g20 ەلدەرى اۋعانستانعا نە ىستەۋ كەرەك ەكەنى تۋرالى كەلىسىمگە كەلدى

g20 ەلدەرى اۋعانستانداعى گۋمانيتارلىق اپاتتىڭ الدىن الۋ ءۇشىن بىرلەسىپ جۇمىس ىستەۋگە كەلىستى. توتەنشە ءسامميتتى ۇيىمداستىرۋشى يتاليا بولدى. ؛

ەۋروپالىق وداق اۋعان ماسەلەسىنە بولىنەتىن ءبىر ميلليارد ەۋرو قايدا جۇمسالاتىنىن مالىمدەدى. قارجى اۋعان داعدارىسىنا بايلانىستى شۇعىل گۋمانيتارلىق قاجەتتىلىكتەرگە, سونداي-اق 15 تامىزدا تاليبان ەلدى باقىلاۋعا العاننان بەرى شەتەلگە قاشىپ جاتقان ادامداردى قابىلداۋعا, اۋعانستانعا كورشى ەلدەرگە كومەك كورسەتۋگە جۇمسالادى.

ۆيرتۋالدى سامميتكە يتاليا پرەمەر-مينيسترى ماريو دراگي, اقش پرەزيدەنتى دجو بايدەن, ءۇندىستان پرەمەر-مينيسترى نارەندرا مودي جانە كوپتەگەن ەۋروپالىق كوشباسشىلار قاتىستى. ونلاين سامميتتە قىتاي ءتوراعاسى سي سزينپين مەن رەسەي پرەزيدەنتى ۆلاديمير پۋتين بولمادى تەك ولاردىڭ وكىلدەرىن قاتىستى.

دراگي ەكى ەل ليدەرلەرىنىڭ كەلمەۋى g20-نىڭ قازىرگى ءتوراعاسى يتاليا ۇيىمداستىرعان "كەزدەسۋدىڭ ماڭىزدىلىعىن تومەندەتپەدى" دەدى.

سامميتكە قاتىسۋشىلار اۋعانستانداعى داعدارىستى جەڭىلدەتۋ قاجەتتىلىگىنە ءبىراۋىزدان كەلىستى. ءقازىر اۋعانستانداعى جاعداي مۇشكىل. ەلدىڭ شەتەلدەگى اكتيۆتەرى بۇعاتتالدى, بانكتەردەگى اقشاسى تاۋسىلدى, مەملەكەتتىك قىزمەتكەرلەرىنە جالاقى تولەنبەدى, ازىق-تۇلىك باعاسى قىمباتتادى. ميلليونداعان ادامعا قىس جاقىنداعان سايىن قاتتى اشتىق ءقاۋپى ءتونىپ تۇر.

گەرمانيا كانسلەرى انگەلا مەركەل "اۋعانستانداعى 40 ميلليون ادامنىڭ داعدارىسىنا قاراپ وتىرۋ ؛حالىقارالىق قوعامداستىقتىڭ ماقساتى بولا المايدى جانە بولماۋى كەرەك, ويتكەنى (اۋعانستاندا) ەلەكتر ەنەرگياسىن بەرۋ مۇمكىن ەمەس جانە قارجى جۇيەسى جوق" دەدى.

ەو قارجىنىڭ تاليبانعا ەمەس, جەرگىلىكتى جەردە جۇمىس ىستەيتىن حالىقارالىق ۇيىمدارعا اۋدارىلاتىنىن باسا ايتتى.

g20-نىڭ كومەكتەرىنىڭ كوپ بولىگى بىرىككەن ۇلتتار ۇيىمى ارقىلى جۇزەگە اسادى, ءبىراق سونىمەن بىرگە ەلگە تىكەلەي كومەك تە بولادى.

دراگي تاليبانمەن جۇمىس جاساۋ ولاردىڭ اكىمشىلىگىن مويىنداۋدى بىلدىرمەيتىنىن جانە تاليباندى سوزىمەن ەمەس, ىسىمەن باعالايتىنىن باسا ايتتى.

ول كەدەي ەلدەگى ايەلدەردىڭ جاعدايى الەمدى الاڭداتىپ وتىرعانىن اتاپ ءوتتى.

"قازىرگى ۋاقىتتا ءبىز پروگرەسس كورمەدىك. بولاشاق گۋمانيتارلىق باعدارلامالار ايەلدەر مەن قىزدارعا باعىتتالۋى كەرەك جانە ەلدەن كەتكىسى كەلگەن اۋعاندارعا ءقاۋىپسىز جول بەرىلۋگە ءتيىس" دەدى دراگي.