الماتى وبلىسىنىڭ جاڭا اكىمى تانىستىرىلدى

بۇگىن قازاقستان رەسپۋبليكاسى پرەزيدەنتى اكىمشىلىگىنىڭ باسشىسى ەرلان قوشانوۆ مەملەكەت باسشىسىنىڭ جارلىعىمەن الماتى وبلىسىنىڭ اكىمى لاۋازىمىنا تاعايىندالعان قانات بوزىمباەۆتى وبلىس اكتيۆىنە تانىستىردى. وبلىستى بۇعان دەيىن باسقارعان اماندىق باتالوۆقا پرەزيدەنتتىڭ العىسىن جەتكىزدى, ؛دەپ حابارلادى الماتى وبلىسى اكىمىنىڭ ءباسپاسوز قىزمەتى.

- بۇگىن ءبىرقاتار كادرلىق وزگەرىستەرگە بايلانىستى الماتى وبلىسىنا كەلىپ وتىرمىن. مەملەكەت باسشىسىنىڭ جارلىعىمەن اماندىق عابباسۇلى باتالوۆ الماتى وبلىسىنىڭ اكىمى لاۋازىمىنان بوساتىلدى. اماندىق عابباسۇلى 7 جىلدان استام ۋاقىت جەتىسۋ وڭىرىنە باسشىلىق ەتتى. وسى جىلداردا وبلىس جاقسى كورسەتكىشتەرگە جەتتى, كوپتەگەن ءىرى جوبالار ىسكە اسىرىلىپ, بۇل ءوڭىردىڭ دامۋىنا ۇلكەن سەرپىن بەردى. مەملەكەت باسشىسى اماندىق عابباسۇلىنىڭ جۇمىسىن وتە جاقسى باعالاپ, وبلىس اكىمى لاۋازىمىندا كوپ جىل جەمىستى قىزمەت اتقارعانى, ءوڭىردى دامىتۋعا جانە وبلىستىڭ الەۋمەتتىك-ەكونوميكالىق الەۋەتىن ارتتىرۋعا ەلەۋلى ۇلەس قوسقانى ءۇشىن العىسىن جەتكىزۋىمدى تاپسىردى. اماندىق عابباسۇلىنىڭ مول تاجىريبەسى, اقىل-كەڭەسى قوعام ومىرىندە ءالى دە پايداسىن تيگىزەدى دەپ ويلايمىن.

بۇگىن وبلىستىق ءماسليحات دەپۋتاتتارىنىڭ كەلىسىمەن وسى ءوڭىردىڭ تۋماسى, بۇعان دەيىن جامبىل, پاۆلودار وبلىستارىن باسقارعان, ەنەرگەتيكا مينيسترلىگىنە جەتەكشىلىك ەتكەن, ءبىرقاتار ۇلتتىق كومپانيالاردىڭ باسشىلىعىندا بولعان, وتە تاجىريبەلى ىسكەر باسشى قانات الدابەرگەنۇلى بوزىمباەۆ پرەزيدەنتتىڭ جارلىعىمەن الماتى وبلىسىنىڭ اكىمى بولىپ تاعايىندالدى. الماتى وبلىسىنىڭ دامۋىن پرەزيدەنت ەرەكشە نازاردا ۇستايدى. سوندىقتان جاڭا اكىم العا قويعان مىندەتتەردى لايىقتى اتقارادى دەپ سەنەمىن, - دەگەن ەرلان قوشانوۆ قانات بوزىمباەۆتى جاڭا قىزمەتىمەن قۇتتىقتاپ, جۇمىسىنا ساتتىلىك تىلەدى.

مۇنان سوڭ اماندىق باتالوۆ ءسوز الىپ, الماتى وبلىسىندا قىزمەت ەتكەن 20 جىلداي ۋاقىتتا جەتىسۋ جەرى تۋعان ولكەسىندەي ىستىق مەكەنگە اينالعانىن ايتتى.

- ەڭ الدىمەن كەزىندە مەنى جوعارى لاۋازىمعا تاعايىنداپ, مىندەت ارتقان ەلباسىنا ۇلكەن راحمەت ايتامىن. مەملەكەت باسشىسى قاسىم-جومارت كەمەلۇلى وكىلەتتىگىمدى ۇزارتىپ, باستاعان ىستەرىمدى جالعاستىرۋعا مۇمكىندىك بەرىپ, سەنىم ءبىلدىردى. سوندىقتان مەملەكەت باسشىسىنا ايتار العىسىم زور. وسى جەتى جىلدا ۇجىمىممەن بىرگە ۇلكەن ىستەر اتقاردىق, اۋقىمدى جوسپارلاردى ورىندادىق. بۇل رەتتە ءوزىڭىز, ەرلان جاقانۇلى, ۇنەمى قولداۋ تانىتتىڭىز, سول ءۇشىن ريزاشىلىعىمدى بىلدىرەمىن. قانات الدابەرگەنۇلىن ەرتە كەزدەن تانيمىن, قاتار ەڭبەك ەتتىك. الماتى وبلىسىن باسقارۋ وسىنداي بىلىكتى مامانعا سەنىپ تاپسىرىلعانىنا ريزامىن, - دەگەن ا.باتالوۆ قانات بوزىمباەۆقا قالتقىسىز قىزمەت, ابىرويلى ەڭبەك تىلەدى.

قانات الدابەرگەنۇلى الماتى وبلىسىن باسقارۋدىڭ وزىنە سەنىپ تاپسىرىلۋى زور جاۋاپكەرشىلىك ەكەنىن جەتكىزدى.

- الماتى وبلىسىنىڭ ورنى مەن ءۇشىن ەرەكشە. ويتكەنى جەتىسۋ اتا-بابام ءومىر سۇرگەن مەكەن. سوندىقتان دا ىستىق. جالپى وبلىستىڭ الەۋەتى زور, شەكارالى ايماق. ونى حالىقتىڭ يگىلىگىنە پايدالانا ءبىلۋىمىز كەرەك. وڭىردە اماندىق عابباسۇلىنىڭ باسشىلىعىمەن ىرگەلى ىستەر اتقارىلدى. مەن دە ءوز تاراپىمنان وبلىستى دامىتۋعا بار كۇش-جىگەرىمدى جۇمسايمىن دەپ ۋادە بەرەمىن. حالىقتىڭ سەنىمىن اقتاۋعا بارىمدى سالامىن, - دەدى ق.بوزىمباەۆ.

اكتيۆ اتىنان وبلىستىق ارداگەرلەر كەڭەسىنىڭ ءتوراعاسى ەرمەك كەلەمسەيىت, ىسكەر ايەلدەر وڭىرلىك كەڭەسىنىڭ ءتورايىمى ريمما سالىقوۆا ءسوز الىپ, ەل مۇددەسى جولىندا بىرلەسىپ اتقارعان جۇمىستارى ءۇشىن اماندىق عابباسۇلىنا العىس ايتىپ, جاڭا اكىم قانات بوزىمباەۆتىڭ قىزمەتىنە تابىس تىلەپ, قولداۋ بىلدىرەتىندەرىن جەتكىزدى.

اكتيۆ سوڭىندا قازاقستان رەسپۋبليكاسى پرەزيدەنتى اكىمشىلىگىنىڭ باسشىسى ەرلان قوشانوۆ ءماسليحات دەپۋتاتتارىنا قولداۋ بىلدىرگەنى ءۇشىن ريزاشىلىق ءبىلدىرىپ, كوپشىلىكتى ەل تاۋەلسىزدىگىنىڭ 30 جىلدىعىمەن قۇتتىقتادى. سول سياقتى وبلىستى دامىتۋدا ينۆەستيسيا تارتۋ, جاڭا جۇمىس ورىندارىن اشۋ, ىندەتپەن كۇرەس شارالارى باستى باسىمدىق بولىپ قالا بەرەتىنىن ايتتى.