united launch alliance (ula) كومپانياسىنىڭ اتقارۋشى ديرەكتورى توري برۋنو/فوتو:spacenews.com
united launch alliance (ula) كومپانياسىنىڭ اتقارۋشى ديرەكتورى توري برۋنو: "اقش بۇدان بىلاي atlas v راكەتالارى ءۇشىن رەسەيدىڭ رد-180 قوزعالتقىشىن ساتىپ المايدى. ءوزىمىزدىڭ جاڭا قوزعالتقىشتار سىناقتىڭ سوڭعى ستادياسىنان ءساتتى وتۋدە, ال فورس-ماجور جاعدايىنا بىزدە الدىن الا ساتىپ الىپ قويعان 25 دانە رد-180 بار" دەپ مالىمدەدى.
اقش ءوز زىمىراندارى ءۇشىن وسى كەزگە شەيىن رەسەيلىك رد-180 قوزعالتقىشتارىن ساتىپ الىپ كەلگەن, الايدا 2014 جىلى رەسەيدىڭ ۋكرايناعا شابۋىلىنان كەيىن اقش سانكسيا سالىپ باستادى. بۇل ەكى ەل اراسىندا داۋ تۋعىزدى.
ارينە, اقش-تىڭ قوزعالتقىشتاردى وزدەرىندە جاساۋعا تەحنيكالىق مۇمكىندىكتەرى جەتكىلىكتى, الايدا ۇزاق جىلدار بويى قالىپتاسىپ, ءبىر جۇيەگە تۇسكەن دايىن قوزعالتقىشتاردى ساتىپ العان الدەقايدا ءتيىمدى دەپ ەسەپتەلدى. 1996 جىلى ناسا (اقش كوسموس اگەنتتىگى) جاريالاعان تەندەردى ەڭ الدىمەن رەسەيلىك "ەنەرگوماش" عىلىمي-وندىرىستىك بىرلەستىگى امەريكالىق pratt &؛ whitney كومپانياسىمەن بىرلەسىپ جەڭىپ الادى (ول كەزدە باتىستا رەسەيدى ءارتۇرلى ح/ا جوبالارعا قاتىستىرا وتىرىپ, وركەنيەتتى جولعا تۇسىرۋگە بولادى دەگەن يلليۋزيا بار ەدى). كسرو عالىمدارى ۇزاق جىلدار جۇمىستانىپ, اقىرى الەمدىك ستاندارتتارعا ساي, باسەكەگە قابىلەتتى قوزعالتقىش جاساپ شىعارعان بولاتىن. وسى جوبانى امەريكالىق pratt &؛ whitney كومپانياسىنىڭ اقشاسىن پايدالانا وتىرىپ اياعىنا دەيىن جەتكىزۋگە مۇمكىندىك تۋادى, ويتكەنى "ەنەگوماشتا" كسرو كەزىنەن قالعان ءونىمنىڭ ۇلكەن قورى بار بولاتىن. رف وسى زاۋىتتاردى وزدەرىندە ساقتاپ قالىپ, ۇزاق ۋاقىت وسى سالادا مونوپوليست بولدى. اقش قىرىم ءۇشىن سانكسيا سالىپ باستاعاندا روسكوسموس باسشىسى روگوزيننىڭ: "سوندا ەندى باتۋتپەن ۇشپاقسىڭدار ما؟" دەپ تاڭ قالعانى الەمدىك مەمگە اينالدى.
؛
وسىدان كەيىن-اق اقش ءرد-180-دى وزدەرىندە جاساۋعا شىنداپ كىرىستى. كورىپ وتىرعانىمىزداي, 2014 جىلدان بەرى وسىنداي تاۋەلسىزدىككە جەتۋگە جەتى جىل ۋاقىت كەتىپتى. روسكوسموس ونداعان ملرد رۋبل تابىس كوزدەرىنەن ايىرىلدى. بۇل نەگە اكەلىپ سوقتىرادى؟ بۇل سول زاۋىتتاردا جۇمىس جاسايتىنداردىڭ الەۋمەتتىك جاعدايى ناشارلايدى دەگەن ءسوز. تابىستارى دا ايتارلىقتاي تومەندەيدى. اقشا تولەنبەسە ونداعى ينجەنەر-تەحنيكتەر باسقا جۇمىسقا كەتەدى, زاۋىتتار جابىلادى, ءسويتىپ روسكوسموستىڭ دا شارۋاسى شاتقاياقتايدى. ەندى تەك ماسەلە ۋاقىتتا عانا. ءونىم قورى بار ما, قانشا ۋاقىتقا جەتەدى؟ كەزىندە كورەرمىز. ايتالىق, بەس جىل. ءبىز ءۇشىن ۇزاق ۋاقىت سياقتى بولعانمەن دە تاريح ءۇشىن قاس-قاعىم ءسات.
؛
سوڭعى جىلدارى روسكوسموستىڭ جوعالتقانى تەك قانا قوزعالتقىش ساتۋ ەمەس. ولار ۇزاق جىلدار بويى حالىقارالىق كوسموس ستانسياسىنا (حكس) استروناۆتار مەن جۇك جەتكىزۋدە مونوپوليست بولىپ كەلگەن ەدى. ءبىر استروناۆتى ۇشىرۋ 80 ملن دوللارعا دەيىن جەتكەن ەدى, الايدا يلون ماسكىنىڭ وسى مىندەتتى قولعا الۋى دا روسكوسموستى ءبىرتالاي تابىسىنان ايىرىپ كەتتى, ول ونى 20 ملن-عا شەيىن ءتۇسىردى. رف وسى مونوپوليستىك جاعدايىن پايدالانىپ, "سويۋزدى" ارەنداعا بەرگەنى ءۇشىن جىلىنا ءبىر ميلليارد دوللارعا دەيىن تابىس تاۋىپ وتىرىپتى. كورىپ وتىرعانىمىزداي, "رف ۇلى كوسموستىق دەرجاۆا" دەگەن اتاۋ جاقىن جىلدارى ءوز ءمانىن جوعالتىپ, تاريحقا اينالاتىنى بەلگىلى بولىپ وتىر. بۇل ومىردە ءبارى دە وتكىنشى دەپ بەكەر ايتىلماعان.
رەسەي ۇگىت-ناسيحاتشىلارى اقش-تىڭ ءرد-180-دى ساتىپ الۋدى توقتاتۋىن ساياساتپەن بايلانىستىرادى, ساياسي شانتاج دەۋدەن تانباي كەلەدى, الايدا بايىپتاپ قاراعاندا بۇل ءىس اقىر ءتۇبى بولماي قويمايتىن تابيعي زاڭدىلىق ەكەنىن بايقاۋعا بولادى. سوڭعى كەزدەرى جەكەمەنشىك كومپانيالاردىڭ كوسموس سالاسىنا دەندەپ ەنۋى ءبارىبىر وسىنداي جاعدايعا الىپ كەلەر ەدى. اقش-تىڭ اناعۇرلىم ارزان دا سەنىمدى ءوز زىمىران قوزعالتقىشتارىن شىعارۋى دا تابيعي زاڭدىلىق, ەكونوميكانىڭ دامۋ بارىسى ءبارىبىر وسىعان الىپ كەلەتىنى شىندىق ەمەس پە؟ ساياسات مۇلدەم جوق دەۋگە دە بولماس, الايدا ەكونوميكالىق زاڭدىلىقتى قايدا قويامىز؟
قۋانىش ەدىلحانتەگى,
حالىقارالىق شولۋشى
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر