• usd 468.43

  • eur 485.43

  • rub 7.67

  • cny 65.35

30 قاراشا, 01:12:57
الماتى
-1°

توقاەۆ مەرزىمىنەن بۇرىن پرەزيدەنت سايلاۋىن وتكىزۋ تۋرالى باستاما كوتەرگەننەن كەيىن ساياسي دوداعا پرەزيدەنتتىڭ وزىنەن باسقا كىم تۇسەدى دەگەن زاڭدى ساۋال تۋادى.

پرەزيدەنت مالىمدەمەسىنە العاش رەاكسيا تانىتقان 2019 جىلعى سايلاۋعا قاتىسقان ساياساتكەر ءامىرجان قوسانوۆ بولدى. ول بۇل جولعى دوداعا دا قاتىسۋعا قارسى ەمەستىگىن جەتكىزدى. الايدا قوسانوۆتى حالىق الدىڭعىداي قولداي قويا ما؟ ول جاعى ۇلكەن سۇراق...

بۇرىنعى كوممۋنيستەر, قازىرگى قازاقستان حالىق پارتياسى ۇمىتكەر ۇسىنبايتىنىن, "amanat" توقاەۆتىڭ كۋرسىن قولدايتىنىن ءمالىم ەتتى. ءاسىلى توقاەۆ پارتيا قاتارىنان شىعىپ كەتسە دە سايلاۋعا "amanat" اتىنان ۇسىنىلادى. اقجول, جسدپ, اۋىل پارتيالارى ۇمىتكەر ۇسىنۋ-ۇسىنباۋ ماسەلەسىن ءالى ناقتى شەشپەگەن. تىركەلمەگەن "ەل تىرەگى" پارتياسى دا ماسەلەنى الداعى ۋاقىتتا قاراستىراتىنىن حابارلادى.

ەل ىشىندە پرەزيدەنت بولۋعا امبيسياسى بار دەلىنەتىن باۋىرجان بايبەك پەن نۇرلان نىعماتۋلين قاڭتار وقيعاسىنان كەيىن بيلىكتەن الاستاتىلعان. ءقازىر قايدا, نە ىستەپ ءجۇر, بۇل تۋرالى اشىق, رەسمي اقپارات جوق. ەسەسىنە ەكەۋى دە قىلمىستىق ءىس فيگۋرانتى بولۋى مۇمكىن دەگەن اڭگىمە بار. ەگەر بۇل راس بولسا, وندا ولاردىڭ پرەزيدەنتتىككە جارىسقا تۇسۋگە مۇرشاسى دا جوق. اياقاستى تاۋەلسىز تۇردە تاققا تالاس جولىنا قوسىلار بولسا, الداعى سايلاۋدىڭ كوركىن قىزدىرار ەدى.

يمانعالي تاسماعامبەتوۆ. 2019 جىلدان بەرى زەينەت دەمالىسىندا بولعانمەن ءالى قاۋساپ تۇرعان جوق. قازىرگى پرەزيدەنتتەن دە جاس. ونىڭ ۇستىنە وعان ىقىلاستى ادام دا از ەمەس. الايدا ول ىقىلاستى توپ تاسماعامبەتوۆ اقوردانىڭ ويىن ەرەجەسىمەن جۇرگەنىن ەمەس, جەكە ءوزى كوپتىڭ ءسوزىن سويلەپ شىققانىن قالايدى. ال ونى تاسماعامبەتوۆ قالاي ما؟ ونداي تاۋەكەلگە بارا الا ما؟ بۇل دا ۇلكەن سۇراق.

قازاقستاندا پرەزيدەنتتىككە كانديدات ادام 40 جاستان اسقان, سوڭعى 15 جىلدا ەلدە تۇرعان, 5 جىل مەملەكەتتىك قىزمەتتە ىستەگەن بولۋى كەرەك دەگەن تالاپ بارىن ەسكەرگەندە, ساياساتپەن شۇعىلدانىپ جۇرگەن ازاماتتاردىڭ ىشىندە ۇمىتكەر بولۋعا جارارلىعى تىپتەن تارىلىپ قالادى.

سوڭعى ۋاقىتتا ساياسي بەلسەندىلىگىن جانداندىرعان بولات ءابىلوۆ نەگىزىنەن بيزنەسپەن اينالىسقان, تەك بىر-ەكى جىل دەپۋتات بولعانى بار. جانبولات ماماي مەمقىزمەتپەن ءبىر كۇن دە اينالىسپاعان, ونىڭ ۇستىنە جاسى دا جەتپەيدى, ءارى جارتى جىلدان بەرى تۇرمەدە. "haq" قوزعالىسىنىڭ جەتەكشىسى توعجان قوجاليەۆا دا مەملەكەتتىك قىزمەتتە ىستەمەگەن. بيىل 8 ناۋرىزدا ساياساتپەن اينالىسۋشى ايەلدەر كوپ بولۋى كەرەك ميتينگ وتكىزگەن بەلسەندىلەر دە مەملەكەتتىك ەمەس سەكتوردا قىزمەت ەتەدى, ءارى كوبى تىم جاس. مۇحتار جاكىشەۆ پەن عالىمجان جاقيانوۆ ءىستى بولعان, كەيىنگىسى بىرنەشە جىلدار بەرى شەتەلدە. قاجىگەلدين تۋعان توپىراعىن باسپاعالى جيىرما جىلدان استى. ءارى كەيىنگى ۇشەۋىن قوعامنىڭ كەي وكىلدەرى اتتاي قالاسا دا ولاردىڭ ءوزى پرەزيدەنتتىككە تالاسا قويادى دەۋ قيىن.

بۇگىندە ساياسي الاڭدا ءوزىن كورسەتىپ جۇرگەن مۇحتار تايجان مەن سانجار بوقاەۆ جوعارىداعى زاڭ تالابىنا ساي كەلىپ قالۋى مۇمكىن. تايجان پرەزيدەنت اكىمشىلىگىندە 4 جىل, كەيىن ۇلتتىق كومپانيالاردا, اكسيونەرلىك قوعامداردا ىستەگەن. سانجار بوقاەۆ بىرنەشە باسقارمالارعا جەتەكشىلىك ەتكەن, قىسقا ۋاقىت پرەزيدەنت اكىمشىلىگىندە ىستەگەن. الايدا قوس ازامات تا سايلاۋعا قاتىسۋ تۋرالى ازىرگە ءتىس جارمادى. تايجان ءتىپتى پرەزيدەنت سايلاۋىن مەرزىمىنەن بۇرىن وتكىزۋگە قارسى شىعىپ, وپپوزيسيانى وسى ماسەلە توڭىرەگىندە توپتاسۋعا شاقىردى.

زاڭعا ساي, پرەزيدەنت مالىمدەمەسىنەن كەيىن ەكى اي ىشىندە سايلاۋ وتۋگە ءتيىس. بۇل &ndash؛ سايلاۋ كومپانياسىن جان-جاقتى وتكىزۋگە تىم قىسقا, تىپتەن 60 كۇندە ول مۇمكىن ەمەس تە. قازىرگى پرەزيدەنتكە شىنايى باسەكەلەس بولام دەگەن ادامعا ەش مۇمكىندىك جوق. سوندا توقاەۆ ءوزى كىممەن جارىسپاق؟ قۋىرشاق كانديداتتارمەن بە, الدە الدا-جالقا سوڭعى تۇياق سەرپۋ رەتىندە شىعا قالۋى بەك مۇمكىن قولىندا ەش رەسۋرسى جوق ەسكى وپپوزيسيا وكىلىمەن بە؟ نە دە بولسا, الداعى ەكى اي بەدەرى قىزىققا ولى بولعالى تۇر.

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر