كوروناۆيرۋس, تۇماۋ, ءتۇرلى ۆيرۋس: جۇرت قالاي امالداپ ءجۇر؟

جانار ەسىمدى الماتىلىق كەلىنشەك qamshy.kz سايتىنا پاندەميا باستالعالى ۆيرۋستان قورعانۋعا ەرەكشە كوڭىل بولە باستاعانىن جەتكىزدى.

"بۇرىن تۇماۋراتساق دارى-دارمەك ءىشىپ, ەمدەلىپ جۇرە بەرەتىنبىز. ءبىراق پاندەميا باستالعالى ۆيرۋستان ولەردەي قورقاتىن بولدىق. ونىڭ ۇستىنە دارى-دارمەك ساپاسىنا دا كۇدىگىم ۇلعايا ءتۇستى. وتباسىممەن قاراپايىم سانيتارلىق ەرەجەلەردى جاتتاپ الدىق. سىرتتان كەلسەك, بىردەن قولىمىزدى سابىنداپ جۋامىز, كيىمىمىزدى دە لەزدە اۋىستىرامىز. ودان بولەك, ۆيرۋس شىعىپ جاتىر دەگەندى ەستىسەك, ليمون شايعا كوشەمىز. ياعني, ءبىزدىڭ ۇيدەگىلەر ءسۇتتى شايدى جاقسى كورەدى. سول سۇتتەن 1-1,5 اپتاعا باس تارتا تۇرامىز. داستارقاننان ليمون تۇسپەيتىن بولادى. سونداي-اق جازدا قايناتىپ العان كامپوتتاردى شىعارامىز. ىستىق تاماقتىڭ دا سۇيىعىنا كوشەمىز: ەت اسامىز, كەسپە كوجە, كۇرىش كوجە ت.ب.وسىلاي امالداپ ۆيرۋس بەلەڭ العان كەزەڭنەن امان-ەسەن وتە شىعامىز", دەيدى ول.

ال مەكتەپ جاسىنداعى ەكى ۇلى بار الما ەسىمدى كەلىنشەك سارىمساقتى (چەسنوك) ءجيى پايدالاناتىنىن ايتادى.

"بالالار, كوبىنە تۇماۋدى مەكتەپتە جۇقتىرىپ الادى عوي. سودان كەيىن ەكى ۇلىمنىڭ موينىنا جىپكە سارىمساقتىڭ ءبىر تالىن ءىلىپ بەرەمىن. اشىق كەۋدەسىنە ءتيىپ تۇراتىنداي ەتىپ. كادىمگىدەي كومەكتەسەدى. سەنگەننەن كەيىن بە, الدە شىنىمەن دە سونداي قاسيەتى بار سەكىلدى سارىمساقتىڭ. ءبىر كۇنى ۇلىمنىڭ موينىنداعى ءجىبىن ءبىر بالا "تۇمار ما" دەپ جۇلىپ الىپتى. سويتسە كەۋىپ, سارعايىپ ۇلگەرگەن سارىمساق تالى اتىپ شىققان عوي. بالام: ء"يا, تۇمار. بۇل &ndash؛ قاسقىردىڭ ءتىسى" دەپ ءسوز تاۋىپ كەتىپتى انا ارادا", دەيدى الما بۇل رەتتەگى قىزىقتى وقيعانىڭ ءبىرىن ەسكە الىپ.

دينا دەگەن كەلىنشەك قۇيرىقمايدىڭ ەمدىك قاسيەتى بارىن, ونى, اسىرەسە بالالارعا بەرۋگە كەڭەس بەرەدى: ؛

"قازىرگى بالالار ماي جەمەيدى. ونى جەگىزەيىن دەپ كەيبىر اتا-انا ويلامايدى دا. سودان كىشكەنتاي جاسىنان ادامنىڭ ءوتى, باۋىرى اۋىرادى. نەگىزىنەن, وتتەگى قىشقىلدى ىدىراتۋ ءۇشىن ماي كەرەك. قۇيرىق مايدى شىجعىرىپ, شىجىعىن ەتكە ارالاستىرىپ وراما, سامسا ءپىسىرىپ بەرەمىن بالالارىما. ولار ءسۇيسىنىپ ونى جەپ الادى. تۇماۋ باستالىپ جاتقاندا شايعا نەمەسە پىسكەن سۇتكە ەرىگەن مايىنان ءبىر قاسىق سالىپ بەرەمىن. ۇنامايدى, ارينە. كۇشتەپ ىشكىزىپ جىبەرەمىن. ال مەكتەپكە شىعار الدىندا بالالاردىڭ قۇلاعىنىڭ ءتۇبىن, موينىن, مۇرنىن جۇقالاپ الگى مايمەن سىلاپ قويامىن. جوتەل باستالىپ جاتسا, ازداعان قۇيرىق مايعا تۋرالعان پيازدى قۋىرىپ, ىستىقتاي نانمەن جەگىزەمىن. جوتەلى ساپ تىيىلادى".

ال ارقات ەسىمدى وتاعاسى ءسپيرتتى پايدالانادى ەكەن.

"مەن, نەگىزىنەن اراق ىشپەيتىن اداممىن. ءبىراق ءسپيرتتىڭ قاسيەتى بەلگىلى عوي, ول كەز كەلگەن ميكروپتى, ۆيرۋستى جويۋعا قابىلەتتى. ونىڭ ۇستىنە قويۋلانعان قاندى سۇيىلتادى. ۆيرۋس كەزەڭى باستالعاندا تازا, بيدايدان جاسالعان قىمبات ءبىر شولمەگىن اكەلىپ توڭازىتقىشقا قويامىن. سودان تاڭەرتەڭ جانە جاتاردا جارتى ستاقاننان ۇرتتايمىن: 4-5 كۇن, شولمەك تە سول كەزدە تاۋسىلادى. تۇماۋ بولمايمىن", دەيدى ول.

جەڭىس دەگەن جىگىت, كەرىسىنشە ۆيرۋس كەزەڭىندە "ورازا" ۇستايدى ەكەن.

"يممۋنيتەتى كۇشتى ادام ۆيرۋستى جۇقتىرمايدى. ءبىراق بۇل ۆيرۋس ونى اينالىپ وتەدى دەگەندى بىلدىرمەيدى. ول باسقالارعا سەكىلدى يممۋنيتەتى كۇشتى ادامنىڭ اعزاسىنا دا شابۋىلدايدى. اعزا ونىمەن كۇرەسىپ, وعان تويتارىس بەرەدى. مىنە, وسىنداي كەزدە اعزاعا كومەك كەرەك. اعزا ۆيرۋسپەن كۇرەسىپ جاتقاندىقتان ونىڭ قىزمەتتەرى بەلگىلى ءبىر دەڭگەيدە باياۋلايدى. مىسالى, اسقازان 100 پايىز ەمەس 60 پايىز كۇشپەن جۇمىس ىستەپ تۇرۋى مۇمكىن. باسقا اعزالار دا سولاي. سوندىقتان وعان كوپ كۇش تۇسىرمەۋ كەرەك. اۋىر جۇمىسپەن اينالىسپاۋ كەرەك, سپورتپەن شۇعىلدانساڭىز ونى دا قويا تۇرعان دۇرىس دەگەندەي. ەڭ باستىسى, اۋىر تاماقتان باس تارتۋ قاجەت. بۇل اسقازاننان باستاپ ءوت, باۋىر, بۇيرەككە دە كوپ كومەك بولادى. سوندىقتان, ءوز باسىم مۇندايدا اسقازاندى الدارقاتاتىن شوپتەن جاسالعان, سول سەكىلدى سۇيىق تاماق ىشەمىن, وندا دا تويىپ الۋ دەگەندى ميىمنان سىزىپ تاستايمىن. كادىمگىدەي كومەكتەسەدى", دەيدى ول.