• usd 468.56

  • eur 497.56

  • rub 7.3

  • cny 67.18

20 شىلدە, 15:38:35
الماتى
+35°

ۋكراينا سوتى 23 جاستاعى قازاقستاندىق ؛ شىڭعىس سەيپيەۆتى "اسكەرگە جالدانۋ قىلمىسىنا" قاتىستى ءىس بويىنشا توعىز جىلعا سوتتادى. بۇل تۋرالى گراتي ۋكراين باسىلىمى سوت ۇكىمىنە سۇيەنە وتىرىپ حابارلادى.

ىس ماتەريالدارىنا سايكەس, 2022 جىلعى قازاندا سەيپيەۆتى "ۆاگنەر" جەكەمەنشىك اسكەري كومپانياسى ۋكرايناعا قارسى سوعىسۋعا كوندىرگەن. 18 قاراشادا ونى ۇشاقپەن تۇمەننەن روستوۆ وبلىسىنا جەتكىزگەن. سول جەردە ول كەلىسىمشارتقا قول قويعان. اسكەري كومپانيا وعان اي سايىن 200 مىڭ رۋبل تولەۋگە ۋادە بەرگەن. سەيپيەۆ اقشانى كەلىسىمشارت مەرزىمى اياقتالعان سوڭ الۋعا ءتيىس بولعان.

جەلتوقساننىڭ باسىنا دەيىن سەيپيەۆ اسكەري دايىندىقتان وتكەن, ودان سوڭ لۋگانسك وبلىسىنىڭ كرەمەننايا قالاسىنا بارعان. 24 جەلتوقساندا ونى دونەسك وبلىسى باحمۋت اۋدانىنىڭ ياكوۆلەۆكا اۋىلىنا جىبەرگەن. سول جەردە ول ءبىر اپتا سوعىسقان, ال 30 جەلتوقساندا تۇتقىنعا تۇسكەن.

تەرگەۋدى ۋكراينا قاۋىپسىزدىك قىزمەتى جۇرگىزگەن. تەرگەۋ نۇسقاسىنا قاراعاندا, سەيپيەۆتى تۇمەندەگى №2 كولونيادا سوعىسقا بارۋعا ۇگىتتەگەن. ول رەسەيدە زورلاۋ قىلمىسى بويىنشا 10 جىلعا سوتتالىپ, ءدال سول ۋاقىتتا جازاسىن وتەپ جۇرگەن. "ۆاگنەر" اسكەري كومپانياسىمەن جاسالعان كەلىسىمشارت بويىنشا وعان سىياقى تولەنىپ, قىلمىستىق جازادان بوساتۋ تۋرالى جازىلعان.

"ۆاگنەر" اسكەري كومپانياسى 2022 جىلعى جازدان بەرى كولونيادا جازاسىن وتەۋشىلەردى سوعىسقا ۇگىتتەۋمەن اينالىسىپ كەلگەن. كومپانيانىڭ نەگىزىن قالاعان ەۆگەنيي پريگوجين كولونيالاردى ءوزى ارالاپ, اسا اۋىر قىلمىس جاساعانداردى ۋكرايناعا قارسى سوعىسۋعا كوندىرگەن. الايدا 2023 جىلعى اقپاندا پريگوجين سوتتالعانداردى ۇگىتتەۋ توقتادى دەپ مالىمدەگەن.

قاڭتاردىڭ باسىندا پريگوجين ءبىرىنشى توپ راقىمشىلىققا ىلىنگەنىن حابارلاعان. "اگەنتستۆو" باسىلىمى مەن bbc ورىس قىزمەتىنىڭ جۋرناليستەرى راقىمشىلىق العاندار اراسىندا ۇرلىق-قارلىق, ەسىرتكى ساۋداسى, كىسى ءولتىرۋ قىلمىستارى ءۇشىن سوتتالعاندار بار ەكەنىن انىقتاعان.

مامىردا "ۆاگنەر" جەكەمەنشىك اسكەري كومپانياسى ۋكرايناداعى سوعىستا 20 مىڭ جالدامالى جاۋىنگەر وپات بولعانىن, ونىڭ جارتىسى سوتتالعاندار ەكەنىن مالىمدەگەن.

دەرەككوز: ازاتتىق راديوسى ؛

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر