• usd 468.56

  • eur 497.56

  • rub 7.3

  • cny 67.18

28 ناۋرىز, 23:24:58
الماتى
+35°

قوعامدىق كولىك ترانسپورت قۇرالى عانا ەمەس, قوعامنىڭ مورالدىق ايناسى ىسپەتتەس. ول جەردەن ءتۇرلى ادام, ءتۇرلى مىنەز كورەسىڭ.

سىپايى دا, دورەكى دە, مادەنيەتتى دە, مادەنيەتى تومەندەۋ ادامداردى دا كۇنبە-كۇن قوعامدىق كولىكتەن كەزدەستىرۋگە بولادى. جاسى كەلگەن قاريالارعا ورىن بەرگىسى كەلمەيتىن جاستاردى دا, ءوزىنىڭ ۇلكەندىگىن كولدەنەڭ تارتىپ, جاستارعا زەكىپ, نۇقىپ سويلەيتىن ۇلكەندەردى دە از بايقاپ جۇرگەمىز جوق.

اۆتوبۋستا جانىنداعىلارعا بوگەت جاساپ ساعاتتاپ اڭگىمە سوعاتىندار دا ۇشىراسىپ تۇرادى. كەيدە سونداي كىسىلەردىڭ اڭگىمەسىن ەرىكسىز ەستىگەنىڭ ءۇشىن ءوزىڭ ىڭعايسىزدانىپ قالاسىڭ. نەمەسە ۆيدەو قاراپ, ونىسىنىڭ داۋسىن قاتتى زورايتىپ قوياتىنىن جولاۋشىلار دا بولادى. جارىسىپ جولاۋشىلاردىڭ دەنساۋلىعىنا, كەيدە ءتىپتى ومىرىنە ءقاۋىپ توندىرەتىن جۇرگىزۋشىلەر دە جەتىپ ارتىلادى.

وسىنداي قاراپايىم ادەپ, جول ەرەجەلەرىن ساقتاي بەرمەيتىن ادامداردىڭ باسىم كوپشىلىگىندە اگرەسسيا باسىم ەكەنى بايقالادى. بويىمىزدى بيلەپ تۇراتىنداي اشۋشاڭ بولىپ كەتتىك پە, الدە باسىمىزدان ءسوز اسىرمايتىن مىنەز پايدا بولدى ما, ايتەۋىر ادەپسىزدەۋ جولاۋشىلارعا بىردەڭە دەسەڭ دەنى جانجالداسا كەتۋگە جاقىن. بۇل جونىندە ماماندار نە دەيدى؟ ادامداردىڭ اگرەسسياعا جاقىن بولۋىنا نە سەبەپ ەكەنىن ءبىلۋ ءۇشىن پسيحولوگيا عىلىمدارىنىڭ phd دوكتورى بالابەك ساقتاعانوۆقا جۇگىندىك.

&ndash؛ ادام بويىنداعى اگرەسسيانىڭ جالپى تابيعاتى تۋرالى ايتىڭىزشى؟

اشىق دەرەككوز

&ndash؛ اگرەسسيانىڭ ءوزى فيزيولوگيالىق اگرەسسيا, پسيحولوگيالىق اگرەسسيا بولىپ ەكىگە بولىنەدى. فيزيولوگيالىق اگرەسسياعا كۇش كورسەتۋ, ۇرىپ سوعۋ, دەنەگە زاقىم ءتۇسىرۋ جاتادى. پسيحولوگيالىق اگرەسسيا دەگەنىمىز &ndash؛ اشۋمەن قورقىتۋ, سوزبەن قورقىتۋ, بالاعاتتاۋ, رەنجىتۋ. سونداي-اق ەر ادامنىڭ اگرەسسياسى, ايەل ادامداردىڭ, بالالاردىڭ اگرەسسياسى بولادى. ەر ادامداردىڭ اگرەسسياسى كوبىنە فيزيولوگيالىق بولادى. ياعني ۇرىپ-سوعۋ, جاراقاتتاۋ تۇرىندە كورىنىس تابادى. ايەل ادامداردىكى كوبىنە ۆەربالدى تۇردە بولادى. ۆەربالدى دەگەنىمىز &ndash؛ ۇرسىسۋ, ايقايلاۋ. بالالاردىڭ اگرەسسياسى &ndash؛ كەيدە بۋللينگ ارقىلى, بىرەۋگە كۇش كورسەتۋ ارقىلى كورىنىپ جاتادى, ولار كوبىنە وتباسىنداعى قيىنشىلىقتار, پروبلەمالار, تۇرمىستىق قيىنشىلىقتار سالدارىنان شىعادى.

&ndash؛ اگرەسسيانىڭ مولشەرى ادامنىڭ بىلىمىنە, تانىم كوكجيەگىنە بايلانىستى ما؟

&ndash؛ ءيا, ادامنىڭ دۇنيەتانىمىنا, بىلىمىنە كوپ نارسە بايلانىستى. الايدا وقىعان ادامداردىڭ ءبارىن ساۋاتتى دەي المايمىز. ساۋاتتى دەگەنىمىز &ndash؛ وقىعان العان بىلىمىنەن ءبىر ناتيجە كورسەتۋ. سونىمەن بىرگە ادامدار ءار ءتۇرلى. كەيدە جوعارى ءبىلىمدى ادامدار, جوعارى جەردە قىزمەت جاسايتىن ادامدار, ورتاشا دەڭگەيدە جۇمىس جاسايتىن ادامدار, بەلگىلى ءبىر قوعامدا ءوزىنىڭ بەدەلى بار ادامدار كوبىنە اگرەسسيانى تەجەي الادى, اگرەسسيانى كورسەتپەۋگە تىرىسادى, اگرەسسيامەن كۇرەسەدى. ويتكەنى قوعامدا ولاردا بەدەل بار, سول بەدەلدى ءتۇسىرىپ الماۋ ءۇشىن, باسقا ادامداردىڭ الدىندا ءوزى جامان بوپ كورىنىپ قالماۋى ءۇشىن ولار ۇنەمى اگرەسسيانى تەجەپ وتىرادى. ادام اگرەسسيانى, مىنەز-قۇلقىنداعى اشۋ-ىزانى توقتاتا الاتىن بولسا, ونى يگەرە الاتىن بولسا, باسقا ارناعا باعىتتاي الاتىن بولسا, وندا ول بىلىمىنە بايلانىستى بولادى. بۇل جەردە دۇنيەتانىم ماسەلەسى دە اسا اڭىزدى. دۇنيەتانىمى كەڭ ادامدار اگرەسسيانى "بۇل ادام تەڭىم ەمەس, مۇمكىن ءوزىنىڭ پروبلەماسى بار شىعار" دەپ ءتۇسىنىپ راحىممەن جەڭدىرىپ قويا سالۋى دا مۇمكىن. مۇنداي ادامدار باسقا ادامدارعا اگرەسسيا تۋدىرمايدى جانە ءوزىنىڭ بويىنداعى اگرەسسيانى قاجەتتى جەتكىلىكتى دەڭگەيدە مولشەرىنەن شىعارماي تەجەي الادى.

&ndash؛ سوڭعى جىلدارى قىمباتشىلىق حالىقتىڭ قالتاسىن قاتتى قاقتى. تۇرعىندار تۇرمىسىنىڭ تومەندەۋى ولاردىڭ مىنەز-قۇلقىنا, ءىس ارەكەتىنە اسەر ەتىپ, ول قوعامدىق كولىكتەگى وقيعالاردا كورىنىس تاۋىپ جاتۋى مۇمكىن بە؟

&ndash؛ مۇمكىن. تۇرمىستىق جاعداي, كرەديت الۋ, بالالارىنىڭ وقۋىنىڭ اقشاسىن تولەۋ, كرەديتكە توي جاساۋ, كرەديتتى تولەي الماي, سونى قالاي تولەيمىن؟ دەپ ۇنەمى ۋايىمداعان ادام مىنەز-قۇلقىندا بۇزىلىستار پايدا بولادى. سونىڭ سالدارىنان ءسال نارسەگە ءوزىن-وزى ۇستاي الماي قالىپ ايقايلاپ, اگرەسسيا, ناشار مىنەز-قۇلىق كورسەتىپ جاتادى. مىسالى, وتباسىلىق پروبلەمالار, جانۇيادا ەرەگەسىپ قالۋ, كەلىسە الماۋ, جاڭا ايتىپ كەتكەن قارجىنىڭ جەتىسپەۋى, كرەديتكە كىرىپ كەتۋ, ءار ءتۇرلى ويىندار ويناۋ وسىنىڭ ءبارى ادامداردىڭ پسيحيكاسىنا قاتتى اسەر ەتەدى. بۇل ؛&ndash؛ دۇنيەتانىمدى دامىتۋدىڭ ورنىنا, ادامدا اگرەسسيا تۋدىرىپ, پسيحيكالىق پروسەسستەردىڭ جۇمىس جاساۋىنا مۇمكىندىك بەرمەيدى. اگرەسسيا الدىڭعى ورىنعا شىعىپ كەتكەندىكتەن, دومينانتتى تۇردە ادامداردىڭ ءومىر ءسۇرۋ بارىسىندا كورىنىس تاۋىپ وتىرادى. ءبىراق قوعامدىق كولىكتەردەگى ەرەگەس, ايقايدىڭ ءبارىن اگرەسسياعا جاتقىزا بەرۋگە بولمايدى. كەيدە اشۋ سپونتاندى تۇردە دە شىعادى. وعان پسيحيكانىڭ شارشاۋى, اقشا جەتىسپەۋى, ەرلى-زايىپتىلار اراسىنداعى ماسەلەلەر, بالالاردىڭ پروبلەماسى, جۇمىستاعى پروبلەما, ءتىپتى ءوزى قالايتىن قىمبات كيىمدى كيە الماۋ, قىمبات تەلەفوندى ۇستاي الماۋ سياقتى فاكتورلار دا اسەر ەتۋى مۇمكىن. جالپى, ءبىزدىڭ قوعامدا تۇرمىس دۇنيەتانىمىمىزدىڭ قالىپتاسۋىنا, دامۋىنا, باسقا ادامدارمەن, ورتامەن قارىم-قاتىناسقا تۇسۋدەگى مادەنيەتىمىزدى كورسەتەدى.

&ndash؛ ادامداردىڭ ساناسىندا, تاجىريبەسىندە اۋەلى تۇرمىس تۇزەلىپ, مادەنيەت كەيىن قالىپتاسا ما, الدە ەكەۋى قاتار جۇرە مە؟

&ndash؛ قازىرگى قوعامدا دۇنيەتانىمنىڭ قالىپتاسۋىنا, دامۋىنا, باسقا ادامدارمەن, ورتامەن قارىم-قاتىناسقا ءتۇسۋ مادەنيەتىن تۇزۋدە ؛تۇرمىستىڭ ماڭىزى زور. تۇرمىسى ءتۇزۋ ادامداردا ءبىلىم الۋعا, ءوزىن دامىتۋعا, شەتەل كورىپ تانىم كوكجيەگىن كەڭەيتۋگە مۇمكىندىك كوبىرەك. سول سياقتى الەۋمەتتىك ؛ال-اۋقاتى جاقسى مەملەكەتتەردە ءعىلىم-بىلىمدى دامىتۋعا, مادەنيەتكە, دەنساۋلىققا كوڭىل بولۋگە رەسۋرس تا, باس قا دا كوپ بولادى دا جالپى مادەني دەڭگەي جوعارى ەكەنىن بايقايمىز. ؛ونىڭ ۇستىنە بۇگىندە تۇرمىسىڭ تومەن بولسا, قانشا مادەنيەتتى بولعانىڭمەن, مادەنيەتتىلىگىڭ بايقالماي جاتادى. ال تۇرمىسى جاقسى, قىمبات تەلەفونى بار, قىمبات ماشيناسى بار, ۇلكەن ۇيلەرى بار ادامدار قانداي ارەكەتتەر جاساپ جاتسا دا, مادەنيەتتىڭ ءبىر ءتۇرى سياقتى بولىپ كەتتى. ءارى ولار سول ارقىلى وزدەرىن جوعارى مادەنيەت تۇرعىسىنان كورسەتە الادى.

&ndash؛ اڭگىمەمىزدى, قوعامدىق كولىك ادەبىنەن باستادىق قوي, سونىمەن تۇيىندەي وتىرساق. الماتىدا ەلەكتروندىق تولەم جۇيەسى ەنگىزىلگەلى جۇرگىزۋشىلەر بۇرىنعىداي "پلاننان", جانارمايدان ارتىلعان اقشاعا ەمەس, تۇراقتى جالاقىعا جۇمىس ىستەي باستادى. ۇنەمى قوعامدىق كولىكپەن جۇرەتىندىكتەن وسى ەلەكتروندىق جۇيە ەنگىزىلگەلى جۇرگىزۋشىلەر كوپ دورەكىلىك تانىتپايتىتىن بايقايمىن. سونداي-اق كەڭ, جاڭا اۆتوبۋستار كوبەيگەن سايىن جولاۋشىلار دا سالىستىرمالى تۇردە ءجيى جانجالداسپايتىنىن اڭعارامىن. دەمەك كومفورت, جۇيەلى ءتارتىپتىڭ ادام مىنەزى مەن ارەكەتىنە ۇلكەن اسەرى بار بولىپ تۇر عوي؟

&ndash؛ ارينە, قوعامدا بەلگىلى ءبىر دامۋدىڭ جاڭا فورمالارى, جاڭا تەحنولوگيالارى جۇمىس بارىسىندا وڭ ىقپال ەتەدى. جۇرگىزۋشىلەردىڭ جالاقىسى رەتتەلگەندىكتەن ولار اۆتوبۋستى ايداپ قانا ءجۇرىپ, باسقاعا باسىن اۋىرتپايدى. ال بۇرىنعىداي بولعاندا ول ۇنەمى بۇگىن قانشا تابار ەكەم, ادامداردى قالايدا كوبىرەك تيەپ الۋىم كەرەك دەگەن سياقتى پەندەشىلىك ويلاردا بولادى. جولاۋشىلار دا وزىنە ىڭعايلى جاعداي جاسالعان سايىن جايلى بولادى. اۆتوبۋس كەڭ بولسا, ادامدار دا كەڭ تۇرادى, ەشكىم ەشكىممەن كوپ سوقتىقپايدى, ءبىرى-بىرىنىڭ اياعىن مىجىپ كەتپەيدى. سوندىقتان ادامعا جاسالعان جاعداي ونىڭ مىنەز-قۇلقىنا, ارەكەتىنە اسەرى ۇلكەن.

شۋاق قايراتقىزى

شۋاق قايراتقىزى

اۆتورمەن ونىڭ facebook پاراقشاسى ارقىلى حابارلاسۋعا بولادى.

جازىلىڭىز

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر