باس پروكۋراتۋرا ءبولىمىنىڭ پروكۋرورى ابرور ماماتوۆتىڭ ايتۋىنشا, تەرگەۋ مەن ىزدەۋ وپەراسيالارى اسا قۇپيا جاعدايدا وتەدى. تەرگەۋدى مەملەكەتتىك قاۋىپسىزدىك قىزمەتى, باس پروكۋراتۋرا, ءىىم, ۇلتتىق گراۆديا وكىلدەرىنەن تۇراتىن ارنايى توپ جۇرگىزەدى.

اتالعان ايىپ قانشا ادامعا تاعىلعانى ازىرگە بەلگىسىز. ؛ۇلتتىق گۆاديا ءباسپاسوز قىزمەتىنىڭ جەتەكشىسى داۆپون جۋمانازاروۆ بۇعان دەيىن 1-2 شىلدەدە دەمونستراسيا ورنىندا 516 ادام ۇستالعانىن, كومەندانتتىق ساعات كەزىندە كوشەدە جۇرگەن 110 ادام قامالعانىن ءمالىم ەتكەن. وزبەكستان پروكۋراتۋراسى نوكىستەگى ازاماتتار مەن ميليسيا اراسىنداعى قاقتىعىستان 18 ادام قازا تاۋىپ, 94 ادام اۋرۋحانادا جاتقانىن, 243 ادام جارالانعانىن حابارلاعان. جارالىلار اراسىندا 38 قۇقىققورعاۋ ورگانى قىزمەتكەرى بار.

1 شىلدە كۇنى وزبەكستان قۇرامىنا كىرەتىن قاراقالپاقستان رەسپۋبليكاسىنىڭ استاناسى نوكىس قالاسىندا رەسمي تاشكەنتتىڭ وزگەرتۋ ارقىلى كونستيتۋسيادان اۆتونوميانىڭ تاۋەلسىزدىك جاريالاۋ قۇقىعىن جويۋ جوسپارىنا قارسى جاپپاي نارازىلىق باستالىپ, بيلىك ازاماتتاردى كۇشپەن تاراتقان. 2 شىلدەدە پرەزيدەنت شاۆكات ميرزيەەۆ قاراقالپاقستاننىڭ ستاتۋسىنا بايلانىستى وزگەرتۋلەردەن باس تارتىپ, 3 شىلدەدە اۆتونوميا اۋماعىندا توتەنشە جاعداي رەجيمى ەنگىزىلدى.

وزبەكستاننىڭ رەسمي بيلىگى نارازى ازاماتتاردى "قىلمىسكەر" دەپ اتاپ, ارەكەتتەرىن "زاڭسىز" دەپ وتىر. قاراقالپاقستانداعى جاعداي تۋرالى جەتىپ جاتقان اقپارات ماردىمسىز. الەۋمەتتىك جەلىلەردە ميليسيا ادامداردى ساباپ, قان بولعان كوشەنى جۋۋىپ جاتقان ۆيدەولار تاراۋدا.