• usd 477.98

  • eur 488.93

  • rub 7.93

  • cny 70.82

08 تامىز, 05:03:02
الماتى
+21°

بەلگىلى اقىن, قوعام قايراتكەرى, قازاقستاننىڭ ەڭبەك ەرى مۇحتار شاحانوۆتىڭ 80 جىلدىق مەرەيتويى قارساڭىندا الماتىدا ۇلتتىق قۇندىلىقتار اسسوسياسياسى قوعامدىق ۇيىمىنىڭ ۇيىمداستىرۋىمەن "جىگەرلەندىرۋ" اتتى فورۋم ءوتتى.

ىس-شارا مودەراتورى جۋرناليست ارمان قۇدايبەرگەن فورۋم اتاۋى اقىننىڭ ولەڭىمەن اتتاس قويىلۋى كەزدەيسوق ەمەستىگىن, مۇحتار شاحانوۆتىڭ شىعارماشىلىعى مەن قايراتكەرلىگى ۇلتتىڭ ۇپايىن تۇگەندەۋ, مۇددەسىن قورعاۋدا اركىمگە ءاردايىم جىگەر سىيلايتىنىن اتاپ ءوتتى.

"فورۋمدى وتكىزۋ تۋرالى وي تۋىنداعاندا ەل الدىندا جۇرگەن ازاماتتاردىڭ باسىن ءبىر جەرگە توعىستىرۋ قيىنعا سوعاتىنىن ايتىپ, ويلارىنان اينىتپاق بولعاندار, كوڭىلگە كۇدىك ۇياتقاندار كەزدەستى" دەگەن ول بۇگىنگى فورۋم ۇلتتىق ماسەلە دەگەندە ءتۇرلى كوزقاراس, الۋان ۇستانىمداعى ازاماتتار, زيالى قاۋىم وكىلدەرى ءبىر جەرگە جينالا الاتىنى كورسەتكەنىن مالىمدەدى.

فورۋم مەرەيتوي يەسىنە ءسوز بەرۋدەن باستالدى. مۇحتار شاحانوۆ جينالعاندارعا ءوزىن ءالسىز اقىن سانايتىنىن ايتىپ, كەلۋشىلەرگە العىس ءبىلدىردى. ارتىنشا ءبىراۋىز ولەڭ وقىدى.

ىزىنشە فورۋمعا ارنايى شاقىرىلعان سپيكەرلەر اقىننىڭ شىعارماشىلىعىندا ارقاۋ ەتكەن, قايراتكەرلىك قىزمەتىندە اينالىسقان ماسەلەلەر تۋرالى ءسوز سويلەدى.

فوتو: qamshy.kz

اقىن, فيلولوگيا عىلىمدارىنىڭ دوكتورى باۋىرجان جاقىپ قولىنا قالام ۇستاعان كەز كەلگەن اقىن مۇحتار شاحانوۆتىڭ شىعارماشىلىعىنا سوقپاي كەتپەيتىنىن اتاپ ءوتىپ, كۇزدە اقىننىڭ مەرەيتويى جازۋشىلار وداعى دەڭگەيىندە كەڭ كولەمدە اتالىپ وتىلەتىنىن جەتكىزدى. قازاقستاننىڭ ەڭبەك سىڭىرگەن قايراتكەرى اسىلى وسمان اقىننىڭ قازاق رۋحانياتىنداعى ورنى مەن ونىڭ دامۋىنا سىڭىرگەن ەڭبەگى تۋرالى ايتتى.

فوتو: qamshy.kz

ونەرتانۋشى ەرلان تولەۋتاي مۇحتار شاحانوۆتىڭ اقىندىق ءپرينسيپى مەن مىنەزىنە توقتالىپ, بيلىككە ۇدايى باتىل مالىمدەمەلەر جاساپ, ۇسىنىستار ءبىلدىرىپ وتىرعانىنا, حالىققا ۇنامسىز ساياساتىن سىناپ, ويىن اشىق جەتكىزۋدەن تايسالماعانىنا نازار اۋداردى.

 ؛

"مۇحا, ونەر سالاسىندا بەلەڭ العان جەڭىل, ويسىز دۇنيەلەر مەن سولاردى تاراتۋشىلارعا "ىربيگۇلدەر" مەن "جىرباقايلار" دەگەن جاقسى ات قويىپ, اقىندىق پرينسيپ پەن مىنەزىن كورسەتتى" دەيدى ونەرتانۋشى.

 ؛

فوتو: qamshy.kz

قوعام بەلسەندىسى مۇحتار تايجان اقىن بەلسەنە ارالاسقان قوعامدىق-ساياسي ىستەر تۋرالى ءسوز قوزعادى. ول مۇحتار شاحانوۆ كەڭەس بيلىگى كەزىندە جەلتوقسان وقيعاسىنا باعا بەرۋ, ونىڭ شىندىعىن ايتۋ ماسەلەسىن بيىك مىنبەرلەردەن كوتەرگەنىن, ناۋرىز مەرەكەسىن تويلاۋ ءۇردىسىن جانداندىرۋعا كۇش سالعانىن, تاۋەلسىزدىكتىڭ العاشقى جىلدارى مەملەكەتتىك ءتىل ماسەلەلەسى تۋرالى باتىل مالىمدەمەلەر جاساعانىن اتاپ ءوتتى.

2007 جىلى بيلىكتىڭ "قازاقستاندىق ۇلت" يدەياسىنا قارسى شىعىپ, اسەرلى ۇندەۋ جاساعانىن, 2009 جىلى قىتايعا 1 ملن گەكتار جەر جالعا بەرۋ ۇسىنىسىنا, 2010 جىلى قازاقستاننىڭ كەدەندىك وداققا قوسىلۋعا نارازىلىق بىلدىرگەنىن, 2011 جىلى جاڭاوزەن مەن شەتپەدەگى مۇنايشىلاردى قولداپ ماڭعىستاۋعا بارعانىن, 2016 جىلعى جەر ماسەلەسىنە بەلسەنە كىرىسىپ, مىنەز تانىتقانىن ايتا كەلە, مۇحتار شاحانوۆقا "قيىن جاعدايدا حالىققا رۋح بەرەتىن ادام" دەگەن باعا بەردى.
"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر