• usd 477.98

  • eur 488.93

  • rub 7.93

  • cny 70.82

08 تامىز, 04:22:10
الماتى
+21°

18 قاڭتار كۇنى كوپتەگەن اقپارات قۇرالدارى قاڭتار وقيعاسىنداعى تارتىپسىزدىكتەر كەزىندە قىزمەتتىك يت ۇرلانىپ, ۇرلاعان ادام قولعا تۇسكەنى تۋرالى اقپاراتتى جارىسا جاريالادى. اتالعان ءىس بويىنشا كۇدىكتى رەتىندە قاماۋدا وتىرعان اڭساعان المۇحانوۆتىڭ اناسى انار ورازالينوۆا وقيعا بارىسى مۇلدە باسقاشا بولعانىن, ۇلى ءيتتى قورعاۋ ماقساتىندا وزىمەن بىرگە الاڭنان الىپ كەتكەنىن, بالاسىن ەشكىم ۇستاماعانىن, ول پوليسيا بولىمىنە تۇسىنىكتەمە جازۋ ءۇشىن ءوز اياعىمەن بارعانىن ايتادى.

انار ورازالينوۆا الماتى وبلىسى قاراساۋ اۋدانى راحات-1 ەلدىمەكەنىنىڭ تۇرعىنى. ۇلى اڭساعان المۇحانوۆقا قىلمىستىق كودەكستىڭ 380-بابى 3-بولىگى (بيلىك وكiلiنە قاتىستى كۇش قولدانۋ) بويىنشا ايىپ تاعىلىپ, 2 ايعا قاماۋعا الىنعان. وعان 7 جىلدان 12 جىلعا دەيىنگى مەرزىمگە باس بوستاندىعىنان ايرىلۋ ءقاۋپى ءتونىپ تۇر.

شەرلى انا بۇگىن الماتىداعى لا-155/18 مەكەمەسىندە جاتقان ۇلىن ەكىنشى مارتە كورىپ, كوز جاسىن كول قىلىپ شىقتى. ايتۋىنشا, ۇلىن اراشالاۋدىڭ جالعىز امالى &ndash؛ ونىڭ ءيتتى قۇتقارماق بولعانىن كورگەن ادامداردى تابۋ. ولاي بولماعان جاعدايدا الماتى قالاسى پوليسيا دەپارتامەنتى تاراتقانداي, بالاسى «؛نايتس ەسىمدى قىزمەتتىك وۆچاركانى ۇرلاعان»؛ بولىپ شىعادى. «؛پوليسيا تاراتقان اقپارات جالعان»؛ دەگەن ول وقيعانىڭ قالاي وربىگەنىنە بايلانىستى ءوزىنىڭ نۇسقاسىن ايتىپ بەردى.

