توقاەۆ بانكتەن كرەديت العاندارعا قاتىستى زاڭعا قول قويدى

پرەزيدەنت قاسىم-جومارت توقاەۆ ەكىنشى دەڭگەيلى بانكتەردىڭ كەپىلدىك ساياساتىنا قاتىستى زاڭعا قول قويدى. بۇل تۋرالى اقوردا سايتىنىڭ ءباسپاسوز قىزمەتى حابارلادى.

"مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك باسقارۋ, ەكىنشى دەڭگەيلى بانكتەردىڭ كەپىلدىك ساياساتىن, باعالاۋ قىزمەتىن رەتتەۋدى جانە اتقارۋشىلىق ءىس جۇرگىزۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا قول قويدى" دەلىنگەن حابارلامادا.

زاڭ جوباسىنىڭ نەگىزگى باعىتتارى:

• بورىشكەرگە كەپىلگە قويىلعان مۇلىكتى ءوز بەتىنشە ساتۋىنا مۇمكىندىك بەرۋ؛
• كەي جاعدايلاردا كەپىل بەرۋشىگە كەپىل نىساناسىن اۋىستىرۋعا مۇمكىندىك بەرۋ؛
• پايداكۇنەمدىك ماقساتتاردىڭ تۋىنداۋىن بولدىرماۋ ءۇشىن كەپىل ۇستاۋشىنىڭ جانە ونىمەن اففيليرلەنگەن تۇلعالاردىڭ ساتىپ الۋشى رەتىندە اۋكسيونعا قاتىسۋىنا تىيىم سالۋ.

اتقارۋشىلىق ءىس جۇرگىزۋ دەڭگەيىندە بورىشكەرگە تىيىم سالىنعان جىلجىمايتىن مۇلىكتى ءوز بەتىنشە ساتۋ قۇقىعى بەرىلەدى. باعاسى 75 پروسەنتتەن كەم بولماۋى شارت. اۋكسيوندى وتكىزۋ تارتىبىنە دە وزگەرىستەر ەنگىزىلدى. بۇدان بولەك, زاڭ جوباسىندا باعالاۋشىلاردىڭ قىزمەتىنە قويىلاتىن تالاپتار دا قاتاڭداتىلعان.

ەسكە سالا كەتەيىك, 2021 جىلدىڭ 20 قىركۇيەگىندە الماتىنىڭ اقبۇلاق شاعىن اۋدانىندا ورنالاسقان جەكەمەنشىك ءۇيدىڭ يەسى سوت ۇكىمىن ورىنداۋعا كەلگەن 5 ادامدى اتىپ تاستادى. وقيعا ورنىندا سوت ورىنداۋشىسى, ۋچاسكەلىك ينسپەكتورلار, ءۇيدىڭ جاڭا يەسى مەن ونىڭ تانىسى كوز جۇمدى.

پرەزيدەنت قاسىم-جومارت توقاەۆ بەس بىردەي ادامدى اتىپ تاستاعان بورىشكەردىڭ ارەكەتىن اقتاۋعا بولمايتىنىن باسا ايتىپ, تراگەدياعا سەبەپ بولعان نەگىزگى ماسەلەلەردى جان-جاقتى زەردەلەپ, قاجەت بولسا زاڭعا وزگەرىس ەنگىزۋدى تاپسىرعان بولاتىن.