بۇل امەريكا ەمەس, شارىن شاتقالى: ۆۆس ارناسى جەتىسۋ تۋرالى روليك ءتۇسىردى (ۆيدەو)

ەلباسى نۇرسۇلتان نازارباەۆتىڭ  «رۋحاني جاڭعىرۋ» باعدارلاماسىن جۇزەگە اسىرۋ ارقىلى  جەتىسۋ جەرى كوركەم تابيعاتىن الەمگە تانىتتى. 

وبلىستىق ىشكى ساياسات باسقارماسى الەمگە ايگىلى ۆۆس تەلەكومپانياسىمەن بىرلەسىپ جەتىسۋ جەرىنىڭ كوركەم تابيعاتىن تاريحىمەن بايلانىستىرىپ بەينەروليك ءتۇسىردى دەپ  حابارلايدى qamshy.kz اقپارات اگەنتتىگى  inform.kz سايتىنا سىلتەمە جاساي وتىرىپ.

ۆيدەونى جەر شارىنىڭ 571 ميلليوننان استام كورەرمەنى تاماشالادى. «بۇل بەينەروليكتى «مير تۆ» تەلەارناسى روتاسيالاعاندىعى, ونى 150 ميلليون كورەرمەن كورگەندىگى بەلگىلى بولدى. قازىرگى ۋاقىتتا «جەتىسۋ» بەينەروليگى تمد ەلدەرىن كەڭىنەن قامتۋدا»,  – دەدى الماتى وبلىسى بويىنشا «رۋحاني جاڭعىرۋ» جوبالىق كەڭسەسى جشس-نىڭ ديرەكتورى دانا دۇيسەنوۆا.

جەتىسۋدىڭ سۇلۋ تابيعاتىن, ۇلتتىق ساياباعىن, مۇراجايلارى مەن تاريحي جەرلەرىن تۋريستەرگە تەرەڭىرەك ناسيحاتتاۋ  ماقساتىندا «جەتىسۋ-360»  جوباسى دا قولعا الىندى.

كەز-كەلگەن ادام ارنايى ءموبيلدى قوسىمشا جانە سايت ارقىلى الماتى وبلىسىنا ۆيرتۋالدى تۇردە ساياحات جاساي الادى. 

جالپى «رۋحاني جاڭعىرۋ» باعدارلاماسى باستاۋ العان 2 جىل ىشىندە الماتى وبلىسىندا 642 جوبا ناقتى جۇزەگە اسقان. 

ونىڭ ىشىندە 319 جوبا 2017 جىلى ورىندالسا, 2018 جىلى 323 جوبا جەمىسىن بەرىپتى. وسىنداي جوبالاردى جۇزەگە اسىرىپ جاتقان الماتى وبلىسىنىڭ بيىلعى جىلعا دا جوسپارى  اۋقىمدى.

«جەتىسۋ جىبەك جولىنىڭ باستاۋى» اتتى جاستار ەكسپەديسياسى, «جاھانداعى زاماناۋي قازاقستاندىق مادەنيەتتى ىلگەرىلەتۋ» تاقىرىبىندا i حالىقارالىق عىلىمي-تاجىريبەلىك كونفەرەنسياسى,  «تامىرى تەرەڭ ءالىپبي» انتولوگيالىق جيناعىن شىعارۋ؛  «وربۇلاق شايقاسىنىڭ تاريحي قويىلىمى» جوباسى, «كوشپەندىلەر تاريحي قولونەرى» فەستيۆالى,  يۋنەسكو-نىڭ دۇنيەجۇزىلىك مۇراسىنا جاتاتىن وبلىس نىساندارىنا ەكسپەديسيا, «جەتىسۋ – ءىنجۋ-مارجان»  اتتى ءداستۇرلى اندەر مەن كۇيلەردىڭ انتالوگياسى جيناعىن شىعارۋ, «sport fest» وليمپيادالىق سپورت تۇرلەرىنەن فەستيۆال جانە تاعى دا باسقا جوبالار.

بەكىتىلگەن جوبالار مەن ءىس-شارالار جوسپارىنا سايكەس 2019 جىلدىڭ ءى توقسانىندا وبلىس بويىنشا 20 مىڭنان استام ادامنىڭ قاتىسۋىمەن 19 جوبا مەن 257 ءىس-شارالار ۇيىمداستىرىلدى. 2019 جىلدىڭ ءساۋىر ايىنان باستاپ الماتى وبلىسىنىڭ تىلدەردى دامىتۋ جونىندەگى باسقارماسىنىڭ باستاماسىمەن «جاڭا الىپبيدە جازىپ ۇيرەنەيىك» ونلاين-ساباق جوباسى باستالدى. 20 مينۋتتىق ونلاين-ساباققا 100-دەن اسا تىڭداۋشى قاتىسقانى بەلگىلى بولدى. الداعى ۋاقىتتا  ۆەبيناردى اپتاسىنا 3-5 رەت وتكىزۋ جوسپارلانىپ وتىر», – دەدى  دانا دۇيسەنوۆا. 

  سونىمەن قاتار, ماماننىڭ ايتۋىنشا,  2-4 مامىر كۇندەرى قازاق-قىرعىز باۋىرلاستىعىن, مادەنيەت پەن ادەبيەت, عىلىم جانە وزگە دە سالالار بويىنشا بايلانىس ورناتىپ, تاجىريبە الماسۋ ماقساتىندا «ۇلى دالانىڭ ماڭگىلىك   ميراسى – ماناس» تاقىرىبىندا قىرعىز-قازاق زيالىلارىنىڭ iii فورۋمى ۇيىمداستىرىلادى. شاراعا شامامەن 500-گە جۋىق شەتەل قوناقتارى مەن  زيالى قاۋىم وكىلدەرى  قاتىسادى دەپ كۇتىلۋدە.

bbc worldwide كوممەرسيالىق وكىلدىگىنىڭ باسشىسى سەرگەي ستانوۆكين ءوزىنىڭ فەيسبۋكتەگى پاراقشاسىندا: وتكەن جىلدىڭ جاز ايلارىندا ءبىز قازاقستاننىڭ الماتى وبلىسىندا بىردەن بىرنەشە جوبالاردى تۇسىردىك. ونداعى قورشاعان ورتانىڭ كوركەمدىگىن بارىمەن بولىسكىمىز كەلدى.

الماتى وبلىسى جايلى ءوز كوزىمىزبەن كورىپ, اياعىمىزبەن باسقان جازىق دالا, ەرتەگىدەگىدەي تاۋلار, كەرەمەت كولدەر مەن تىنىسىڭدى كەڭىتەتىن تاۋدان اققان تاسقىن سۋلار جايلى بۇكىل الەمگە كورسەتىلەتىن جارنامالىق روليك ءتۇسىرىلىمىن اياقتاعانىمىزعا قۋانىشتىمىن…», – دەگەن پىكىر ءبىلدىردى.

ۇسىنعان: ماقپال سەمباي