سەنىم كەڭەسى سەنىمسىز ادامداردان قۇرىلدى ما؟

كەشە كەڭەس قۇرامىنداعى جۋرناليست داۋرەن قۋات ەلدى سابىرعا, ءالىپتىڭ ارتىن, ءىستىڭ بارىسىن باعۋعا شاقىرىپ, جاقسىلىقتان ءۇمىت ۇزبەيىك دەپ ۇندەۋ تاستادى. الايدا سول ءۇمىت وتىن بيلىكتىڭ ءوزى ءسوندىرىپ وتىرعان جوق پا؟!

بۇل ءسوز ارىعا بارماعاندا جاكىشەۆتىڭ كۇنى كەشەگى سوتتا مەرزىمىنەن بۇرىن بوساتىلماۋىن تىلگە تيەك ەتسەك تە جەتىپ قالاتىن شىعار. ءيا, كوپشىلىك جاكىشەۆ بوستاندىققا شىعادى دەپ كۇتتى. بيلىكتىڭ ديالوگ قۇرۋ ارەكەتتەرىن جاقسىلىققا جورىعان جۇرت سەمەيدەگى ءىستىڭ وڭ شەشىلەتىنىنە سەندى. ءبىراق سەنىم اقتالمادى. بۇل كەرى پروسەستى ىسكە قوستى. قوعامدىق كۇدىك كۇشەيىپ, جوعارى جاقتىڭ جاقىنداسۋ پيعىلىنا كۇمان قويۋلانا ءتۇستى.

كۇماننىڭ قويۋلانۋىنا اسەر ەتكەن تاعى ءبىر ماسەلە &ndash؛ جەر داۋى. پارلامەنت ارى قاراپ, بەرى قاراپ الەۋمەتتىك تولقۋدان كەيىن موراتوريي جاريالانعان "شەتەلدىكتەرگە جەر بەرۋ تۋرالى" باپتاردى وزگەرىسسىز كۇيىندە اتالعان كەڭەس قاراۋىنا بەردى. بىتپەيتىن بۇل نە دەگەن تالقىلاۋ؟! وعان دەيىن جەر كوميسسياسى ءارقايسىسى 4-7 ساعاتقا سوزىلعان 8 وتىرىس وتكىزىپ, تالقىلاۋدىڭ ء«؛تۇبىن»؛ ءتۇسىردى ەمەس پە؟! سونداعى قارالاتىنى "جەر شەتەلدىكتەرگە جالعا بەرىلە مە, جەكەمەنشىككە ساتىلا ما؟" دەگەن ەكى سۇراق. بۇل ماسەلەدەگى حالىق ۇستانىمى امبەگە ايان. ەندى سونى ءسوزبۇيداعا سالىپ, ەلدىڭ جۇيكەسىن ءجۇن قىپ تۇتكەن كىمگە وپا؟ باسى اشىق ماسەلەنى ساعىزشا سوزعانداعى «؛بيلىكتىڭ ويلاعانى جەردى ءتۇبى ساتۋ»؛ دەپ جۇرگەن وپپوزيسيا ءسوزى راس بولعانى ما؟

وسىندايدا "قوعامدىق كەڭەس الداۋسىراتقىش ايلا" دەپ جۇرگەندەردىڭ سوزىندە جان بار ما دەپ قالاسىڭ. ايتپەسە, ۇكىمەت, پارلامەنت باردا وزگە ديالوگ الاڭىنىڭ قاجەتى نە؟! ول ورگانداردىڭ نەگىزگى قىزمەتى بيلىك پەن حالىق اراسىندا التىن كوپىر قۇرۋ ەمەس پە ەدى؟! دەمەك بيلىك جاريالى بولماسا دا اتالعان ورگانداردىڭ بۇقارامەن بايلانىس ورناتا الماي وتىرعانىن مويىنداپ وتىر. ءبىراق بۇل دا كەڭەس قۇرۋعا سەبەپ ەمەس-تى. ەلدى نە تولعانتاتىنى, قازاق قوعامىنىڭ ايناسىنا اينالعان فەيسبۋكتە-اق كورىنىپ تۇر عوي. مونيتورينگ جاسايتىن ادامداردى ايتپاعاندا, بۇگىندە ءاربىر اكىم, مينيستر الەۋمەتتىك جەلىگە تىركەلگەن. ءبارىن كورىپ, ءبىلىپ وتىر. ءبىراق ماسەلەنى شەشۋدىڭ ورنىنا لوندونعا بارعان ساپارىنان ۆيدەو سالىپ, الەم استاناسىنىڭ كەرەمەتتىگىن ايتۋدا.

جاۋىر بولسا دا ايتايىق, سەنىم كەڭەسىنە سەلكەۋ ءتۇسىرىپ تۇرعان سەبەپتىڭ ءبىرى &ndash؛ ونىڭ قۇرامى. ونى جوعارى جاقتىڭ ءوزى جاساقتادى. دەپۋتاتتاردى ايتپاعاندا ساراپشى دەگەندەردىڭ ءبىرلى جارىمى بولماسا, دەنى وگىزدى دە ولتىرمەي, اربانى دا سىندىرماي جۇيەنى سىناعانسىپ جۇرگەندەر. پرەزيدەنت سايلاۋىنان سوڭ ولاردىڭ كوبىنەن كوپشىلىكتىڭ كوڭىلى ابدەن قالعان. وسىلايشا, سەنىم كەڭەسى سەنىمسىز ادامداردان قۇرىلدى ما دەگەن ساۋال تۋادى.