگەر ۇرپاق تاربيەلەۋ ءۇشىن ءوزىن-وزى كۇن سايىن دامىتىپ, ءبىلىمىن تولىقتىرىپ وتىرۋى كەرەك. ءۇي شارۋاسىمەن قاتار كاسىبىن جۇرگىزىپ, ەرىنىڭ رازىلىعىنا بولەنۋى تاعى بار. ويتكەنى ول &ndash؛ ايەل, ول - الەمنىڭ اناسى. قىز-كەلىنشەكتەرگە جۇكتەلگەن شارۋالاردىڭ سانىن تاڭدى-تاڭعا ۇرىپ تىزبەكتەي بەرۋگە بولادى. دەگەنمەن, وسىنشاما ءىستىڭ ورتاسىندا ءجۇرىپ بارىنە ۇلگەرۋ مۇمكىن بە؟ وتباسى قۇندىلىقتارىن ساقتاپ, ەرىڭمەن ۇزاق تا باقىتتى عۇمىر كەشۋدىڭ قانداي قۇپيالارى بار؟ تۇرمىستىڭ يلەۋىندە كەتپەي ءوزىڭنىڭ ايەلگە ءتان تارتىمدىلىعىڭ مەن ومىرگە قۇشتارلىعىڭدى قالاي ساقتاپ قالۋعا بولادى؟ وسى سۇراقتاردىڭ جاۋابىن qamshy.kz اقپارات اگەنتتىگى بەلگىلى پسيحولوگ مارزيا بەكايداردان سۇراعان بولاتىن.

- ايەلگە ءتان تارتىمدىلىقتى كورسەتە ءبىلۋ ءۇشىن, كوپتەگەن قىز-كەلىنشەكتەرگە ءوزىن-وزى جوعارى باعالاۋ قاسيەتى جەتىسپەي جاتادى. ءوزىن باعالاۋ پسيحولوگياسىن قالاي قالىپتاستىرۋعا بولادى؟

كەز كەلگەن ادامدا ءوزىن-وزى باعالاۋ سەزىمى تۇراقتى ەمەس. اسىرەسە, ايەل ادامداردا مۇلدەم تۇراقسىز. بىزدەگى كوپتەگەن قىز-كەلىنشەكتەردى كىشكەنتايىنان ءوزىن-وزى تومەن باعالاۋعا تاربيەلەگەن. ادام ءاردايىم وز-وزىنە باعا بەرۋى كەرەك. ءبىزدىڭ بويىمىزداعى باعالاۋ داعدىسىن قالىپتاستىراتىن اتا-انا, مۇعالىمدەر, اعا-اپكەلەرىمىز ەكەن. ويتكەنى ولار ءبىزدى دۇرىس وتىرۋعا, قاتتى سويلەمەۋگە, ارتىق جۇگىرمەۋگە, ءجونسىز قىلىق كورسەتپەۋگە تاربيەلەدى. بۇل وتە دۇرىس. الايدا, ونىڭ قاراما-قايشىلىقتارعا تولى جاعى دا جوق ەمەس. ايەلدەردىڭ بارلىعى ءبىرتۇرلى بولۋدان قورقادى. ءبىز كوپشىلىكپەن بىردەي بولىپ جۇرسەك جەتەدى دەپ ويلايمىز. ەرەكشە بولساق, كۇلەتىندەي, ەرەكشە بولساق ۇرساتىنداي, ەرەكشە بولساق ءبىزدى قابىلدامايتىنداي كورىنەدى. ءبارى قانداي سونداي بولىپ جۇرە بەرەيىك دەيمىز. ايەلدەر عانا ەمەس, جالپى ادامزاتتىڭ جاراتىلىسى سونداي. سول سەبەپتى ءوزىن-وزى باعالاۋدى كوتەرۋدىڭ بىرنەشە جولى بار.

بىرىنشىدەن, ايەل ادام ءوز-وزىن بار بولمىسىمەن قابىلداۋى كەرەك. ءار ادامنىڭ بويىندا جاقسى جانە جامان قاسيەتتەر بار. ءبىز ءوزىمىزدىڭ جاقسى جاعىمىزدى دامىتۋ ءۇشىن, جامان قاسيەتتەرىمىزدى قابىلداۋىمىز كەرەك. ەگەر مەن ءوزىمنىڭ كەمشىلىكتەرىمدى قابىلداماسام, ءوزىمنىڭ جاقسى قاسيەتتەرىمدى دامىتا المايمىن. ادامداردىڭ بارلىعى بىردەي ەمەس. ءبىراق بارلىعىمىز شىندىعىنا كەلگەندە, ىشتەي قورقاقپىز.

ەكىنشىدەن, اتا-انامەن قارىم-قاتىناستى جاقسارتۋ. ويتكەنى اتا-انامىزدىڭ داۋىسىنان ءبىزدىڭ ءوز-وزىمىزدى جوعارى باعالاۋدىڭ داۋىسى شىعادى. اتا-انامەن قارىم-قاتىناس جاقسى بولسا, اناسى قىزىن ماقتايتىن بولسا, ءاربىر ىسىنە ريزا بولسا ول ادام قوعامدا ءوز-وزىن جوعارى ۇستايتىن بولادى.

ۇشىنشىدەن, ءوز-وزىمىزدى باعالاۋدىڭ تاعى ءبىر جولى ۇنەمىز ىزدەنىس, دامۋ ۇستىندە بولۋ. جەتىستىككە تالپىنعان كەزدە ءوزىمىزدى باعالاۋىمىز ارتا تۇسەدى. كىتاپ وقۋ, سۇيىكتى ىسىڭىزبەن اينالىسۋ وسىنىڭ بارلىعى ومىرىڭىزگە وڭ اسەر ەتەدى.

تورتىنشىدەن, ءبىز وزگەلەرگە پايدالى بولساق ءوزىمىزدى باعالاي باستايمىز. ويتكەنى ءسىز ءوزىڭىزدى شىنىمەن دە كەرەك ادام ەكەنىڭىزدى سەزىنەسىز. وزگەلەرگە قول ۇشىن بەرىپ, ودان ايتارلىقتاي العىس الاماساڭىز دا كومەكتەسىپ پايدالى بولعانىڭىز ءۇشىن راحاتتاناسىز.

- ءبىر سەمينارىڭىزدا وتباسى تىنىشتىعىن ساقتاۋ ءۇشىن ەر-ازاماتقا ايتاتىن جانە ايتپايتىن ءسوز بولادى دەدىڭىز. ول قانداي سوزدەر؟

ەر ادامعا ەشقاشان ونىڭ كەمشىلىگىن بەتىنە باسپاڭىز. ايتقىڭىز كەلىپ, جارىلىپ بارا جاتساڭىز دا سابىر ساقتاڭىز. ايتقىڭىز كەلگەن كۇننىڭ وزىندە دە ونى باسقاشا جولمەن جەتكىزۋ كەرەك. ونى قالاي ايتۋعا بولادى؟ سىزگە كۇيەۋىڭىزدىڭ بويىنان نە ۇنامايدى؟ مىسالى, كۇيەۋىنىڭ كەش كەلگەنى ۇنامايدى دەلىك. ادەتتە, ايەلدەردىڭ جاۋابى بىرەۋ. ولار مىندەتتى تۇردە ايقايعا باسادى. ءبىراق كۇيەۋى كەشىگۋىن توقتاتپايدى. ال ەگەر كەشىگىپ كەلسە, كۇلىپ قارسى الىپ, بارلىعىن داۋ-دامايسىز شەشىپ, اقىرىنداپ ءتۇسىندىرۋ كەرەك. مىسالى: «؛سەن كەش كەلەسىڭ. سەنى كۇتىپ وتىرىپ, جۇرەگىم اۋىردى. سەنى قاتتى ساعىندىم. سەن ەرتە كەلگەندە مەن سونداي باقىتتى بولامىن»؛, - دەپ ايتىپ كورىڭىز. ول ەرتەسى 10 مينۋتقا ەرتە كەلەدى. سول كەزدە: «؛جانىم, سەن بۇگىن ەرتە كەلدىڭ عوي»؛, - دەپ ماقتاپ, قۋانىڭىز. سودان كەيىن بارلىعى جايىمەن رەتكە كەلەدى. ءبىزدىڭ ۇنەمى كوڭىلىمىز تولماي جۇرەدى. كوڭىلى تولمايتىن ايەلدىڭ كۇيەۋى مىندەتتى تۇردە ءوزىن ومىردە جولى بولماعان اداممىن دەپ ەسەپتەيدى. ويتكەنى ول ايەلىن باقىتتى ەتە المادى. ەر ازامات ءۇشىن ايەلىنىڭ باقىتتى بولۋى ماڭىزدى. سول ءۇشىن قيىن بولسا دا ءاردايىم كۇلىپ جۇرۋگە تىرىسىڭىز.

- ايەل باقىتتى بولۋ ءۇشىن تابىستى بولۋى ماڭىزدى ما؟

مەن وسىدان 2-3 جىل بۇرىن, ايەل ۇيدە وتىرىپ بالا-شاعاسىن قاراسا, سول باقىت دەپ ايتاتىنمىن. ءبىراق ءقازىر كوپ ايەلدەر ۇيدە وتىرعان جوق. ەگەر ايەل ادام ءوزىن تەك بالا-شاعاسىنا, ۇيىنە ارناسا كەيىن بالالارى ءوسىپ, جان-جاققا كەتكەندە ءۇيى بوسايدى. ۇيدە بالا-شاعا جوق, تەك كۇيەۋى ەكەۋى عانا. سول كەزدە ايەلدەر وزدەرىن قويارعا جەر تاپپاي كەتەدى. ويتكەنى, ولار ءومىر بويى, تاڭنان كەشكە دەيىن بالالارىنا قاراپ, تاماق بەرىپ, ساباعىنا جىبەرىپ ۇيرەنىپ قالعان. ءوزىن سونىمەن الداپ كەلگەن. بالالارى ءوسىپ ءوز جولدارىمەن كەتكەندە ەشكىمگە كەرەك ەمەستەي سەزىنەدى. ارى قاراي نە ىستەرىن بىلمەگەندىكتەن, سانالى تۇردە وزىنە اۋرۋ شاقىرا باستايدى. ياعني, قارايتىن بالا-شاعا جوق پا؟ وندا وز-وزىنە اۋرۋ تىلەپ, سول اۋرۋمەن الىسىپ جۇرەدى. ويتكەنى ادام ءاردايىم ءبىر ىسپەن اينالىسىپ وتىرۋى كەرەك. بالالارى ەسەيىپ كەتكەن, 40-45 جاستاعى ايەلدەردىڭ كوبىسى اۋىرادى. ويتكەنى ولاردا باسقا جۇمىس جوق. مەنىڭ بۇدان ۇققانىم, ايەل ادامنىڭ بويىندا ءبىر ماماندىق, ءبىر ىسكە دەگەن يكەمدىلىك بولۋ كەرەك. ول دەگەنمىز كۇنى بويى 12 ساعات مەمەلەكەتتىك جۇمىس ىستەۋ دەگەن ءسوز ەمەس. بالاسىن باقسىن, ءۇيىن تازالاسىن, كۇيەۋىنىڭ بابىن تاپسىن, ءبىراق كۇنىنە 2-3 ساعاتىن سول بويىنداعى ماماندىعىنا ارناسىن. 1-2 ساعات ءوز ىسىمەن اينالىسسا ول جەردە ايەل ادام انا ەمەس, جار ەمەس, ءوزىن تۇلعا رەتىندە قالىپتاستىرادى. ادامدارمەن ارالاسادى, تاجىريبە الماسادى, ەڭ باستىسى وزىنە كەرەكتى ەنەرگيانى جينايدى. ۇيىنە كەلگەن كەزدە كوڭىل-كۇيى كوتەرىڭكى بولىپ, بارلىعىن جاقسى كورىپ تۇرادى. ال ەگەر تاڭنان كەشكە دەيىن ءۇي شارۋاسىمەن وتىرا بەرسە, ايەل جۇدەپ ەشكىمدى كورگىسى كەلمەيدى.

- نەگىزگى ماماندىعىم &ndash؛ بۋحگالتەر دەدىڭىز. ءقازىر بۋحگالتەر بولىپ جۇمىس ىستەۋگە كەلىسەر مە ەدىڭىز؟

مەن جارتى جىل بۋحگالتەر بولىپ جۇمىس ىستەدىم. جارتى جىل قينالدىم. نە ءۇشىن مەن بىرەۋدىڭ اقشاسىن ساناۋىم كەرەك؟ نە ءۇشىن مەن ميلليون سانايمىن, ءبىراق بۇل ميلليون مەنىكى ەمەس؟ وسى سىندى ساۋالدار مازالادى. نەگىزى بولمىسىمنان شىعارماشىلىق ادامى بولعاندىقتان ەسەپ-قيساپپەن اينالىسىپ, ساناپ وتىرۋ قيىن بولدى. 10 جىل كيمەپ-تە وقىدىم. كەيىن پسيحولوگيانى زەرتتەپ, كۋرستارعا قاتىسىپ وسى جۇمىسىم باستالدى. نەگىزى ادام قولىنان كەلەتىن ءىستى اتقارۋ ءۇشىن جاراتىلادى. اللا ادامدى جاراتار كەزدە بويىنا ءبىر تالانتتى مىندەتتى تۇردە بەرەدى. ءارقايسىمىزدىڭ اتقاراتىن ميسسيامىز بار. سول ميسسيامىزدى مىندەتتى تۇردە جۇزەگە اسىرۋىمىز كەرەك. ايتپەگەن جاعدايدا, ادامنىڭ جانى قينالادى. ومىردە ءوز ورنىمىزدى تاپپايىنشا, ءبىزدىڭ جۇرەگىمىز تىنىشتالمايدى.

- ايەل ادامنىڭ بويىندا حاريزما بولۋ كەرەك دەگەندى ءجيى ەستىپ جاتامىز. كەيبىر ايەلدەر اسقان سۇلۋ بولماسا دا اينالاسىنداعىلاردى بىردەن ەلىتىپ الاتىن قاسيەتكە يە. ەندى بىرەۋلەرىنىڭ حاس سۇلۋلىعىنا قاراماستان ماڭىنا ادام جۋىمايدى. جالپى حاريزما ادام بويىنداعى تۋا ءبىتتى قاسيەت پە؟ الدە ونى ۋاقىت وتە كەلە دامىتۋعا بولا ما؟

مىسالى, ءبىر انشىلەر بار, داۋىسى جوق بولسا دا حاريزماسىمەن حالىقتى اۋزىنا قاراتىپ الادى. داۋسى بولماسا دا, ونى بارلىعى جاقسى كورىپ تىڭدايدى. ول اللادان بەرىلەتىن, نە بولماسا بەرىلمەيتىن قاسيەت دەپ, كەيبىر پسيحولوگتار ايتىپ جاتادى. مەنىڭ ويىمشا, حاريزماسى جوعارى ادامدار &ndash؛ ولار وز-وزدەرىن قابىلداعان ادامدار. ولار وزدەرىنىڭ كۇشتى جاقتارىن بىلەدى. وزدەرىنىڭ مىقتى تۇستارىنا باسىمدىلىق جاساي الادى. سول سەبەپتى حاريزماسى جوعارى بولىپ كورىنەدى. ەنەرگيا, حاريزما بارلىعى, ارينە, اللادان. الايدا ادامدا ءوزىن-وزى دامىتۋعا مۇمكىندىك كوپ. ءسىز ءبىلىمدى, كۇشتى بولساڭىز ءوز مۇمكىندىكتەرىڭىزگە سەنىمدى بولا تۇسەسىز.

- ءار نارسە سالىستىرۋمەن باعالانادى عوي. ءسىز ءوزىڭىزدى بۇرىنعى جانە قازىرگى قالپىڭىزبەن سالىستىراسىز با؟

مەن مۇلدەم باسقا ادام بولدىم. 20 جاسىمدا, ەرتە تۇرمىسقا شىقتىم. مەنى اتا-انام ەركە قىلىپ ءوسىردى. وتە تاكاپپار ەدىم. ءبىراق اللا ماعان سول تاكاپپارلىعىم ءۇشىن قيىنشىلىق بەردى. قيىندىقتاردى كورۋ ارقىلى, اللاعا شۇكىر, وزگەردىم. سىناقتار بولماسا, ءومىرىم وزگەرمەس ەدى. قيىنشىلىقتى دا ادامدار ءارتۇرلى قابىلدايدى. مىسالى, بىرەۋلەر قيىنشىلىق كورسە بولدى جىندانىپ, كۇيزەلىسكە ءتۇسۋى مۇمكىن, ەندى بىرەۋلەرى ول قيىنشىلىقتاردى العا جىلجىپ, ءوسۋ دەپ قابىلدايدى. كەز كەلگەن قيىنشىلىقتان جاقسى جاققا قاراي وزگەرىپ شىققان ءجون. ادام اۋىردىڭ استىمەن جەڭىلدىڭ ۇستىمەن جۇرگىسى كەلەدى. ءبىراق ولاي بولمايدى. سابىر ساقتاۋ دەگەن قاسيەت ءارقايسىمىزدىڭ بويىمىزدا بولۋ كەرەك.

سۇحباتتاسقان: مارجان سابەت