 ؛

&ndash؛ بالام تاكسيلەتىپ قايتۋ ءۇشىن 5 قاڭتار كۇنى ۇيدەن شىعىپ كەتكەن. مومىشۇلى كوشەسىمەن تومەن قاراي ءتۇسىپ كەلە جاتقانىندا الدىنان ادامدار توبى شىعىپ, كولىكتەردى توقتاتا باستاپتى. ولار «؛سەندەر دە وسى ەلدىڭ ازاماتى ەمەسسىڭدەر مە, بەيبىت ميتينگكە شىعىپ, حالىق جاعدايى قيىنداپ كەتكەنىن ايتايىق. اركىم ءوز باسىن الا قاشسا, حالىق جاعدايىن جەتكىزەدى»؛ دەگەن سياقتى سوزدەر ايتىپ, بالامدى وزدەرىنە قوسىلۋعا شاقىرادى. كەيبىرەۋلەرى «؛انا جاقتا كولىگىنەن تۇسپەگەن ادامدارعا تاس لاقتىرعانىن كورگەنىن»؛ دەپ ايتىپتى. سوسىن بالام «؛مەندە حالىقپەن بىرگە ايتارىمدى ايتايىن»؛ دەپ ادامدارعا قوسىلعان. كولىگىن كوشەگە &ndash؛ ساينا-تولە بي جاقتاعى ۇيلەردىڭ ماڭىنا قالدىرعان. جولدا كولىكتەردىڭ ورتەنىپ جاتقانىن, اسكەري كيىمدى ءىشىن سىرتىنا اۋىستىرىپ كيىپ العانداردى كورەدى, الدەبىرەۋلەردىڭ «؛اسكەر حالىق جاققا ءوتتى»؛ دەپ ايقايلاپ جۇرگەنىن ەستيدى. سولاي توپپەن بىرگە قالانىڭ ورتالىعىنا قاراي جىلجيدى. ساعات تۇسكى ون ەكى شاماسىندا شەۆچەنكو كوشەسىنىڭ بويىندا نازارباەۆ پەن ابىلايحان كوشەلەرىنىڭ اراسىندا بىرەۋلەر ءيتتى ۇرىپ جاتقانىن كورەدى. يت بوس ءجۇر, اۋزىندا «؛ناموردنيگى»؛ بار. بالام ۇرىپ جاتقاندارعا جاقىنداپ, «؛بۇدا نەلەرىڭ بار»؛ دەپ يتكە اراشا تۇسپەك بولادى. سول كەزدە «؛سەن نەگە ءيتتى قورعايسىڭ, زناچيت ميليسيادانسىڭ»؛ دەپ بالامدى ۇرماقشى بولىپ, ەرەگەسىپ كەتكەن. اقىرىندا بالام ءيتتى الادى. اينالا دۇربەلەڭ بولىپ جاتقاندا ءيتتى كىمگە بەرەرىن بىلمەيدى.  ؛جان-جاعىندا نە پوليسيا, نە «؛ۆوەننىي»؛ ؛جوق. ونداي كەزدە ءيتتى ەشكىم المايتىن دا ەدى. ءوزى بۇرىنعى «؛ۆوەننىي»؛, ءش.ۋاليحانوۆ اتىنداعى كادەت كورپۋسىن قىزىل ديپلومعا بىتىرگەن. قاپشاعايداعى دشب-دا «؛سەرجانت روتى»؛ بولعان. سودان ءيتتى قالدىرماي, جەتەكتەپ الاڭعا بارادى. ول جاقتا بىردە ءبىر پوليسيا مەن اسكەري ادام جوق ەكەنىن, اتىس بولىپ جاتقانىن كورىپ, مۇنىڭ بەيبىت ميتينگ ەمەس ەكەنىن تۇسىنەدى دە 2 مىڭ تەڭگەگە تاكسي ۇستاپ, ءيتتى باگاجنيككە سالىپ, كولىگىن تاستاعان جەرگە, ارتىنشا ۇيگە كەلەدى, &ndash؛ دەيدى ول.

 ؛

انار ورازالينوۆا ۇلىنىڭ قىزمەتتىك يت اكەلگەنىنە و باستان قارسى بولعانىن جەتكىزدى. «؛قايدان عانا اكەلدىڭ, ەرتەڭ وزىڭە بالە بولىپ جابىسىپ جۇرمەسىن»؛ دەپ ازار دا بەزەر بولدىق دەيدى. بالاسى سوندا «؛ماما مۇنى تاستاسام, وبال عوي. بۇدا ءتىل جوق قوي, ۇرىپ جاتقاندا قورعادىم. بۇل ءۇشىن مەنى جاۋاپقا تارتپايدى. سول جەردە كورگەن ادامدار بار. يتتە ارنايى چيپ بولادى, سونىمەن وزدەرى تاۋىپ الادى. ارى كەتسە, تۇسىنىكتەمە جاسارمىن»؛ دەگەن.

اناسى سودان بەرى اڭساعان ۇيىندە بولعانىن, توتەنشە جاعداي رەجيمى اياقتالعانىن كۇتىپ, ءيتتى جاسىرماي, وعان ۇيا جاساپ, قامقورلىق تانىتقانىن جەتكىزدى.

 ؛

&ndash؛ بالام قانەن-قاپەرسىز, ويىندا ەشتەڭە جوق ۇيدە بولدى. 17 قاڭتار كۇنى كەلىندى جۇمىستان الىپ كەتۋ ءۇشىن نەمەرەممەن قالاعا كەتەدى. ءوزى جوقتا 3 ادام ءيتتى ىزدەپ كەلىپ, الىپ كەتىپتى. ۇيدە قۇداعيىم بولعان ەدى, سودان اڭساعاننىڭ نومەرىن العان. سودان ساعات كەشكى 6-لاردا بالاما اۋەزوۆ اۋداندىق پوليسيا بولىمىنەن حابارلاسىپ, «؛برات ءيتتى الىپ كەتتىك, كەلىپ تۇسىنىكتەمە جاسىپ كەتشى»؛ دەپ شاقىرىپتى. اڭساعان كىرەم دە شىعام عوي دەپ ويلاپ, كەلىن مەن نەمەرەمدى الىپ, پوليسيا بولىمشەسىنە بارادى. بالام بولىمشەگە كىرگەن بويدا قولىن ارتقا قايىرىپ, وپەرلەر توقپاقتاي جونەلگەن. ارادا ءبىر جارىم ساعات وتكەندە كەلىنىم حابارلاسىپ, بولعان جايتتى ايتىپ تۇر. سويتسەك, سول جەردەگى تەرگەۋشىلەردىڭ ءبىرى اڭساعانعا سەن جاڭا عانا ءوز اياعىڭمەن كەلىپ ەدىڭ عوي, ەندى نەگە كىسەندەۋلى جاتىرسىڭ دەپتى. «؛وپوزنانيە»؛ جاساماعان. ءيتتىڭ يەسى ەفرەيتور رۇستەمبەك بايقاراشەۆ دەگەن ۇلتتىق ۇلاننىڭ ساربازى ەكەن. ول ءوزىن ۇرعان ادامنىڭ ءتۇرىن كورمەگەنىن, تەك سارى «؛كۋرتكاسى»؛ بولعانىن ايتقان. ال بالامنىڭ كۋرتكاسىنىڭ ءتۇسى سۇر. ونى ساراپتاماعا جىبەرۋگە دە دايىنمىن. مەن بولىمشەگە كەلىپ, كپپ-عا جولىقتىم. ول جەردە ەكى ادام اۆتوماتمەن, بىرەۋى ازاماتتىق كيىمدە وتىردى. بالامنىڭ جاعدايىن ايتىپ ەدىم, ازاماتتىق كيىمدەگى جىگىت ءاي-شاي جوق بالامدى بۇلىكشى تەرروريست دەي جونەلدى. اللا سونىڭ الدىنا اكەلسىن. مەن بالام تەرروريست بولسا, اۆتوماتتارىڭمەن مەنى اتىڭدار, بالامدى تەرروريست جاسايىن دەپ جاتسىڭدار ما دەدىم. قايتا اۆتومات ۇستاعان بىرەۋى شىعىپ, ماعان كىرە المايتىنىمدى ايتتى. ءبىر كەزدە تەلەۆيدەنيە شاقىرعانىن, بالامدى دۆد-عا اكەتەدى دەگەندى ەستىدىك. ەرتەڭىنە كەلسەك جاۋاپ جوق, &ndash؛ دەيدى انار ورازالينوۆا.

 ؛

ەرتەسىنە كوپتەگەن اقپارات قۇرالدارى تارتىپسىزدىكتەر كەزىندە قىزمەتتىك يت ۇرلانىپ, ءيتتى ۇرلاعان ادام قولعا تۇسكەنى تۋرالى اقپاراتتى تاراتتى.

ال انار ورازالينوۆا «؛قولعا تۇسىرگەن تۇگى دە جوق, بالام پوليسياعا ءوز اياعىمەن باردى. ول تەرروريست, بۇلىكشى بولسا, نەمەسە سولداتتى ۇرسا, بولىمشەگە ءوز اياعىمەن بارا ما, جىندى ادام دا بارمايدى عوي. ونىڭ ۇستىنە ول بۇرىنعى ۆوەننىي بولعاننان كەيىن ونىڭ ءبارىن بىلەدى. قالاي بارادى»؛ دەپ اشىنادى.

ول ۇلىنىڭ اۋەزوۆ اۋدانى پوليسيا بولىمىنە ءوز اياعىمەن بارعانىن ايعاقتايتىن بەينەباقىلاۋ كادرلارى دا جوعالىپ كەتە مە دەپ ۋايىمدايدى.

20 قاڭتاردا مەملەكەتتىك ادۆوكات اڭساعان المۇحانوۆ 380-باپ بويىنشا كۇدىككە ىلىنگەنىن, تەرگەپ-تەكسەرۋ ءۇشىن سوت سانكسياسىمەن 2 ايعا قاماۋعا الىنعانىن, لا-155/18 مەكەمەسىنە جەتكىزىلگەنىن ايتقان.

انار ورازالينوۆا ون كۇننەن استام ۋاقىت تەرگەۋ يزولياتورىنداعى ۇلىن كورە الماعان. «؛كارانتين دەپ كىرگىزبەدى»؛ دەگەن ول مەملەكەتتىك ادۆوكاتقا جالىنىپ ءجۇرىپ 31 قاڭتار كۇنى ءبىرىنشى رەت بالاسىنا كىرۋگە رۇحسات العانىن ايتادى.

&ndash؛ كىرسەم, بالامنىڭ بەت-اۋزى كوگەرگەن. ءبىراق ء«؛بارى جاقسى, كەلمەي-اق قوي, ماما, كەشىرشى»؛ دەي بەرەدى. بۇگىن ەكىنشى رەت كوردىم. ەشتەڭەنى موينىنا الماعان. قانشا ۇرسا دا مويىنداتقىزا الماعان. ول مىنەزى سونداي ادام. 3-سىنىپتان بەرى ۆوەننىي بولام دەيتىن. مەن ەندى بالالارىم, نەمەرەلەرىم ۆوەننىي, پوليسيا بولام دەسە, بولعىزدىرمايمىن. كەرەك ەمەس, بىزدە ادىلدىك جوق»؛ دەگەن ول بالاسىنىڭ كىنالىلىگىن دالەلدەيتىندەي اتالعان ىستە «؛قىلمىس قۇرامى دا, كۋا دە, تۋرا دالەل دە جوق»؛ دەپ وتىر.

انار ورازالينوۆا بالاسىنىڭ يتكە اراشا تۇسكەنىن كورگەن ادامدار بولسا, ولاردان كۋالىك ەتۋدى سۇرايدى. الايدا كورگەن ادامدار ء«؛بىزدى دەپ قاماپ قويادى دەپ قورقىپ كۋالىك ەتە المايدى-اۋ»؛ دەپ قينالادى.

«؛نە بولسا دا, اقىرىنا دەيىن بارامىن, بالامدى جاپقىزىپ قويمايمىن»؛ دەيدى شەرلى انا كوزىنەن جاسى پارلاپ.

مەلىس سەيداحمەتوۆ

الماتى وبلىسى كەربۇلاق اۋدانى قىزىلجار اۋىلىندا تۋعان. ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتىن بىتىرگەن. 2015-2019 جىلدارى «پرەزيدەنت جانە حالىق» گازەتىندە ءتىلشى, شەف-رەداكتور بولىپ ىستەگەن. 2019 جىلدان بەرى قامشى پورتالىندا قىزمەت اتقارادى.

اۆتورمەن ونىڭ facebook پاراقشاسى ارقىلى حابارلاسۋعا بولادى.

جازىلىڭىز

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر