شقو-نىڭ 30 پوليسەيى قونىس تويىن تويلادى

وسكەمەندە قازاقستان پوليسياسىنىڭ 30 جىلدىعىن مەرەكەلەۋگە ارنالعان سالتاناتتى ءىس-شارا ءوتتى.

جىل سايىن 23 ماۋسىمدا قازاقستاندا ءتارتىپ ساقشىلارى وزدەرىنىڭ كاسىبي مەرەكەلەرىن اتاپ وتەدى. بيىل قازاقستان پوليسياسىنىڭ قۇرىلعانىنا 30 جىل تولادى.

بۇگىن مەرەيتويلىق كۇنگە ارنالعان سالتاناتتى شاراعا وبلىس اكىمى, قۇقىق قورعاۋ جانە ارنايى ورگانداردىڭ باسشىلارى, ءىىم ارداگەرلەرى, ورىنداۋ كەزىندە قازا تاپقان قىزمەتكەرلەردىڭ وتباسىلارى جانە پوليسيا دەپارتامەنتىنىڭ جەكە قۇرامى قاتىستى.

ايماق باسشىسى دانيال احمەتوۆ ءوزىنىڭ قۇتتىقتاۋ سوزىندە:

"بۇگىن كاسىبي مەرەكەنى ءبىزدىڭ ءومىرىمىزدى, دەنساۋلىعىمىزدى جانە مۇلىكتەرىمىزدى ساقتاي وتىرىپ, ءتارتىپ پەن زاڭدىلىقتى كۇن سايىن قورعايتىن ادامدار اتاپ وتەدى. كۇمان جوق, ءدال ءبىزدىڭ پوليسەيلەر باتىلدىق, شىدامدىلىق پەن قايسارلىقتىڭ ۇلگىسى. تاۋەلسىزدىك جىلدارىندا قازاقستاننىڭ پوليسيا ورگاندارى بىرنەشە كۇردەلى كەزەڭدەردەن ءوتىپ, بارلىق جاعىنان ءوستى. ولاردىڭ قوعامدىق تارتىپكە, بەيبىتشىلىك پەن كەلىسىمگە, ازاماتتاردىڭ كونستيتۋسيالىق قۇقىقتارىن قورعاۋعا قوسقان ۇلەسى باعا جەتپەس. ءبىزدىڭ پوليسەيلەر قوعام مەن مەملەكەتتىڭ مۇددەلەرىن, ءبىزدىڭ رەسپۋبليكا ازاماتتارىنىڭ قۇقىقتارى مەن بوستاندىقتارىن قورعاي وتىرىپ, ءوزىنىڭ ازاماتتىق جانە قىزمەتتىك بورىشىن ودان ءارى ابىرويمەن اتقاراتىنىنا سەنىمدىمىن" دەدى.

دانيال احمەتوۆ 30 پوليسيا قىزمەتكەرىنە وسكەمەندەگى جاڭا تۇرعىن ءۇي كەشەنىنەن پاتەر كىلتتەرىن تابىس ەتتى.

"قۇقىق ءتارتىبىن قامتاماسىز ەتۋگە قوسقان ۇلەسى ءۇشىن" مەدالىمەن كۇرشىم پوليسيا ءبولىمىنىڭ باستىعى پوليسيا پولكوۆنيگى سەرىك ماناپوۆ, "ىشكى ىستەر ورگاندارىنىڭ ۇزدىگى" l دارەجەلى توسبەلگىسىمەن زايسان پوليسيا ءبولىمىنىڭ باستىعى, پودپولكوۆنيك ديدار قامزين ماراپاتتالدى.

كريمينالدىق پوليسيا باسقارماسىنىڭ باستىعى قايرات ابدىعاليەۆكە مەرزىمىنەن بۇرىن پوليسيا "پولكوۆنيگى" اتاعى بەرىلدى. اياگوز پوليسيا ءبولىمىنىڭ باستىعى قۋانىش ابىشەۆ "پودپولكوۆنيك" پوگونىن الدى.

شقو پوليسيا دەپارتامەنتىنىڭ كوپتەگەن قىزمەتكەرلەرى پوليسيانىڭ 30 جىلدىعىنا وراي كەزەكتى اتاققا يە بولدى.

قر ءىىم بۇيرىعى بويىنشا 50 پوليسەي مەرەيتويلىق مەدالدارمەن ماراپاتتالدى. 508 پوليسەيگە مەرەيتويلىق ناگرادالار, قول ساعاتتارى, گراموتالار مەن العىس حاتتار تابىس ەتىلدى.

دانيال احمەتوۆ قۇقىق قورعاۋ ورگاندارىنىڭ بارلىق قىزمەتكەرلەرىنە ولاردىڭ اۋىر ەڭبەكتەرىندە تابىس, تاڭداعان ماماندىعىنا ادالدىق, وتباسىلارىندا دەنساۋلىق پەن اماندىق تىلەدى.