زەلەنسكييدىڭ ءسوزى ىرىلەنە باستادى

ۋكراينا پرەزيدەنتى ۆلاديمير زەلەنسكيي رەسەي اۋەبازاسىنداعى سەريالىق جارىلىستاردان كەيىن رەسەي 2014 جىلى اننەكسيالاپ العان قىرىمعا بايلانىستى سەنىمدى مالىمدەمە جاسادى.

سەيسەنبىدە قىرىمنىڭ باتىسىنداعى ؛نوۆوفەدوروۆكا ەلدىمەكەنىندەگى اسكەري اۋەبازادا سەريالىق جارىلىستار بولعان. ۋكراينا اۋە كۇشتەرى جارىلىس بولعان بازاداعى "ساكي" اۋەجايىندا رەسەيدىڭ توعىز ۇشاعىنىڭ كوزى جويىلعانىن ءمالىم ەتتى. بازانى رەسەي ۋكراينانىڭ ىشكى جاعىنا سوققى جاساۋ ءۇشىن قولدانىپ كەلگەن.

ۆۆس-دىڭ جازۋىنشا, جارىلىسقا بايلانىستى قوس تاراپ تاراتقان اقپارات ءارتۇرلى. رەسەي قورعانىس مينيسترلىگى جارىلىس وق-دارىلەردىڭ وتقا ورانۋى سالدارىنان بولدى دەسە, رەسمي كيەۆ جارىلىسقا قاتىسى جوق ەكەنىن ايتادى.

سوعىستى زەرتتەۋمەن اينالىساتىن isw ورتالىعى رەسەي ءوزىنىڭ اۋە قورعانىسى ناشار ەكەنىن اشكەرە ەتىپ الماس ءۇشىن جارىلىسقا ۋكراينانى ايىپتاي الماي وتىرعانىن حابارلادى.

وتكەن ايدا رەسەيدىڭ ەكس-پرەزيدەنتى دميتريي مەدۆەدەۆ ۋكراينا قىرىمعا شابۋىلدايتىن بولسا, قيامەت كۇنى ورنايتىنىن ءمالىم ەتكەننەن كەيىن ساراپشىلار قىرىمعا شابۋىلعا ماسكەۋ ۇلكەن كۇشپەن جاۋاپ بەرۋى مۇمكىن ەكەنىن جەتكىزگەن.

ۋكراينا پرەزيدەنتى دە كەزەكتى سوزىندە جارىلىس تۋرالى ەشنارسە دەمەدى, ءبىراق قىرىم تۋرالى سەنىمدى مالىمدەمەلەر جاسادى.

"بىز رەسەي سوعىسى قىرىمدى باسىپ الۋدان باستالعانىن ۇمىتپايمىز. بۇل سوعىس ەندى قىرىمنىڭ ازات ەتىلۋىمەن اياقتالۋى كەرەك" دەدى ول.

زەلەنسكيي بۇعان دەيىن رەسەي سوعىس باستالعان 24 اقپانعا دەيىنگى پوزيسياسىنا قايتىپ كەلسە, بەيبىتشىلىكتى ورناتۋعا كەلىسەتىنىن ايتقان. ەندى 24 اقپانعا دەيىن رەسەي قاراماعىندا بولىپ كەلگەن قىرىم ماسەلەسىن قوزعاپ وتىر. ونىڭ مۇنداي باتىل مالىمدەمەسى ۇرىس مايدانىندا ۋكراينا كۇشتەرى باسىمدىققا يە بولىپ جاتقانىن ايعاقتاۋى ىقتيمال. قازىرگى تاڭدا اسكەري قاقتىعىستار نەگىزىنەن ۋكراينانىڭ شىعىسىندا بولىپ جاتىر.