ماڭعىستاۋ وبلىسىندا بالىق وڭدەيتىن كاسىپورىن اشىلدى

ەل تاۋەلسىزدىگىنىڭ 30 جىلدىعى اياسىندا ءتۇپقاراعان اۋدانى, باۋتين اۋىلىنا قاراستى اتاش ەلدى-مەكەنىندە «؛اتاشفيشپروم»؛ ءجشس-نىڭ بالىق وڭدەۋ سەحى ىسكە قوسىلدى, دەپ حابارلايدى ءتۇپقاراعان اۋدانى اكىمدىگىنىڭ ءباسپاسوز قىزمەتى. ؛

جوبا قۇنى 83 ملن. تەڭگە. قۋاتتىلىعى جىلىنا 292,8 توننانى قۇرايتىن كاسىپورىندا بالىقتان فيلە, فارش, ىستالعان جانە كونسەرۆىلەنگەن بالىق شىعارىلاتىن بولادى. ؛

كاسىپورىننىڭ اشىلۋ سالتاناتىنا وبلىس اكىمىنىڭ ورىنباسارى بەكبول ورىنباساروۆ پەن اۋدان ارداگەرلەرى جانە زيالى قاۋىم وكىلدەرى قاتىستى. بەكبول ورىنباساروۆ تۇرعىنداردى تاۋەلسىزدىك كۇنى مەرەكەسىمەن قۇتتىقتاپ, ايماقتاعى بالىق ونەركاسىبىنىڭ ماڭىزدىلىعىنا توقتالىپ ءوتتى. ؛

- وبلىس باسشىسىنىڭ تاپسىرماسى بويىنشا الدىمىزدا وڭىردە وندىرىلەتىن ازىق-تۇلىك تاۋارلارىنىڭ كولەمىن ارتتىرۋ مىندەتى تۇر. ونىڭ ىشىندە ەت جانە بالىق ونىمدەرىن ءوندىرۋ ءىسىن قولعا الۋىمىز ءتيىس. وسى ورايدا, ءتۇپقاراعان اۋدانى كاسىپكەرلەرىنىڭ ەڭبەگىن اتاپ وتكەن ءجون. تۇرعىنداردى جەرگىلىكتى ونىممەن قامتاماسىز ەتىپ, جاڭا جۇمىس ورىندارىن قۇرۋدا جاڭادان اشىلعان كاسىپورىننىڭ ماڭىزى زور, - دەدى بەكبول ورىنباساروۆ. ؛

سەحتىڭ تەحنيكالىق ديرەكتورى امالبەك تولەۋماعانبەتوۆتىڭ ايتۋىنشا, بالىق قالدىقتارىنان وندىرىستىك ۇن شىعارىلا باستادى. بۇل ۇندى قۇس, مال ازىعىنا جانە ەگىنشىلىككە تىڭايتقىش ەسەبىندە پايدالانۋعا بولادى. جوبا تولىق ىسكە قوسىلعاندا 15 ادامدى جۇمىسپەن قامتۋ جوسپارلانىپ وتىر. ؛

- كۇنىنە 2 تونناعا دەيىن بالىق قالدىقتارىنان ۇن شىعاراتىن قۇرىلعىمىزدى ورناتىپ, جۇمىس جۇرگىزىپ جاتىرمىز. ءقازىر ءبىر كۇندە 1 تونناعا دەيىن بالىق ۇنىن, جارتى تونناعا دەيىن قۇراما ازىق شىعارىپ جاتىرمىز. سۇرانىس بار. بۇل قازاقستانداعى وسىنداي جالعىز سەح بولعاندىقتان رەسەيدەن دە, ەلىمىزدىڭ وزگە وڭىرلەرىنەن سۇرانىستار تۇسۋدە, - دەدى امالبەك تولەۋماعانبەتوۆ.