• usd 468.56

  • eur 497.56

  • rub 7.3

  • cny 67.18

14 شىلدە, 00:19:00
الماتى
+35°

"قازاقستان دەموكراتيالىق تاڭداۋى" قوزعالىسىن قۇرۋشىلاردىڭ ءبىرى, ساياساتكەر عالىمجان جاقيانوۆ الەۋمەتتىك جەلىدەگى پاراقشاسىندا وزىنە قاتىستى قىلمىستىق ءىستىڭ قايتا قوزعالعانىنا بايلانىستى پىكىر ءبىلدىردى. ؛

"بۇل ىستەردىڭ ءبارى مەن قۇسمۇرىن كولونياسىندا وتىرعان كەزدە اشىلعان. سوندا نازارباەۆتىڭ تاپسىرماسىمەن كولونياعا كەلگەن شابارماندار, ۇلتتىق قاۋىپسىزدىك كوميتەتىنىڭ باسشىلارى ءوز ماقساتتارىن جاسىرمادى. ولار مەنى ساياساتتان جانە قازاقستانداعى دەموكراتيا ءۇشىن كۇرەستەن باس تارتۋعا, جازباشا جانە ۆيدەو ارقىلى پرەزيدەنتتەن كەشىرىم سۇراۋعا ماجبۇرلەگىسى كەلدى. تالاپتارىن ورىنداماعان جاعدايدا ۇستىمنەن جاڭا قىلمىستىق ىستەر اشىپ, تۇرمەگە ماڭگىلىككە قامايمىز دەپ قىسىم جاسادى. ماعان قارسى كوپتەگەن دالەل بار دەپ قورقىتپاقشى بوپ, اكەلگەن جاشىكتەرىنە قاراي سىلتەگەندەرى ەسىمدە"- دەپ جازدى ساياساتكەر. ؛

عالىمجان جاقيانوۆ بۇل بوپسالارعا كونبەي, ەل باسشىلىعى بۇدان ەشتەڭە شىقپايتىنىنا كوزى جەتكەن سوڭ, ؛بيلىك ونى تۇرمەدەن شىعارۋعا ءماجبۇر بولعانىن مالىمدەدى. ساياساتكەر 2006 جىلى شارتتى تۇردە مەرزىمىنەن بۇرىن بوساتىلعانىن وسىلاي ءتۇسىندىردى.

"سودان بەرى قوزعالعان قىلمىستىق ىستەردىڭ ماتەريالدارى ساياسي قۋدالاۋ "كونتوراسىندا" جاتتى. شاماسى "x ساعاتى" جەتكەندە مەنى نوقتالاۋ ءۇشىن بيلىك سول ىستەردىڭ قاجەتى بولار دەپ ساقتاعان سياقتى. ماعان قارسى قوزعالعان ىستەر ۇمىتىلىپ كەتكەندەي بولدى. ءبىراق مەن ۇمىتقان جوقپىن. 20 جىل بويى ءوزىم جانە مەنىڭ ادۆوكاتتارىم ءتيىستى مەملەكەتتىك ورگاندارعا ارىز-تالاپتار جازىپ كەلدىك. ءار جولى ۇقك مەن قۇقىق قورعاۋ ورگاندارىنان ءتۇرلى سىلتاۋمەن ءمانسىز جاۋاپتار كەلىپ تۇردى. ەندى "قىلمىس قۇرامى جوق" دەگەن تۇجىرىممەن بارلىق ىستەر رەسمي تۇردە جابىلدى"- دەدى ول. ؛

الايدا جاقيانوۆ قىلمىستىق ىستەردىڭ جابىلۋىمەن ادىلەت ورنادى دەپ ەسەپتەمەيتىنىن جازدى. ؛

"زاڭسىز ارەكەتكە قاتىسى بولعان لاۋازىمدى تۇلعالاردى جاۋاپقا تارتۋ جايىندا زاڭگەرلەرمەن كەڭەسىپ وتىرمىن. مەن ونى كەك الۋ ماقساتىمەن جاساپ وتىرعان جوقپىن. شىن مانىسىندە ماعان جانە باسقا دا ساياسي قۋعىنعا ۇشىراعان ادامدارعا قارسى اشىلعان وسىنداي جالعان ىستەر بيلىكتىڭ ەڭ باسىندا ۇيىمداسقان قىلمىستىق توپ قالىپتاسقانىن كورسەتەدى. بۇدان بىلاي قىلمىستىق ءىستى ويدان شىعاراتىندار, اسىرەسە مۇندايدى جاساۋعا بۇيرىق بەرەتىندەر ەرتە مە, كەش پە جاۋاپقا تارتىلاتىنىن ءبىلۋى كەرەك. قازاقستاندا ەشكىم بيلىكتەن باسقاشا ويلاعانى ءۇشىن جانە بەيبىت ساياسي كۇرەسى ءۇشىن قۋدالانباۋى كەرەك"- دەپ مالىمدەدى ساياساتكەر. ؛

 ؛

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر